Matiyu 27

A ɗikai Yesu a kubana u Bilatu

(Mar. 15:1; Luk. 23:1-2; Yah. 18:28-32)

1Ana kayin ka asai n usana ka̱lika̱li, ɗa anan ganu vu gbagbaꞋin ra̱ka̱ nu nkoshi e sheshei kuna Yesu. 2Ɗa a shiyai ni a ɗikai a bankai u Gomuna Bilatu.†

Ukpa̱ u Yahuza

(Azu. 1:18-19)

3Yahuza, vuza na u nekei Yesu wa irala i ni, we enei e sheshe ta̱ kuna Yesu. Ɗa u ɓa̱la̱i ka̱tsuma̱ ka̱u adama a ili i na u yaꞋin. Ɗa u ɗikai ikebe ya azurufa kamankupa ka, ɗa u bonokoi anan ganu vu gbagbaꞋin nu nkoshi. 4U danai, “Unushi† u na n yaꞋin u ɗa na: N neke ɗa̱ ta̱ vuma vu na wi babu unushi adama a na yu una.”

Ɗa a̱ ushuki, “Yi ɗa̱i i burai tsu n nannai? Na lo ka̱ nu kaꞋa, ka̱ tsu kaꞋa ba.”

5Ɗa Yahuza u varuki ikebe ya punu a̱ A̱Ꞌisa̱ a Gbayin. Ɗa wu uta̱i u banai u shiyai ka̱ci ka̱ ni e kuɗeku n kawin zuva ali u kuwa̱i.

6Anan ganu vu gbagbaꞋin a a ɗikai ikebe ya ɗa a danai, “Wi isa ta̱ ikebe yi mpasa i nam pa adama a wuma u vuma. Wila̱ u dana ta̱ tsa kuzuwa i ɗa koɓolo n ikebe ya̱ A̱Ꞌisa̱ a Gbayin ba.” 7Ɗaɗa a kucikpa a ɗikai ikebe ya ɗa a tsulai kashina ka kamaꞋi ko mgbodo adama a na a̱ ciya̱ ubuta̱ u na a̱ kuciɗa̱ngu omoci a na a̱ kuwa̱i a Urishelima. 8Ɗaɗa i zuwai ɗa e ɗekei ubuta̱ wa “Kashina ka Mpasa” ali a kubana gogo na. 9Adama a nannai ili i na keneki Irimiya† u danai yo okpo ta̱ mayun:

“A ɗikai ikebe ya azurufa kamankupa,

ikebe i na uma a Israila a̱ ushuki kutsupa adama a̱ ni.

10A tsulakai ikebe ya kashina ka kamaꞋi ko mgbodo,

tsu na Vuzavaguɗu u danai.”#Ir. 32:6-9.

Bilatu u yaꞋankai Yesu keci

(Mar. 15:2-5; Luk. 23:3-5; Yah. 18:33-38)

11A ayin a nan lo, Yesu u shamgbai kelime ko Gomuna Bilatu, ɗa we ecei ni, “Avu ɗa mogono ma Ayahuda ma?”

Ɗa Yesu wu ushuki, “E, ta ki nannai tsu na vu danai.”

12Amma ana anan ganu vu gbagbaꞋin nu nkoshi a yaꞋin nsata adama e Yesu, ɗa u paɗai bini. 13Ɗa Bilatu u danai ni, “Vu panaka le a nsata n nu adama a ili i nam pa ra̱ka̱ ba?” 14Amma Yesu u dana ili i yoku ba, ɗa gomuna va u yaꞋin mereve ka̱u.

Bilatu wu ushuki a una Yesu

(Mar. 15:6-15; Luk. 23:13-25; Yah. 18:39—19:16)

15Ka̱ya̱ dem a ayin a̱ Ka̱ɗiva̱ ka Kupasamgbanai, gomuna u ci shikpa ta̱ vuza vu ugbashi vi te, vuza na a zagbai. 16A ayin a nan lo vuma vi yoku wi ta̱ lo a̱ kunu ku ugbashi. Kula ku ni ku ɗa Barabas. Yaba dem u yeve ta̱ vuma vu nam pa vuza gbani-gbani ɗa ka̱u. 17Ana ka̱bunda̱i ka uma ka ko ɓolongi a̱ ubuta̱ u te, ɗa Bilatu we ecei le, “Kagbashi ke ne kaꞋi i cigai n ka̱sa̱kpa̱? I ciga ta̱ Barabas ko Yesu vuza na e ci ɗeke Kishi?” 18Bilatu u yeve ta̱ adama a ikovi i ɗa aza e kelime a̱ tuka̱i Yesu wa̱ ni.

19Ana wi ida̱shi a kakuba ka afada, ɗa vuka vi ni vu suki akaka a nam pa a kubana wa̱ ni: “Ka̱ta̱ vi yaꞋanka vuma vu nan lo ili ba, adama a na u yaꞋan unushi ba. Anana n yaꞋan ta̱ alatani adama a̱ ni, alatani a ta na a takacika mu ta̱ ka̱u.”

20Amma ɗa anan ganu vu gbagbaꞋin nu nkoshi m gba̱ra̱-gba̱ra̱ a gutsai ka̱bunda̱i ka uma ka ka dana Barabas ɗa i a kuciga a̱ ka̱sa̱kpa̱, ka̱ta̱ u zuwa Yesu u kuwa̱.

21Ɗa Bilatu u doku we ecei uma a, “Yayi a̱ ka̱tsuma̱ ka uma e re a nam pa i cigai a̱ ka̱sa̱kpa̱?”

Ɗa a̱ ushuki, “Barabas.”

22Ɗa we ecei, “To, yi ɗa̱i n kuyaꞋanka n Yesu, vuza na e ci ɗeke Kishi?”

Dem vi le ɗa a̱ ushuki, “Bapai ni a maɗanga ma atakaci!”

23We ecei, “Yi ɗa̱i i zuwai? Ili i gbani-gbani ye ne i ɗai u yaꞋin?”

Amma ɗa o orukpoi n kacaꞋa ka̱u, “Bapai ni!”

24Ana Bilatu we enei adanshi ili yi lo i na u kuyaꞋan ba, ɗa kpamu uma a cigai kuyaꞋan vishili. Ɗaɗa u ɗikai mini ɗa u saꞋi ekiye a̱ ni kelime ke le ɗa u danai, “Mpa ili i bura mu n kakuna ku ukpa̱ u vuma vu nam pa ba. A̱ɗa̱ ɗa yi a kuyaꞋan kaꞋa!”

25Ɗa yaba dem wu ushuki, “I ta̱ a kufuɗa a taɗaka tsu ukpa̱ u ni, a̱tsu m muku n tsu.”

26Ɗa Bilatu u ka̱sa̱kpa̱i Barabas. Ɗa u danai osoji a̱ ni a faba Yesu n vukpangiri ka̱ta̱ a bana a bapa yi a maɗanga ma atakaci.†

Osoji o zoꞋosoi Yesu

(Mar. 15:16-20; Yah. 19:2-3)

27Ɗa osoji o gomuna a ɗikai Yesu sai punu e kefeku ka̱ ni, ɗa ra̱ka̱ vi le a kandarangi ni. 28O foɗoi ni ntogu, ɗa a ukai ni kuminya ku tsugono ku shili. 29Ɗa a zamai awana ɗa a caꞋakai ni oroliko ɗa a alakai ni a kaci. Ɗa a zuwai kalangu ko tsugono e kukiye ku usingai ku ni. Ɗa a̱ kuɗa̱ngi wa̱ ni ɗa o zoꞋosoi ni, n a danai, “Ci cikpa wu ta̱, mogono ma Ayahuda!” 30Ɗa a̱ ciꞋikpa̱i ni ntsa̱n. Ɗa a isai kalangu ka wa̱ ni ɗa a lapakai ni n kaꞋa a kaci ka̱u. 31Ana a̱ ta̱wa̱i o kotsoi kuzoꞋoso yi, o foɗoi ni kuminya ka ɗa a ukai ni ntogu n ni ma kpamu. Ɗa a̱ uta̱ka̱i ni a̱wa̱ta̱ a kubana a̱ ubuta̱ u na a kuna yi.

A bapai Yesu a maɗanga ma atakaci

(Mar. 15:22-32; Luk. 23:27-43; Yah. 19:17-27)

32Ele a̱ kuta̱ pulai, ɗa a cinai vuma vi yoku vu Kure kula ku ni ku ɗa Sima. Osoji a gutsai ni u ɗika maɗanga ma atakaci me Yesu. 33Dem vi le ɗa a yawai a̱ ubuta̱ u na e ci ɗeke Galgata (na va ɗaɗa Ubuta̱ u MokoꞋo ma Kaci†). 34Osoji a e nekei Yesu ma̱kya̱n u soꞋo usatari n kujini tsa̱ a̱guma̱. U kondoi amma ɗa u iwain kusoꞋo maꞋa. 35Ana o kotsoi kubapa yi a maɗanga ma atakaci, ɗa osoji a a̱ ka̱na̱i kuyaꞋan kazagba adama a na e ene vuza na u kuciya̱ motogu me Yesu ma. 36Osoji a a̱ da̱sa̱ngi lo ɗa a lyaꞋi kelime n kinda yi. 37Gaɗi a uɓon u kaci u ni, a zuwai urotu u na u kuyotsongu uma ili i na i zuwai ɗa a bapai ni. Urotu wa u danai: “na va ɗaɗa yesu, mogono ma ayahuda.”†

38Ele osoji a a bapa ta̱ feu oboki e re koɓolo n Yesu va, vuza te e kukiye ku usingai ku ni vuza te tamkpamu a̱ ugula̱. 39Uma a na a banai ɗe a̱ gita̱i kufila̱ n aci n a shikai Yesu. 40A danai, “Vu danai vi ta̱ a kufuɗa kufa̱da̱ A̱Ꞌisa̱ a Gbayin ka̱ta̱ vu maꞋasaka a ɗa a̱ ka̱tsuma̱ ka ayin a tatsu. Adama a nannai isa ka̱ci ka̱ nu! Cipa̱ a maɗanga ma atakaci ma, Maku ma̱ Ka̱shile ma baci vi mayun!”

41Anan ganu vu gbagbaꞋin nu nlum n Wila̱ o zoꞋosoi ni feu. 42A danai, “Wi isa ta̱ uma, amma u fuɗa wi isa ka̱ci ka̱ ni ba! U danai a̱yi ɗa mogono mi Israila! Mogono ma baci wi, u cipa̱ a maɗanga ma atakaci ma. Ka̱ta̱ ci neke a̱ɗu a̱ tsu wa̱ ni. 43Wu ushuku ta̱ n Ka̱shile. Ucikali u Ka̱shile u ɗa baci yaꞋan wi isa yi. Ali u danai, ‘Mpa Maku ma̱ Ka̱shile maꞋa.’ ” 44Ta feu nannai oboki a na a bapai koɓolo n a̱yi a shikai ni.

Ukpa̱ u Yesu

(Mar. 15:33-41; Luk. 23:44-49; Yah. 19:28-30)

45Kanna a kaci ɗa ka̱yimbi ka̱ kimba̱i likuci dem kpaɓam, ali a kubana iyum i tatsu. 46Ɗaɗa ɗevu n ayin a nan lo a, Yesu u shika̱i n ka̱la̱ka̱tsu ka̱u, “Eloi, Eloi lema sabatana?” Ili i na wi a kudana i ɗaɗa, “Ka̱shile ka̱ va̱, Ka̱shile ka̱ va̱, yi ɗa̱i i zuwai ɗa vu vakangi mu?”

47Uma o yoku a na i lo kashani a panakai ni ɗa a danai, “Iliya ɗa wi e kuɗeke!”

48Vuza te vi le u sumai gogoꞋo ɗa u banai ɗa u la̱nsa̱i ayangi ɗa u yeki m ma̱kya̱n ma kalam ɗa u shiyai a ɗa a kalangu ɗa u nekei Yesu u soꞋo. 49Amma aza a na a buwai a danai, “Shamgbai, yaꞋan ce ene ko Iliya u kuta̱wa̱ ta̱ wa wawa yi?”

50Ɗa kpamu Yesu u doku u shika̱i n ka̱la̱ka̱tsu ka̱u, ɗaɗa u kuwa̱i.

51A ayin a nan lo a derere, Ka̱shile ka zuwai kakashi ka na ki usaki a̱ A̱Ꞌisa̱ a Gbayin#27:51 Kakashi ka nam pa ka ɗa ke ci pece ta̱ ubuta̱ u ciɗa n ubuta̱ u na u laꞋi n ciɗa ciɗa a̱ A̱Ꞌisa̱ a Gbayin. Mogono ma anan ganu maꞋa koci u kuꞋuwa a̱ ubuta̱ u na u laꞋi n ciɗa ciɗa ku te a̱ ka̱ya̱. a ka karai ugboku u re, ka̱ gita̱i gaɗi a̱ kuta̱wa̱ ɗaka. Iɗika i gba̱ɗa̱sa̱i, ɗa akpanlai o ɓosoi. 52Asaun a̱ ɓa̱yuwa̱i, ɗa uma a̱ Ka̱shile n a̱bunda̱i a na a̱ kuwa̱i ɗe a̱ ɗenga̱i. 53Ana Ka̱shile ka̱ ɗengusa̱i Yesu a kasaun, ɗa uma a a̱ uta̱i a asaun a banai a asuvu a ubirini u ciɗa u Urishelima, a̱ ubuta̱ u na a yotsongi ka̱ci ke le u uma n a̱bunda̱i.

54Ana jagaba n osoji a na i koɓolo n a̱yi a kinda Yesu e enei iɗika i gba̱ɗa̱sa̱i n ili i na i matsai dem, ɗa a panai wovon ɗa a danai, “Mayun, a̱yi Maku ma̱ Ka̱shile maꞋa!”

55A̱ma̱ci n a̱bunda̱i a na a̱ uta̱i a̱ Ga̱lili aza a na o yongoi o kutono Yesu adama a na a̱ ɓa̱nka̱ yi, i ta̱ kashani daꞋin m maɗanga ma atakaci ma, a kinda. 56A̱ ka̱tsuma̱ ka̱ a̱ma̱ci a ele ɗa Meri Magadaliya, m Meri† a̱na̱ku a Yakubu n Isuhu,† n vuka vu Zabidi a̱na̱ku a Yakubu n Yahaya.

Ka̱ciɗa̱ ke Yesu

(Mar. 15:42-47; Luk. 23:50-56; Yah. 19:38-42)

57Vuma vi yoku wi ta̱ lo vuza vu uciyi, kula ku ni ku ɗa Isuhu† vuza vu Aramatiya. A̱yi vuza vu kutoni vi Yesu ɗa. N kulivi ku nan lo, 58u banai u Bilatu ɗa u folonoi e neke yi keven ki ikyamba ke Yesu. Ɗa Bilatu u danai osoji e neke yi. 59Ɗa Isuhu u ɗikai keven ki ikyamba ka ɗa wa alai kaꞋa n arikinlai a na i wa̱ri a savu. 60Ɗa u zuwai keven ki ikyamba ke Yesu a kasaun ka savu ka na u sheꞋwekei ka̱ci ka̱ ni a kakpanlai. Ɗa u gida̱la̱kpa̱i katali ka gbayin adama a na u kpadaka utsutsu u kasaun wa. Ɗaɗa u ɗenga̱i u lazai. 61Meri Magadaliya m Meri vi te va lo ida̱shi ɗevu a kinda.

Osoji a indai kasaun

62A kanna ke ire, n Ashibi ta na, anan ganu vu gbagbaꞋin koɓolo n Afarishi a banai u Bilatu. 63A danai, “Vuzagbayin, ci ciɓa ta̱ a ayin a na vuma va aꞋuwa vu nan lo wi n wuma u danai, ‘Ayin a tatsu a yaꞋan baci mi ta̱ a̱ kuɗenga̱ a kasaun.’ 64Adama a nannai, dana le a inda kasaun ka mayin ali a kubana a kanna ka tatsu ka. Ta baci nannai ba, mukumitoni n ni i ta̱ a kufuɗa kubana ka̱ta̱ o boko keven ki ikyamba ka, ka̱ta̱ a dana uma u ɗenga̱ ta̱ a kasaun. AꞋuwa a nan lo i ta̱ a kulaꞋa a cau m gbayin.”

65Bilatu u danai, “Ɗika osoji o yoku ka̱ta̱ a bana a inda kasaun ka mayin tsu na a kufuɗa.” 66Ɗaɗa a lazai a̱ ka̱sa̱kpa̱i Bilatu a kubana a kasaun ka, ɗa a paɗarai katali ka n ka̱ta̱mba̱ri† ko mogono, ɗa a̱ ka̱sa̱kpa̱ osoji a inda kaꞋa.

Currently Selected:

Matiyu 27: asgNT

Highlight

Copy