Matiu 2
2
Eilep xil lamei tengan lamerere ni Iesu Kristo nggoni suv toto na Siu xil
1Iesu tepot e metimal te hal Betlehem#Luk 2:4-7 xa de provins te hal Sudea, e melele xa Herod xa Mahulong tehe suv toto te provins ak.#Luk 1:5; 3:1 E dutou ni poten na Iesu, rut eilep xil langgo ist e lamei e taon te hal Serusalem. Eilep xil ak langgur kilakilen tengan lipus kil naha xa istal e ut etan nggo suse na hitu xil. 2E melele xa lastal e hal Serusalem, lasis moletin xil labit, “?Tuvava xa tepot be suv toto na Siu xil da xave? Vengan melele xa mateti tamu e ut samem e ist, matepus kokot ni xa hitu nan#Nam 24:17; Mat 2:9 testal. Ve rin ak, mamei taxeak tengan masa merereen mini.”
3Melele xa suv toto Herod xa Mahulong milongeong ni, xi minexo pupu del moletin xil vus te hal Serusalem.#2:3 Herod xa mahulong minexo vengan ien ti tavei tengan moletin ti namei naxolesi, e di mu vin ngan xil xa di lanem usili. Xosxa Herod minemi xa mol‑Isrel xil labit lixolesi e liling suv toto tova nae, ma xi mikila ihu lelen mol‑Isrel xil vus. 4Ma Herod mikes viton vat xil na pris xil del titsa xil te rae na Mosis e misis xil bit, “?Mesaea xa Hi tehit xati mi Siu xil, ipot ingga xave?”
5Xil labit rilomun ni mini labit, “Ipot e metimal te hal Betlehem e provins te hal Sudea, vengan xa Hi tesepin texo tisen na provet tei nan tehit,#Sion 7:42
6 ‘Tave ti neta xa metimal te hal Betlehem be hokorong mak mu ni metimal savsav xil vus na mol‑Sudah xil,
e nisak ni suv toto tei mei istal ixo en.
Xi ilaxat kuh mol‑Isrel xil vus
ixoni moletin tei xa di milaxat kuh sipsip san xil.’” (Maek 5:2)
7Melele xa suv toto Herod xa Mahulong milonge mak, mikes xuxus ni eilep xil ak tengan lamei visali. Di, misis pilei xil tengan lihiteni mini melengien xati vari xa xil latepus rohon ni xa hitu ak testal. 8Di, Herod misil xil labe Betlehem e biteni mi xil bit, “Muha mulang kuhi ni horamue ak. E melele xa mukameti, mutilomun mei muhiteni minou tengan xa inou mun niha nimot mini.”
9-10Melele xa eilep xil ak lalong sepinien na suv toto, laba tengan lalang ni horamue ak. E melele xa di langgusil suse nae laba, hitu#Mat 2:2 xa latepusi tetiamu melele xa lateti tamu e ist mistal rilomun. E melele xa lapus hitu ak, labesi xil pupu. Hitu ak diamu ni xil e ba da kat e rute vari xa horamue ak da en. 11Ma melele xa labe nim, lapus horamue del ninen Meri ludi. E melele xa lapus horamue ak, latingeiril e lasa merereen nae mini. Di, laleh rerat sanien hos nae xil e lasa ni mini. Xil lasa gol, forangkansen, e mir.#2:11 Gol be hat tei xa minehin pupu xa, tetiamu, latepol ni mei tehe mani. Forangkansen e mir lube vokon lu xa lapol ni ni tut vatiei. Mani te xatel vus be nesao e latehe sanien xa momal tengan lasa ni mi suv toto tei. #Luk 2:16; Sam 72:10-11,15; Aes 60:6 12E vongien, Hi misep xol xil nggo metuveen tei xa linatilomun ti mun linave visal Herod. Ma xil langgusil suse sav ladilomun labe tim sae.#Mat 2:22
Hi pol ni suse tengan horamue Iesu ilesae ihe Isip tengan ngan xil xa labit lavasi linatal xati ti
13Melele xa eilep xil ak ladilomun laba, masxaxa tei na Hi Suv mei mistal mi Siosep nggo metuveen tei e biteni mini bit, “!Tamea! !Temanon, hur horamue xal ninen, e mutilesae mutihe Isip! Mutiti rute ak ituxol melele xa inou nihit mutilomun en. Upol ni imak vengan xa, navehi ti, Herod ilang ves horamue ak tengan vahas vini.”#Mat 1:20; 2:19
14Misak ni, e vongien nen tak, Siosep mea po xat horamue e, del ninen, latlesae latbe kantri te hal Isip. 15Latodi rute ak ba duxoh melele xa suv toto Herod xa Mahulong mat. Ngan ak mistal tengan vapol ni sepinien na Hi Suv xa tehit lelen ni texo provet Hosea mei mistal be reitin xa tehit, “Nakes natuxoli tengan imea ra hal Isip.” (Hos 11:1)
16Melele xa Herod minem kila xa eilep xil te hal ist lateluvosi, ien mikat pupu. Ma, misemae ni moletin te vaeen nan xil tengan lihe metimal te hal Betlehem e ut xil mun xa di sangas tengan ha lihas malohos xil ngasen xa huram nae lu e be tan. Herod pol ni mak nggusil melele xati xa eilep xil te hal ist latehiteni mini xa latepus rohon ni hitu ak testal. 17Ngan ak mistal tengan vapol ni sepinien xa Hi Suv tehiteni texo provet Seremaea mei mistal be reitin xa tehit,
18 “Moletin xil te hal Rama # 2:18 Rama be rute tei xa be sangas ni metimal te hal Betlehem, e lanemi labit latetihin Resel, atou na Siekob, en. lalong neta tei,
lalong tangen tei xa nggeih di mistal.
Resel di muis pupu ve horamue nan xil xa lalel.
Ien ti tave tengan moletin ti napet rat nenemien nan,
vengan xa horamue nan xil latovuol mun.” (Ser 31:15)
Hi pol ni suse tengan Iesu itilomun ra kantri te hal Isip
19Melele xa xatel latodi tamu e kantri te hal Isip, Herod xa Mahulong mat. Ma masxaxa tei mei mistal mi Siosep nggo metuveen tei#Mat 1:20; 2:12 20e biteni mini bit, “!Tamea! Utel horamue xal ninen muttilomun mutihe tan na mol‑Isrel xil, vengan xa ngan xil xa latehit lihas vin horamue ak, lalel tuei.”#Eks 4:19 21Ma, Siosep mitamea, del horamue xal ninen latdilomun latbe Isrel.
22E melele xa Siosep milongeong ni xa Arkelaos nggur vonine tamen, Herod xa Mahulong, mei be suv toto te provins te hal Sudea, xi ulin mikan tengan latohe rute ak. E Hi mun mike xati nggo metuveen tei#Mat 2:12 tengan latnava ti Sudea. Ma latbe provins te hal Kaleli 23e latdi rute ak e taon te hal Nasaret.#Mak 1:9; Luk 1:26; 2:39; Sion 1:45-46 Ngan ak misak ni naha xa Hi Suv tehit lelen ni texo provet xil mei mistal be reitin xa tehit, “Likesi ni ngan Nasaret tei.”#2:23 Latakil ti xa sepinien ak texo provet xave.
Currently Selected:
Matiu 2: tvk
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.