Mariko 13

Okwonoonebwa okw'eisinzizo

(Mat 24:1-2; Luk 21:5-6)

1Agho bwe yali ng'ava mu isinzizo, mulala ku Beegeresebwa be yaamukoba ati: “Mwegeresa bona amabaale amalungi n'ebizimbe ebirungi!”

2Yesu yaamwiramu ati: “Tobona gazimbe ago? Tighaliba ibaale lirisigala ku liinaalyo nga tirisuuliibwa ghansi.”

Okwinhama okw'ebibonoobono

(Mat 24:3-14; Luk 21:7-19)

3Bwe yali ng'atyaime ku Lusozi olw'Emiti Emyoliva, ng'olingiriire eisinzizo, Petero ni Yakobo ni Yoanne n'Anderea baamubuuza nga bali bonka, bati: 4“Tukobere, ebyo biribaagho li, ate era kamanhiso ki akalitumanhisa nga bino byonabyona biri kumpi okutuukirira?”

5Agho Yesu yainhama okubakoba ati: “Mwekuume ghalobe kubaagho abaghabya. 6Abantu kamaala baliidha mu liina lyange nga bakoba bati, ‘Ni nze’, era balighabya abantu kamaala. 7Aye bwe muwuliranga ku ntalo ghano ni ghale, mutatyanga ebyo biri n'okubaagho, aye ng'enkomerero ekaali. 8Eighanga lirirumba liinaalyo n'obwakyabazinga bulirumba bwinaabwo. Ghalibaagho musisi mu biketezo kamaala, ghaabaagho n'endhala; okwo n'okwinhama okw'ebibonoobono.

9“Imwe beene mwekuume baidha kubatwala mu mbuga, baidha kubakubira mu sinagoga era balibasimba mu maiso ag'abafuzi ni bakyabazinga nga babalanga nze, mube abadhulizi mu abo.#Mat 10:17-20; Luk 12:11-12 10Kuba Amawulire Amalungi gali n'okukoberwa amaghanga goonagoona.

11“Ate bwe babagemanga ni babaghaayo muteraliikiriranga kya kwogera, aye ekinaabagheebwanga mu saawa yeene eyo kye munaakobanga. Kuba ti niimwe aboogera aye Mwoyo Mutukuvu. 12Omuntu alighaayo muganda we okwitibwa, lata w'omwana alighaayo omwana, era abaana balidheemera ababazaala, baabaita. 13Abantu boonaboona balibakyagha olw'eriina lyange. Aye aliguma okutuuka ku nkomerero n'alirokolebwa.#Mat 10:22

Ekyenhinhalwa Ekizikiriza

(Mat 24:15-28; Luk 21:20-24)

14“Aye bwe mulibona Ekyenhinhalwa Ekizikiriza#13:14 Ekyenhinhalwa Ekizikiriza: Ekifaananie eky'omusambwa ogw'abamaghanga agandi ekyateebwagho mu isinzizo mu Yerusalemu. nga kiri ghe kitagwaine kuba, olwo oyo asoma bino ategeeranga, era abali mu Buyudaaya balumukiranga mu nsozi.#Dan 9:27; 11:31; 12:11 15Oyo ali ghaigulu ku ndhu ataikanga, waire okungira mu ndhu okutoolamu ekintu kyonakyona.#Luk 17:31 16Era oyo aliba mu nimiro atairanga ka kunona kivaalo kye. 17Abalinda n'abayonsa, mu nnaku edho, nga bakagwireku! 18Musabe Katonda bino birobe kubaagho mu biseera bya kiinhogogo.

19“Kuba mu nnaku edho mulibaamu ebibonoobono ebitabangaghooku okuva Katonda lwe yatonda ebitonde n'okutuusa mperaano, era ebitalibaagho.#Dan 12:1; Kwol 7:14 20Era nguli Musengwa tiyakendeeza ku nnaku edho, ghazira muntu yandiwonie. Aye ku lw'abalonde, be yalonda, yakendeeza ku nnaku edho.

21“Agho ni, bweghabaagho abakoba ati, ‘Bona, Kurisito wuuno’, oba ati, ‘Wuule’, mutaikirizanga 22kuba ghaliidhagho abeeyeta Kurisito n'abeeyeta abalanzi, baakola obumanhiso n'ebyewuunhio nga benda kuwubania abalondemu bwe kiba kisoboka. 23Aye imwe mwekuume, mbakobeire byonabyona nga bukaali.

Okutuuka kw'Omwana w'Omuntu

(Mat 24:29-31; Luk 21:25-28)

24“Mu nnaku edho ng'okudaagadaaga kuwoire, endhuba erizikira n'omwezi gwaloba kwaka,#Isa 13:10; Ezek 32:7; Yoe 2:10, 31; 3:15; Kwol 6:12 25emuunienie dhirimagalika okuva mu igulu n'amaani ag'omu igulu galitengeesebwa;#Isa 34:4; Yoe 2:10; Kwol 6:13 26ng'olwo ni babona Omwana ow'Omuntu ng'aidhira mu bire n'amaani amangi n'ekitiisa.#Dan 7:13; Kwol 1:7 27Agho ng'atuma bamalaika nga basoloza abalonde be okuva mu mpewo eina, okuva ensi y'ekoma okutuuka eigulu ye likoma.

Ekyegerwa ku muti omutiini

(Mat 24:32-35; Luk 21:29-33)

28“Mwegere ku lufumo olw'omuti omutiini. Ensaga bwe dhiira obuto n'amakaba ni gatoolera okwidha, mumanha muti endoboozi eri kumpi. 29Kale imwe bwe mubonanga ebintu bino nga bibaagho, mumanhanga muti ali kumpi ku lwigi kwene. 30Bwenebwene mbakobera nti ebintu bino byonabyona biribaagho nga n'abantu ab'oluse luno bakaali kuwaagho. 31Eigulu n'ensi biriwaagho aye ebibono byange tibiriwaagho.

Olunaku ni saawa tibimanhiibwa

(Mat 24:36-44)

32“Aye ghazira aidhi lunaku olwo oba saawa ni bwebaakaba bamalaika mu igulu, waire Omwana, okutoolaku Lata.#Mat 24:36 33Mwekuume, mumoge kuba timwidhi kaseera!

34“Kiri ng'omuntu avaagho n'aja eghala, n'aleka amaka ge ng'aghaire abagheereza be obuyinza ate n'emirimo emyawufu buli mugheereza. Era oyo ali ku mulyango n'amulagira okukuumanga.#Luk 12:36-38 35Kale mumoge, kuba timwidhi mwene ghaka gh'atuukira, oba igulo, oba mu bwire ghagati, oba mu nkoko nga dhikolyoka, oba nga bukya! 36Kale bw'abagwaku alobe kubaagaana nga mutendwike. 37Kye nkoba imwe, kye nkoba boonaboona nti mwekuume!”

Currently Selected:

Mariko 13: Sog

Highlight

Copy