Matiyu 12

Yesu ɗa Vuzagbayin va Ashibi

(Mar. 2:23-28; Luk. 6:1-5)

1A kanna ka Ashibi† ko yoku, Yesu a kupasamgbanai a kashina ka̱ ya̱nji, ɗa kambulu ka̱ ka̱na̱i mukumitoni ma. Ɗa a̱ ka̱na̱i kukoɗo ya̱nji ya n a kupai. 2Ana Afarishi† e enei nannai, ɗa a danai Yesu, “U yotso mukumitoni n nu n yaꞋan nannai ba! Wila̱ u sa̱nka̱ ta̱ kuyaꞋan vikyaꞋa a kanna ka Ashibi.”

3Ɗa Yesu wu ushuki, “A̱ɗa̱ i kece ili i na Dawuda u yaꞋin n uma a̱ ni a ayin a na kambulu ka̱ ka̱na̱i le ba? 4U uwai a kpaꞋa ku Ka̱shile ɗa u takumai burodi vi ciɗa n uma a̱ ni, ko a na Wila̱ u sa̱nka̱i a takuma vu ɗa. Anan ganu† a ɗa koci e nekei utsura a takuma burodi vu nan lo.#1 Sam. 21:1-6. 5A̱ɗa̱ i kece a̱ Wila̱† u Musa a na a̱ ka̱sa̱kpa̱i anan ganu a yaꞋan ulinga a̱ A̱Ꞌisa̱ a Gbayin a kanna ka Ashibi ba? Amma ko vuza u dana o koɗo ta̱ wila̱ wa Ashibi ba. 6N dana ɗa̱, vuza wi ta̱ na vuza na u laꞋi A̱Ꞌisa̱ a Gbayin m gbayin! 7Amma yi ishi a̱ kilukpa̱ aza a̱ unushi ba, ishi baci i yeve ili i na Katagarda ka Ciɗa ka nam pa ki a kudansa, ‘A na ya yaꞋanka mu alyuka, n laꞋa ta̱ n kuciga i pana asuvayali a i toku i ɗa̱.’ 8Adama a na Mpa ɗa Vuzagbayin va Ashibi.”

Yesu u potsokpoi kukiye ku vuza

(Mar. 3:1-6; Luk. 6:6-11)

9Yesu u ɗenga̱i ɗa u banai a̱ kunu ka avasa† ku na ki lo ɗevu. 10Ana u yawai, ɗa u cinai vuma vi yoku kukiye uɓishi. Afarishi i ta̱ a̱ kula̱nsa̱ unushi u na a̱ kuka̱na̱ka̱ Yesu, ɗa e ecei ni, “Derere ɗa o potsokpo vuza a kanna ka Ashibi?”

11Ɗa wu ushuki, “Vi baci m malala, ɗa ma ma̱ yikpa̱i a kayinva a kanna ka Ashibi, vi a kubana vu uta̱ka̱ m maꞋa ba? Mayun, vi ta̱ a̱ kuta̱ka̱ m maꞋa. 12Uma a laꞋa ta̱ nlala, adama a nannai u gaꞋan ta̱ a yaꞋan kasingai a kanna ka Ashibi.”

13Ɗa Yesu u danai vuma va, “Ba̱ra̱kpa̱ kukiye ku nu.” Ɗa ta na u ba̱ra̱kpa̱i kukiye ka, ɗa ku ɗa ku potsoi ku bonoi mayin uteku u na kukiye ku na ku buwai va ki. 14Ɗa Afarishi a lazai a banai o ɓolomgbonoi, ɗa e sheshei tsu na a kuna Yesu.

Yesu kagbashi ku uzagbi ka̱ Ka̱shile

15Yesu u yeve ta̱ ili i na Afarishi i a kuyaꞋan, ɗa u ka̱sa̱kpa̱i ubuta̱ u nan lo wa. Ɗa uma n a̱bunda̱i o tonoi ni, ɗa u potsokpoi aza a na i nu mbanaki ra̱ka̱. 16Amma u kushei uma a ka̱ta̱ a dana ko ili i na wi a kuyaꞋansa ba. 17U yaꞋan ta̱ nahannai adama a na u zuwa ili i na Ka̱shile ka danai una̱ u keneki Ishaya yo okpo mayun:

18“Na va kagbashi ka̱ va̱ kaꞋa ka na n zagbai.

N ciga yi ta̱, a̱yi kpamu u zuwa ta̱ ka̱ɗu ka̱ va̱ ka pana uyoꞋo.

Mi ta̱ a kuzuwa Ayinviki a̱ va̱ wa̱ ni,

ka̱ta̱ u dana uma ra̱ka̱ mi ta̱ a kuyaꞋanka le ili derere.

19U kuyaꞋan kanananai ko wo orukpo ba,

ko u yaꞋan kadanshi n kacaꞋa a uye ba.

20U kukoɗo mita̱ ma na ma̱ ka̱nza̱i ba,

ko u kima̱ ma̱kuni ma na mi a̱ kukuwa̱ ba.

Wi ta̱ a kulyaꞋa kelime nannai sapu ili i derere i nam pa i lyaꞋa utsura wi ili i kavama.

21Uma a aduniyan ra̱ka̱ i ta̱ e kukeɗe a̱pa̱Ꞌa̱ wa̱ ni.”#Ish. 42:1-4.

Yesu m mogono ma̱ wunla̱i u gbani-gbani

(Mar. 3:20-30; Luk. 11:14-23)

22Ɗa uma o yoku a̱ tuka̱i Yesu n vuma vi yoku ka̱yimba̱ ɗa kpamu wi kebebe, adama a na wi ta̱ n wunla̱i u gbani-gbani. Ɗa u potsokpoi vuma va ali ɗa u fuɗai u dansai ɗa kpamu we enei. 23Uma ra̱ka̱ a yaꞋin mereve, ɗa a danai, “U gaꞋan ba vuma vu nam pa va Maku ma Dawuda maꞋa, Kirisiti Kishi!”

24Ana Afarishi a panai nannai, ɗa a danai, “Wi ta̱ o kuloko wunla̱i u gbani-gbani adama a na mogono me le, BaꞋalzabu,† a̱yi ɗa u nekei ni utsura u yaꞋan nannai.”

25Yesu u yeve ta̱ ili i na i e kusheshe, ɗa u danai le, “Iɗika i na de dem i pecei ugboku u re a̱ vishili uteku u le, i ɗa i kuyaꞋan megeshe ba. Likuci ko kpaꞋa ku na baci ku pecei ka̱ci ka̱ ni ugboku u re a̱ vishili uteku u le, yi ta̱ a̱ kuyikpa̱. 26MalyaꞋi mi baci o kuloko MalyaꞋi, ashe tsugono tsu MalyaꞋi ci ta̱ upeci ɗe, tsu ɗa ci ta̱ kpamu a̱ kuyikpa̱ babu megeshe. 27I danai mi ta̱ o kuloko wunla̱i u gbani-gbani adama a na BaꞋalzabu u neke mu ta̱ utsura n yaꞋan nannai. To, yayi u nekei aza o kutoni a̱ ɗa̱ utsura u na o loko le feu? Aza o kutoni a nan lo o tsu loko le n utsura u BaꞋalzabu ba, adama a nannai, i ta̱ o kuyotsongu an yi a kudansa derere ba. 28Amma mi baci o kuloko wunla̱i u gbani-gbani n utsura wa Ayinviki a̱ Ka̱shile, ashe tsugono tsu Ka̱shile ci yawa ta̱ ɗe wa̱ ɗa̱.

29“Vuza wi baci a kuciga kuꞋuwa a kpaꞋa ku vuza vu utsura ka̱ta̱ u boko ili i ni, sai u shiya vuza vu utsura va biꞋi. Ayin a nan lo u yeve u boko ili i kpaꞋa ya.

30“Vuza na baci wi a̱ kuɓa̱nka̱ mu ba, wi ta̱ a tsurala nu mpa. Vuza na baci kpamu u iwain kuyaꞋan ulinga nu mpa, mayun wi ta̱ a tsurala nu mpa. 31Adama a nannai n dana ɗa̱, Ka̱shile ki ta̱ a kucinukpaka uma a na a yaꞋankai itoku i le unushi, ali n aza a na a dansai kadanshi ki ishikushi† u Ka̱shile. Amma Ka̱shile ka kucinukpaka vuza na u dansai kadanshi ki ishikushi a kubana wa Ayinviki a̱ Ka̱shile ba. 32Ka̱shile ki ta̱ a kucinukpaka vuza na u yaꞋin kadanshi ka kavama wa̱ va̱, Maku ma Vuma.† Amma Ka̱shile ka cinukpaka vuza na u dansai ili i kavama wa Ayinviki a̱ Ka̱shile ba, ko n gogo na ko n ayin a̱ kuta̱wa̱.”

Maɗanga n umaci u ni

(Luk. 6:43-45)

33Yesu u lyaꞋi kelime ɗa u danai, “Vi ta̱ a kufuɗa vi yeve maɗanga a̱ ubuta̱ wu umaci u ni. Maɗanga ma singai ma tsu matsa ta̱ umaci u singai koci, maɗanga ma gbani-gbani kpamu ma tsu matsa ta̱ umaci u gbani-gbani. 34A̱ɗa̱ agbaturu! Uma a gbani-gbani a ɗa yi, nini ɗai i kudansa kasingai? Una̱ u tsu dansa ta̱ ili i na yi punu a̱ ka̱ɗu. 35Uma a singai i ta̱ n ili i singai a̱ a̱ɗu e le, adama a nannai a tsu dansa ta̱ ili i singai. Amma uma a gbani-gbani i ta̱ n ili i gbani-gbani a̱ɗu e le, ɗaɗa i zuwai ɗa a tsu dansa i ɗa. 36N dana ɗa̱, a kanna ka afada, sai i dana kadanshi ka kavama ka na i yaꞋansai dem. 37Adama a na i dansa baci ili i singai, Ka̱shile ki ta̱ a kudana a̱ɗa̱ yi n unushi ba. Amma i dansa baci i gbani-gbani, wi ta̱ a̱ kilukpa̱ ɗa̱.”

Uma e ecei ili i mereve

(Mar. 8:11-12; Luk. 11:29-32)

38Kanna ke te, nlum n Wila̱ n yoku n Afarishi a banai wa̱ ni, ɗa a danai, “Malum, ci ciga ta̱ vi yaꞋan ili i mereve† i na i kokpo urotu u na vu uta̱i a̱ Ka̱shile.”

39Ɗa wu ushuki, “I ciga ta̱ ye ene urotu adama a na uma a kawasasa a ɗa yi, n aza a gbani-gbani! Amma urotu u na i kuciya̱ koci u ɗaɗa urotu u keneki Yunusa.† 40Yunusa u yongo ta̱ a̱ ka̱tsuma̱ ka kadan ka gbayin ali ayin a tatsu kanna n kayin. Ta feu nannai, mpa Maku ma Vuma mi ta̱ o kuyongo a kasaun ali ayin a tatsu kanna n kayin. 41A kanna ka afada, uma a Niniva† i ta̱ a kushamgba ka̱ta̱ a̱ ilukpa̱ ɗa̱, adama a na ele a̱ shika̱ ta̱ unushi† u le a ayin a na Yunusa u danai le kadanshi ka̱ Ka̱shile. Amma gogo na vuza na u laꞋi Yunusa wi ta̱ na. 42Mogono ma vuka me Sheba mi ta̱ a kushamgba ka̱ta̱ wi ilukpa̱ ɗa̱, adama a na wu uta̱ ta̱ a uteku wi iɗika u ciya̱ u panaka Sulemanu.† Gogo na kpamu vuza na u laꞋi Sulemanu wi ta̱ na.”

Uboni u wunla̱i u gbani-gbani

(Luk. 11:24-26)

43Yesu u lyaꞋi kelime ɗa u danai, “Wunla̱i u gbani-gbani† wu uta̱ baci u vuma, u tsu ka̱ra̱Ꞌa̱sa̱ ta̱ a̱ ubuta̱ u ɗekpu a̱ kula̱nsa̱ ubuta̱ u na u kuvuka, amma u kuciya̱ ubuta̱ ba. 44Ka̱ta̱ ta na u dana, ‘Mi ta̱ o kubono a kpaꞋa ku na mu uta̱i.’ Ana u bonoi, ɗa u cinai kpaꞋa ka lekeɗi. Ɗa u cinai ku ɗa upura̱ngi n wadani mayin. 45Ka̱ta̱ u bana u banuku wunla̱i u gbani-gbani u yoku ali u cindere aza a na a laꞋi ni n utsura, ka̱ta̱ a uwa punu u vuma va o yongo. Ka̱ta̱ vuma va u uwa atakaci a na a lyaꞋi biꞋi a cau. Ili i nam pa ya i ɗaɗa i kucina uma o gogo na a nam pa.”

Amgbu e Yesu n a̱na̱ku e le

(Mar. 3:31-35; Luk. 8:19-21)

46Yesu biꞋi a kadanshi n uma, ɗa amgbu a̱ ni n a̱na̱ku a yawai. Ɗa a shamgbai pulai, ɗa o folonoi a yaꞋan kadanshi n a̱yi. 47Ɗa vuza yoku u danai ni, “A̱na̱vu n amgbu a̱ nu i ta̱ ɗe a kuvana wu pulai, a ciga ta̱ kuyaꞋan kadanshi n avu.”

48Ɗa wu ushuki, “Yayi a̱na̱ku a̱ va̱? Anan yayi kpamu amgbu a̱ va̱?” 49Ɗa u sapangi aza o kutoni a̱ ni ɗa u danai, “Na va ele ɗa a̱na̱ku a̱ va̱ n amgbu a̱ va̱. 50Vuza na baci de dem u panakai Esheku a̱ va̱ a na i gaɗi, a̱yi ɗa vangu vu va̱ n a̱na̱ku a̱ va.”

Currently Selected:

Matiyu 12: asgNT

Highlight

Copy