Matiyu 22

Agisana a kadanshi ka̱ ka̱ɗiva̱ ko yolo

(Luk. 14:15-24)

1Ɗa kpamu Yesu u yotsongushi uma n agisana. U danai, 2“Tsugono tsu gaɗi ci ta̱ nahannai: Mogono mo yoku maꞋa mo foɓusoi kuyaꞋanka kolobo ka̱ ni ka̱ɗiva̱ ko yolo. 3U banuki uma o yoku a bana a̱ ubuta̱ u ka̱ɗiva̱ wa. Ana o foɓusoi ka̱ɗiva̱ ka, ɗa u suki agbashi a̱ ni e ɗeke uma a na u banuki va, amma ɗa a iwain kuta̱wa̱.

4“Ɗaɗa u suki agbashi o yoku, u danai, ‘Dana aza a na m banuki va, n kotso ta̱ kufoɓuso ka̱ɗiva̱† ka. M minya ta̱ ɗe anaka a̱ va̱ a na a laꞋi n kugaꞋan, ɗa n suꞋwain inyama ya. Gogo na ili dem i yaꞋan ta̱ ufoɓushi. Ta̱wa̱i ka̱ɗiva̱ ko yolo ka.’

5“Amma omoci a e keɓece n ka̱ɗiva̱ ka ba. Ele vi yoku a lazai a kubana a ashina e le, aza o yoku tamkpamu a banai kulyaꞋa kuden. 6Aza o yoku a̱ ka̱na̱i agbashi o mogono a, ɗa a lapai le, ɗa a unai le. 7Ɗa u yaꞋin wupa ka̱u, ɗa u suki osoji a̱ ni a una aza a̱ ma̱ga̱la̱ka̱ a, ka̱ta̱ o songu likuci ya.

8“Ɗaɗa mogono ma ma danai agbashi a̱ ni, ‘Ka̱ɗiva̱ ko yolo ka ka yaꞋan ta̱ ufoɓushi ɗe. M banuku ta̱ uma a nan lo, amma ele na m banuki va a yawa a̱ ta̱wa̱ ba. 9Adama a nannai banai a uye nu nsanji dem, ka̱ta̱ i banuku yaba dem vu na i cinai u ta̱wa̱ ka̱ɗiva̱ ka̱ va̱.’ 10Ɗa agbashi a o tonoi uye, ɗa o ɓolongi uma ra̱ka̱ a na a cinai, aza a̱ ma̱riki n aza a gbani-gbani dem. Ɗa ubuta̱ u ka̱ɗiva̱ wa u shanai n omoci.

11“Ana mogono ma ma uwai adama a na we ene omoci a, ɗa we enei vuma vu na ntogu n ni n gaꞋin ba. 12Ɗa we ecei, ‘Ka̱ja̱Ꞌa̱ ka̱ va̱, yi ɗa̱i i zuwai ɗa vu ukai ntogu n na m kpa̱ɗa̱i kugaꞋan, ɗa vu ta̱wa̱i ka̱ɗiva̱ ka nam pa?’ Amma komoci ka ko okpoi bini.

13“Ɗa u danai agbashi a̱ ni o yoku, ‘Shiyai vuma vu nam pa ekiye n ene. Taɗuki ni pulai a̱ ubuta̱ u ka̱yimbi. Ta ɗe uma a̱ kushika̱ n a lumamgbanai ngaꞋan adama a̱ mɓa̱la̱.’

14“Mayun, a banuku ta̱ uma n a̱bunda̱i, amma uma kenu ɗa a zagbai.”

Keci ku ukuna u kutsupa ku utafu

(Mar. 12:13-17; Luk. 20:20-26)

15Ɗa Afarishi† a yaꞋin oɓolo adama a na e sheshe uye u na a kuzuwaka Yesu maza a̱ ubuta̱ u kadanshi ka̱ta̱ a̱ ciya̱ ili i na a̱ kuka̱na̱ka̱ yi. 16Ɗa a̱ suꞋuki ni aza o kutoni e le o yoku koɓolo n aza o kutoni a̱ Hiridu. A danai, “Malum, ci yeve ta̱ a na vuma vu ma̱riki ɗa vi, vi ci yotsongusu ta̱ kpamu n ili i mayun yu uye u Ka̱shile. Vi ci yaꞋanka ta̱ uma kpamu ili derere ko ele ɗa anan ya. 17To, dana tsu uteku u na vi sheshei. U gaꞋan ta̱ tsu tsupa Mogono Kaisa† utafu, ko u gaꞋan ba?”

18Yesu u yeve ta̱ kusheshe ku gbani-gbani ku le, ɗa u danai, “A̱ɗa̱ aza a kapalaka̱shi! Yi ɗa̱i i zuwai ɗa yi a kuciga kaza mu? 19Yotsongi mu ikebe#22:19 La̱na̱ a kaci ku udani “Ikebe”, punu ɗe ka̱ta̱ vu la̱na̱ “Dinari” a̱ Ubuta̱ wi ili i Kuyeve. i na i tsu tsupaka utafu.” Ɗa uma a o yotsongi ni vikebe va azurufa va. 20Ɗa we ecei, “Kululu n kula ku yayi ki punu a ikebe ya?”

21Ɗa a̱ ushuki, “Kululu ku mogono ma gbayin Kaisa.”

Ɗaɗa u danai le, “Nekei Mogono Kaisa ili i na yi i Kaisa, ka̱ta̱ i neke Ka̱shile ili i na yi i Ka̱shile.”

22Ana a panai nannai, ɗa a yaꞋin mereve, ɗa a lazai a̱ ka̱sa̱kpa̱i ni.

Keci ku ukuna u kuɗenga̱ a kasaun

(Mar. 12:18-27; Luk. 20:27-40)

23A̱sa̱dukiya† a̱ ushuki a na uma a̱ kuɗenga̱ n wuma ayin a na a̱ kuwa̱i ba. A kanna ke te ka nan lo, A̱sa̱dukiya o yoku a̱ ta̱wa̱i u Yesu ɗa a danai, 24“Malum, Musa u danai, ‘Vuma u kuwa̱ baci babu u ciya̱ muku, u yotso ta̱ vuza ni u sosuku kagapa ka vuka ka ka̱ta̱ u ciya̱ka̱ yi muku.’ 25Ayin a cau, uma e cindere ɗa vuza m mokoshi ma̱ ni o yongo ta̱ punu na aduniyan. Vuza iyain u yaꞋin yolo, amma ɗa u kuwa̱i babu u ciya̱ muku, ɗa vuza ni vi ire u sosuki kagapa ka vuka ka. 26Vuma vu nam pa feu ɗa u kuwa̱i babu u ciya̱ muku, ɗa vuka va vu doku vo oloi vuza tatsu, ta ka yaꞋin nannai ali ɗa vuka vo oloi uma e cindere dem. 27Ɗa feu vuka va vu kuwa̱i. 28Ayin a na baci Ka̱shile ka̱ ɗengusa̱i uma a kasaun, vuka vi yayi u kokpo? Wo olo ta̱ uma e cindere e le ra̱ka̱.”

29Ɗa Yesu wu ushuki le, “I yeve ba, adama a na i yeve i na Katagarda ka Ciɗa ka danai ba, i yeve kpamu kakuna ku utsura u Ka̱shile ba. 30Ayin a na baci uma a̱ ɗenga̱i a kasaun, a kuyaꞋan yolo ba, i ta na feu e kuneke le yolo ba. I ta̱ o kokpo an alingata a gaɗi. 31Mayun i kece ta̱ ili i na Ka̱shile ka danai ɗa̱ adama a ukuna u kuɗenga̱ a kasaun, 32‘Mpa ɗa Ka̱shile ki Ibrahim, n ki Ishaku, n ka Yakubu.’#Kut. 3:6. Ka̱shile ka aza a wuma kaꞋa, amma ka̱ a̱kpisa̱ ba.” 33Ana ka̱bunda̱i ka uma ka panai nannai, ɗa a yaꞋin mereve n kuyotsongusu ku ni.

Wila̱ u na u laꞋi m gbayin

(Mar. 12:28-34; Luk. 10:25-28)

34Ana Afarishi a panai a na A̱sa̱dukiya a e yeve ili i na a̱ kushuku ba, ɗa a yaꞋin oɓolo. 35Vuza te vi le vu na wi malum ma̱ Wila̱, u dakakai adama a na u ka̱na̱ Yesu n keci:

36“Malum, Wila̱ we ne u ɗai u laꞋi m gbayin a̱ Wila̱ u Musa?”

37Yesu wu ushuki, “ ‘Ciga Vuzavaguɗu Ka̱shile ka̱ nu n ka̱ɗu ka̱ nu ra̱ka̱, n wuma u nu ra̱ka̱, koɓolo n kusheshe ku nu ra̱ka̱.’#K.Wil. 6:5. 38Na va ɗaɗa Wila̱ u iyain, u ɗaɗa kpamu u laꞋi m gbayin. 39Wila̱ u ire u na feu wi u gbayin u ɗaɗa: ‘Ciga vuza vu nu ka̱u uteku u na vi cigai ka̱ci ka̱ nu.’#A.Gan. 19:18. 40Wila̱ u Musa ra̱ka̱ n Atagarda e Eneki ta punu i a̱ ubuta̱ u wila̱ u re u nam pa.”

Keci adama a̱ Kishi

(Mar. 12:35-37; Luk. 20:41-44)

41Ana Afarishi a i biꞋi lo, ɗa Yesu we ecei le, 42“Yi ɗa̱i kusheshe ku ɗa̱ adama a Kishi? Umaci u yayi wi?”

Ɗa a̱ ushuki, “Kishi ka Maku ma Dawuda maꞋa.”

43Ɗaɗa Yesu u danai le, “To yi ɗa̱i i zuwai ɗa Dawuda u ɗekei ni ‘Vuzagbayin’? Ayinviki a̱ Ka̱shile a zuwai Dawuda u dana:

44‘Vuzavaguɗu u danai Vuzagbayin vu va̱:

“Da̱sa̱ngu na usingai u va̱,

ali ayin a na n zuwai irala i nu ɗaka vi idasakpatsu i ene a̱ nu.” ’#Ishp. 110:1.

45“Ana Dawuda u ɗekei ni Vuzagbayin, nini ɗai kpamu u kokpo maku ma̱ ni feu?” 46Vuza u fuɗa wu ushuku ba. Ana ka nan lo ko kotsoi, vuza u doku u yaꞋan utsura u ka̱ɗu ali u yaꞋanka yi keci ku yoku ba.

Currently Selected:

Matiyu 22: asgNT

Highlight

Copy