Lucas 3

Sat Nantudtuduwan Juan Un Mambubunyag

(Mateo 3:1-12; Marcos 1:1-8; Juan 1:19-28)

1Lummabas piga’n tawon, ot utdit maikagwampuḻu’t lima’n tawon un man-apuwan Tiberios un Emperador ud Roma, si Poncio Pilato ud gubinnadul Judea, si Herodes#3:1 Siya si Herodes Antipas un osan anak Herodes un Mabigbigbig. ud mangiyapu utdin Galilea ot si sunud na un Felipe dit mangiyapu utdin sakup Iturea kan Traconite ot si Lisanias ud mangiyapu ud Abilene. 2Sada Anas kan Caifas dat kangattuwana ap-apun dat papadi.

Utdiya timpu inggaw imbagan Apudyus kan Juan un anak Zacarias sidit iniinggawana’t dit igawa maid tagtaguwanna. 3Kad sidiyon dinakdak na dat kailin-ili utdin nampaigid Jordan un nanudtudu un kanana’n,

“Mandadaoli kayu kan igongda yuwon dat basuḻ yu ot mampabunyag kayu daḻapnu pakawanon dikayu kan Apudyus.”

4Si Juan dit ug-ugudon Isaias un propetan Apudyus sit iblu na un kanana’n,

“Awad tagu’t dit igawa maid tagtagguwan na un mampappakuya kanana’n, ‘Isagana yu dit daḻan dit Apu. Manggodngon yu dit daḻan un ayona.

5Tab-unan yu dat nadaḻom ot lenadon yu dat kuntug kan bateled. Manggodngon yu dat daḻana nakelu kan lenadon yu dan nampabikakung.

6Ot losana tagu maila da dit mantatagun Apudyus sidat tagu!’ ”

7Utdi, aduadu dat tagu’n ummoy kan Juan daḻapnu pabunyag da kan siya yoong kinnanana kan dida un, “Dikayu’n ganak di uḻog!#3:7 Piyaona’n ugudon nasikap da un kama’t dan uḻog. Singngadan nat nangibaga kan dikayu un, mampabunyag kayu daḻapnu maligligan yu dit dumatonga mandusaan Apudyus? 8Masapula ipaila yu utdan angwat yu un tuttuwa’n mandadaoliyan yu dat basuḻ yu. Adiyu kanana mailisi kayu utnat kanan yu un, ‘Ulay ta kaganakan dikami kan Abraham.’ Ta tuttuwa tu un ibagak kan dikayu un mabalin Apudyus mangwa’t kaganakan Abraham sidatu’n batu. 9Sat manusaan Apudyus kan dikayu maiyalig si wasay un maibibiyada maipokpok sit pong-ad dit kayu. Ot losana kayu un adi mamunga’t napiya mapokpok asi maidawat sin apuy.”

10Ot sadat tagu inimus da un, “Ngad nat koon mi nu?”

11Ot summungbat si Juan un, “Sat tagu’n awad si duwa ut badut itdona dit osa’t dit maid si badut. Padana’t dit kawadan di makan masapula ibingayana dit maid si kanon.”

12Inggaw da pay man-uuḻup si bugis un ummoy nampabunyag kan siya ot inimus da un, “Mistulu ngad nat koon mi?”

13Summungbata kanana’n, “Sat gagangaya mabayadana lawa ud uḻupon yu.”

14Inggaw da pay suldadu’n nangimus kan siya un, “Dikami nu, ngadan nat koon mi?” Kinnanana kan dida un, “Adi kayu mangog-ogyat onnu man-ipabasuḻa lawa dalapnu maala yu dan pilak dan udum. Mapnok kayuwon sinat tangdan yu.”

15Ot gaputa taḻona uuwayon dat tagu dit naisapata un Kristu, kanan daon sit somsomok da nu si Juan dit Kristu. 16Yoong imbagan Juan kan dida un, “Bunyagok dikayu si danum yoong awad osa un taḻona nangatu nu sakon ot adiyak pay maibilanga mangussag sit sandalyas na. Bunyagon dikayu si Ispiritu Santu kan apuy. 17Siya’d manguis sidan tagu ot maiyalig si tagu’n nakaaggom si igau un mantopa’t ilik. Aminona’n topaan asina iyaḻang dat nabgas ot aminona’n idawat dat nakupaw sit apuya adi makmaksop.”

18Adu pay dat uduma intudtudun Juan sidat tagu utdit man-iwalagawagana’t dit Nabaḻu’n Damag. 19Sinuḻasuḻagana pay si ali Herodes maipagapu’t dit nangasaw-ana kan Herodias un asawan dit sunud na kan osa pay adu dat lawenga kingkingwana. 20Yoong am-amodot un laweng dit kingwan Herodes ta paimbaḻud na si Juan.

Sat Nampabunyagan Jesus

(Mateo 3:13-17; Marcos 1:9-11)

21Utdiya timpu un mamunbunyagan Juan sidat tagu, ummoy pay si Jesus nampabunyag kan siya. Ot utdiya manlulluwaḻuwan Jesus un nabunyagan, nambukat din langit. 22Ot dummoba si Ispiritu Santu un kama si kalupati un inumpa kan siya. Inggaw ginga’n nanligwat un kanana’n, “Sika ud pipiyaoka Anak ku un taḻona masmas-omak.”

Sadat Ginnapuwan Jesus

(Mateo 1:1-17)

23Umoya tuḻumpuḻu’n dagun Jesus sidit inlugi na un nansuḻu. Ot imbilang dat tagu un anak ud Jose un anak Eli. 24Sat Eli, anak Matat, un anak Levi, un anak Melki, un anak Jane, un anak Jose. 25Sat Jose, anak Matatias, un anak Amos, un anak Nahum, un anak Esli, un anak Nage. 26Sat Nage, anak Maat, un anak Matatias, un anak Semei, un anak Jose, un anak Juda. 27Sat Juda, anak Joana, un anak Resa, un anak Zorobabel, un anak Sealtiel, un anak Neri. 28Sat Neri, anak Melki, un anak Adi, un anak Cosam, un anak Elmadam, un anak Er. 29Sat Er, anak Josue, un anak Eliezer, un anak Jorim, un anak Matat, un anak Levi. 30Sat Levi, anak Simeon, un anak Juda, un anak Jose, un anak Jonan, un anak Eliakim. 31Sat Eliakim, anak Melea, un anak Mena, un anak Matata, un anak Natan, un anak David. 32Sat David, anak Jesse, un anak Obed, un anak Boaz, un anak Salmon, un anak Naason. 33Sat Naason, anak Aminadab, un anak Armi, un anak Arni, un anak Esron, un anak Fares, un anak Juda. 34Sat Juda, anak Jacob, un anak Isaac, un anak Abraham, un anak Tare, un anak Nacor. 35Sat Nacor, anak Serug, un anak Ragau, un anak Peleg, un anak Heber, un anak Selah. 36Sat Selah, anak Cainan, un anak Arfaxad, un anak Sem, un anak Noe, un anak Lamec. 37Sat Lamec, anak Matusalem, un anak Enoc, un anak Jared, un anak Mahalaleel, un anak Cainan. 38Sat Cainan, anak Enos, un anak Set, un anak Adan un anak Apudyus.

Currently Selected:

Lucas 3: kmk

Highlight

Copy