Yahaya 18
18
A̱ ka̱na̱i Yesu
(Mat. 26:47-56; Mar. 14:43-50; Luk. 22:47-53)
1Ana Yesu u kotsoi kuyaꞋan kavasa, ɗa u lazai koɓolo m mukumitoni n ni ɗa a pasai Ka̱ra̱Ꞌa̱ ko Kidiron. Ɗa a yawai a̱ ubuta̱ u na wi nu nɗanga n zaitun† n a̱bunda̱i ɗa u uwai punu. 2A tsu bansa ta̱ ɗe ayin n a̱bunda̱i, adama a nan lo a ɗa Yahuza, vuza a na u dengei ni, ɗa u yevei ubuta̱ u na i. 3Anan ganu vu gbagbaꞋin n Afarishi a̱ suki aza a kindi ka̱ A̱Ꞌisa̱ a Gbayin o yoku o soku Yahuza koɓolo n ugboku wa̱ osoji o Roma. Uma a nam pa kpamu i ta̱ a̱ kuɓa̱na̱ ili i munaka, nu nkuni ma akina, n a̱va̱sa̱. Ɗa Yahuza u tonoi n ele sai a̱ ubuta̱ u na Yesu wi.
4Yesu u yeve ta̱ ili dem i na i kucina yi, ɗa wu uta̱i ɗa we ecei le, “Yayi yi a̱ kula̱nsa̱?”
5Ɗa a̱ ushuki, “Yesu vu Nazara.”
U danai le, “Mpa ɗa Yesu va!” (Yahuza vuza na u shirikpa̱ka̱i Yesu kucina̱, wi ta̱ lo kashani koɓolo n ele.) 6Ana u danai le, “Mpa ɗa Yesu va,” ɗa o bonoi n ka̱ca̱pa̱ ɗa a̱ yikpa̱i a iɗika adama o wovon.
7We ecei le kpamu, “Yayi yi a̱ kula̱nsa̱?”
Ɗa a̱ ushuki, “Yesu vu Nazara.”
8Wu ushuki, “N dana ta̱ ɗe a na mpa ɗa Yesu va. Mpa ɗa baci yi a̱ kula̱nsa̱, yaꞋan mukumitoni n va̱ n laza.” 9Ili i nam pa i yaꞋan ta̱ nannai adama a na kadanshi ka na u yaꞋin ɗe ka yaꞋan mayun: “N zuwa ko vuza te a̱ ka̱tsuma̱ ka aza a na vi nekei mu u puwa̱nka̱ ba.”#Yah. 6:39; 17:12.
10Ɗaɗa Sima Biturusu u talai kotokobi ka̱ ni ɗaɗa u kapai kutsuvu ku usingai ku kagbashi ko mogono ma anan ganu. (Kula ku kagbashi ka ku ɗaɗa Makusu.) 11Yesu u danai Biturusu, “Bonoko n kotokobi ka̱ nu a iven. Vi sheshe ta̱ mi a kufuɗa kusoꞋo atakaci tsu na Dada u foɓusoi ba?”
A bankai Yesu u Hanana
(Mat. 26:57-58; Mar. 14:53-54; Luk. 22:54)
12Kovonshi† vu Roma, n osoji a̱ ni, n aza a kindi ka̱ A̱Ꞌisa̱ a̱ ka̱na̱i Yesu ɗa a shiyai ni. 13A̱ gita̱i kubanka yi biꞋi u Hanana, esheku a vuka vu Kayafa, vuza na wi mogono ma anan ganu a̱ ka̱ya̱ ka nan lo. 14Kayafa ɗa vuza na ayin o yoku u danai aza e kelime a Ayahuda, “U laꞋa ta̱ n kugaꞋan vuma vi te u kuwa̱#Yah. 11:50. adama a uma a na a buwai a yaꞋan wuma.”
Biturusu u nanai Yesu
(Mat. 26:69-70; Mar. 14:66-68; Luk. 22:55-57)
15Sima Biturusu m makumitoni mo yoku o tonoi Yesu. Makumitoni ma me yeve ta̱ mogono ma anan ganu ma, ɗa u banai n Yesu a ulanga u mogono wa. 16Amma ɗa Biturusu u vanai le pulai ɗevu n utsutsu. Amma ɗa makumitoni ma mo bonoi ma yaꞋankai kagbashi ke mekere ka na ki a̱ utsutsu wa kadanshi. Ɗa u ka̱sa̱kpa̱i Biturusu u uwa, 17amma ɗa we ecei ni, “Avu vuza kutoni vi Yesu ɗa, ko ta nannai ba?”
Ɗa Biturusu wu ushuki, “A̱Ꞌa̱, mpa ɗa ba!”
18U yaꞋan ta̱ uta̱ni, ɗaɗa agbashi koɓolo n aza a kindi ka̱ A̱Ꞌisa̱ a Gbayin a tasuki akina. Ele a kunyashika akina a, ɗa Biturusu u banai u shamgbai ɗevu adama a na u nyashika feu.
Mogono ma anan ganu me ecei Yesu
(Mat. 26:59-66; Mar. 14:55-64; Luk. 22:66-71)
19Mogono ma anan ganu me eceshei Yesu ukuna u mukumitoni n ni n kuyotsongusu ku ni. 20Ɗa Yesu wu ushuki, “N ci yaꞋan ta̱ kadanshi e keteshe adama a na yaba dem u pana. N yaꞋansa ta̱ kuyotsongusu a̱ unu a avasa n A̱Ꞌisa̱ a Gbayin, a̱ ubuta̱ u na Ayahuda ra̱ka̱ o ɓolongi. N tsu dansa ili usokongi ba. 21Yi ɗa̱i i zuwai ɗa yi e kece mu ili tsu nam pa? Ecei uma a na a panai kuyotsongusu ku va̱. E yeve ta̱ ili i na n danai.”
22Ana Yesu u danai nannai, kindi ka̱ A̱Ꞌisa̱ ko yoku ka ɓasai ni a maguji ɗa u danai, “Avu ɗa vi ci yaꞋan ya ali vu dansa nannai u mogono ma anan ganu?”
23Ɗa Yesu wu ushuki ni, “N dana baci ili i na Wila̱ u danai derere ba, ka̱ta̱ i yotsongu uteku u na i ɗa yi. Amma ili i na n danai mayun ɗa baci, yi ɗa̱i i zuwai ɗa i ɓasai mu?”
24Yesu biꞋi ushiyi, ɗa Hanana u suki a banka yi u Kayafa, mogono ma anan ganu.
Biturusu u doki u nanai Yesu
25Ana ili i na nam pa yi a kuyaꞋan nannai punu, Sima Biturusu lo kashani ɗevu a kunyashika akina. Ɗa aza o yoku a na i lo feu a̱ ubuta̱ wa akina wa ɗa e ecei ni, “Avu vuza vu kutoni vi Yesu ɗa, ko ta nannai ba?”
Amma ɗa Biturusu u nanai kaꞋa, ɗa u danai, “A̱Ꞌa̱, mpa ɗa ba!”
26Kagbashi ko yoku ko mogono ma anan ganu lo feu a̱ ubuta̱ wa akina wa. A̱yi ɗa toku vu vuza na Biturusu u kapai kutsuvu. Ɗa u danai, “Me ene wu ta̱ a̱ ubuta̱ wu nɗanga n zaitun ma, ko ta nannai ba?”
27Ɗa kpamu Biturusu u nanai kaꞋa, gogoꞋo va lo ta na ɗa motoku ma salai.
A bankai Yesu u Bilatu
(Mat. 27:1-2, 11-14; Mar. 15:1-5; Luk. 23:1-5)
28Kayafa u kotsoi kuyaꞋanka Yesu afada kafu ubuta̱ wa akana. Ɗaɗa a ɗikai ni a bankai u Bilatu† gomuna punu o tsugono tsu Roma. Amma ɗa Ayahuda a shamgbai pulai a kuvana. Ishi baci vuza yoku vi le u uwa punu asuvu, wi ishi o kokpo n unata ka̱ta̱ Wila̱ u sa̱nka̱ yi kuyaꞋan Ka̱ɗiva̱ ka Kupasamgbanai. 29Ɗa Bilatu wu uta̱i pulai we ele ɗa we ecei, “Yi ɗa̱i yi a kushikaka vuma vu nam pa?”
30Ɗa a̱ ushuki, “Ishi baci vuma vu nam pa vuza kuyaꞋan kawuya ɗa ba, ci ishi a̱ kutuka̱ yi wa̱ nu ba.”
31Ɗa u danai le, “A̱ɗa̱ a̱ ka̱ci ka̱ ɗa̱ ɗikai ni i yaꞋanka yi afada tsu na Wila̱ u ɗa̱ u danai a yaꞋanka yi.”
Ɗa a iwain, “A̱ɗa̱ aza o Roma i tsu ka̱sa̱kpa̱ tsu tsu zuwa a una vuza ba.” 32Ili i na a danai i yotsongu ta̱ tsu na Yesu u danai uteku u na u kukuwa̱ yo okpo ta̱ mayun.
33Ɗa u bonoi e kefeku, ɗa u ɗekei Yesu ɗa we ecei ni, “Avu ɗa mogono ma Ayahuda ma?”
34Ɗa Yesu wu ushuki, “Keci ku nu ku ɗa na lo, ko aza o yoku a dana wu ta̱ ukuna u va̱?”
35Ɗa Bilatu wu ushuki, “Vi yeve ta̱ mpa Kayahuda kaꞋa ba! Aza a̱ nu a ɗa koɓolo n anan ganu vu gbagbaꞋin a ɗa aza a na e nekei mu avu. Yi ɗa̱i vi yaꞋin?”
36Ɗa wu ushuki, “Tsugono tsu va̱ tsa aduniyan tsu ɗa ba. Ishi baci tsa a aduniyan tsu ɗa, agbashi a̱ va̱ ishi a̱ kushilika̱ ka̱ta̱ e neke mu wa aza e kelime a Ayahuda ba. Mpa mi uteku u na ngono ma a aduniyan n ci lyaꞋa tsugono ci le ba.”
37Ɗa we ecei ni, “Avu mogono maꞋa, ko ta nannai ba?”
Ɗa Yesu wu ushuki, “A̱ɗa̱ ɗa i danai mpa mogono maꞋa, mayun ɗa kpamu. I ɗaɗa i zuwai ɗa a matsai mu n ta̱wa̱ punu a aduniyan adama a na n dana ili i mayun. Yaba dem vu na baci kpamu wu ushuki n ili i mayun u tsu panaka mu ta̱.”
38Ɗa we ecei ni, “Yi ɗa̱i yi i mayun?”
A kiɗakai Yesu afada a̱ ukpa̱
(Mat. 27:15-31; Mar. 15:6-20; Luk. 23:13-25)
Ana Bilatu u danai nannai, ɗa wu uta̱i u banai wa Ayahuda ɗa u danai le, “Vuma vu nam pa u yaꞋan ili i na i yawai a una yi ba. 39A̱ɗa̱ i yeve ta̱ mpa n tsu zuwa ta̱ a shikpa vuza vu ugbashi a ayin a̱ Ka̱ɗiva̱ ka Kupasamgbanai. I ciga ta̱ n zuwa a shikpa ‘mogono ma Ayahuda ma’?”
40Ɗa o orukpoi, “A̱Ꞌa̱, a̱yi ba! Amma ci ciga ta̱ Barabas.” (Barabas ta na vuza vu ma̱ga̱la̱ka̱ ɗa.)
Currently Selected:
Yahaya 18: asgNT
Highlight
Share
Copy
Want to have your highlights saved across all your devices? Sign up or sign in
© 2012 Wycliffe Bible Translators, Inc. All rights reserved