Marukusu 2

Yesu u potsokpoi ma̱kutsuma̱

(Mat. 9:1-8; Luk. 5:17-26)

1Ayin a yaꞋan ka̱u ba, ɗa Yesu u doku u bonoi a Kafarnahum. Ɗa uma a panai a dana Yesu u bono ta̱ a kpaꞋa. 2Ɗa uma n a̱bunda̱i a banai wa̱ ni, ali ɗa ubuta̱ u gusa̱i, n pulai vu utsutsu dem. Ɗa u ka̱na̱i kudana uma kadanshi ka̱ Ka̱shile. 3Ɗa uma o yoku, ele uma a̱ na̱shi a ɗikai vuza na wi ma̱kutsuma̱ a bankai ni. 4Adama a uma, a fuɗa a uka n vuma va a̱ ubuta̱ u Yesu ba. Ɗa a karakpai kunu ka n tsugaɗi, ɗa a zorukpoi n vuma va punu a kajiba. Ɗa a zuwai ni a̱ ubuta̱ u na Yesu va wi. 5Ana Yesu we enei uteku u na e nekei a̱ɗu e le, ɗa u danai ma̱kutsuma̱ ma, “Maku ma̱ va̱, a cinukpaka wu ta̱ n unushi u nu.”

6Ubuta̱ wa lo nlum n Wila̱† n yoku mi ta̱ lo ida̱shi, ɗa a̱ ka̱na̱i kusheshe punu a̱ a̱ɗu e le, 7“Yi ɗa̱i i zuwai ɗa vuma vu nam pa u yaꞋin kadanshi tsu nan lo? Wi ta̱ a kadanshi ki ishikushi. Yayi u kufuɗa kucinukpaka toku n unushi? Sai Ka̱shile endeꞋen.”

8Gogo lo, ɗa Yesu u yevei ili i na i e kusheshe. Ɗa we ecei le, “Yi ɗa̱i i zuwai ɗa yi e kusheshe tsu nan lo punu a̱ a̱ɗu a̱ ɗa̱? 9Yi ɗa̱i i laꞋi n ɗevu, n dana baci, ‘A cinukpaka wu ta̱ unushi u nu,’ ko ‘Ɗenga̱ vu wala’?

10“Adama a na i yeve a na Maku ma Vuma† mi n utsura a aduniyan a nam pa u cinukpaka uma dem n unushi.” Ɗa u danai ma̱kutsuma̱ ma, 11“Ɗenga̱ vi ɗika kajiba ka̱ nu vu wala a kubana a kpaꞋa.”

12Ɗa u ɗenga̱i u ɗikai kajiba ka̱ ni, u ka̱na̱i nwalu a̱ a̱shi e le. Ili i nan lo ya i nekei uma mereve, ɗa a̱ ka̱na̱i kucikpa Ka̱shile a danai, “Ka̱ta̱ tsu saꞋwa kene ili nannai ba.”

Yesu u ɗekei Levi

(Mat. 9:9-13; Luk. 5:27-32)

13Ɗa kpamu Yesu wu uta̱i ɗa u banai a̱ ka̱kina̱ ka mala. Ɗa uma n a̱bunda̱i a banai wa̱ ni, u ka̱na̱i kuyotsongusu le. 14A̱yi a nwalu, ɗa we enei Levi,† ulobo u Alfa, ida̱shi a̱ ubuta̱ u na a ci isa utafu. Ɗa Yesu u danai ni, “Ɗenga̱, vu tono mu.” Ɗa Levi u ɗenga̱i ɗa u tonoi ni.

15Ana megeshe ma yaꞋin, Yesu a̱ ka̱tsuma̱ ka kulyaꞋa ilikulyaꞋa a kpaꞋa ku Levi, ɗa feu aza a kisa utafu n a̱bunda̱i n aza a̱ unushi i a kulyaꞋa n a̱yi m mukumitoni n ni, adama a na icuꞋu i uma i nan lo i ta̱ a̱ ka̱tsuma̱ ka aza a na o tonoi ni. 16Amma ana nlum n Wila̱ n na mi Afarishi,† e enei ni a kulyaꞋa ilikulyaꞋa n aza a̱ unushi n aza a kisa utafu. Ɗa e ecei mukumitoni n ni, “Yi ɗa̱i i zuwai ɗa wi a kulyaꞋa ilikulyaꞋa n aza a na a̱ kpa̱ɗa̱i kusuɓa̱?”

17Ana Yesu u panakai le, ɗa u danai le, “Aza a na i nu mɓa̱la̱ ba, i a kula̱nsa̱ vuza va̱ a̱guma̱ ba, sai aza a na i nu mɓa̱la̱. N ta̱wa̱ adama a aza a̱ usuɓi ba, amma adama a aza a na i n unushi.”

A yaꞋankai Yesu keci ku kuka̱na̱ una̱

(Mat. 9:14-17; Luk. 5:33-39)

18Mukumitoni n Yahaya n Afarishi, a̱ tsu ka̱na̱ ta̱ una̱. Aza o yoku e ecei Yesu, “Yi ɗa̱i i zuwai mukumitoni n Yahaya n Afarishi a̱ tsu ka̱na̱ una̱, amma mukumitoni n nu n tsu ka̱na̱ ba?” 19Ɗa Yesu u danai le, “Nini ɗai aza a na i koɓolo n vuza yolo i savu a̱ kuka̱na̱ una̱ ayin a na vuza yolo wi lo? A̱ kuka̱na̱ ba. 20Amma ayin i ta̱ lo a̱ kuta̱wa̱ ana a kuɗika vuza yolo va, ayin a nan lo a ɗa a̱ kuka̱na̱ una̱.

21“Babu vuza na u kupa̱ɗa̱ngu kuminya ku kuku n kakashi ka savu. Vuza na baci u yaꞋan nannai, kakashi ka savu ka ki ta̱ o kusoꞋimkpo kuminya ku kuku ka. Wi ta̱ kpamu a kuzuwa kakashi ka ko doku ka karasaka lababa.

22“Vuza kpamu u kutsungu ribinya e kedele ka̱ kuku ba. Vuza na baci u yaꞋin nannai, ribinya ya yi ta̱ o kuɓoso kedele ka, ka̱ta̱ u namba ribinya ya n kedele ka dem. Amma a̱ tsu tsungu ta̱ ribinya e kedele ka savu. Ka̱ta̱ dem vi le a lyaꞋa kelime n kokpo n ugaꞋin.”

Vuzagbayin va Ashibi

(Mat. 12:1-8; Luk. 6:1-5)

23Kanna ka Ashibi† ko yoku, Yesu a kupasamgbanai a kashina ka̱ ya̱nji, ɗa mukumitoni n ni a̱ ka̱na̱i kuwala n o koɗoi agita a̱ ya̱nji n a kupai. 24Ɗa Afarishi a danai ni, “Indana, yi ɗa̱i i zuwai ɗa i a kuyaꞋan nannai? I o kukoɗo ya̱nji a kashina, u gaꞋan a yaꞋan nannai a kanna ka Ashibi ba.”

25Ɗa Yesu wu ushuki, “A̱ɗa̱ i kece ili i na Dawuda u yaꞋin n uma a̱ ni a ayin a na kambulu ka̱ ka̱na̱i le ba? 26Ayin a na Abiyata wi ishi mogono ma anan ganu, ɗa Dawuda uwai a kpaꞋa ku Ka̱shile, u takumai burodi vu na a vaꞋinkai. Vu na vu gaꞋin sai ganu ɗa koci u kutakuma vu ɗa. Ali ɗa u neꞋi a̱ja̱Ꞌa̱ a̱ ni.”#1 Sam. 21:1-6.

27Ɗa u danai le dem, “A yaꞋan ta̱ Ashibi adama a vuma, amma vuma adama a Ashibi ba. 28Adama a nannai, mpa Maku ma Vuma mpa ɗa Vuzagbayin va Ashibi.”

Currently Selected:

Marukusu 2: asgNT

Highlight

Copy