Jon 1

O Iesu i a Wasiso anun o God

1 # Jn 17:5; 1 Jon 1:1-2; Tam 19:13 Numugu utmakai ra ka di ukisi utmakai a rakrakon bual, a Wasiso i sa kis mugu taru. A Wasiso i kis tomo nam o God, ma a Wasiso i ut o God. 2Numugu utmakai i kis tomo nam o God. 3#1 Kor 8:6; Kol 1:16-17; Ibr 1:2Una Wasiso kut, o God i ukis a kum utna rop. Katu utna o God i ukis tari, ra ke ukisi nama Wasiso. 4#Jn 5:26A nilaun i kis uni, ma a nilaun ra, i a talapor anun a taro rop. 5#Jn 3:19A talapor i sisio una dumirum, ma a dumirum ke pulus lar pasi.

6 # Mt 3:1; Lk 1:13-17, 76 O God i tulu ru ara musano, a risano o Jon. 7I wanpat sur in wasiso puaso una talapor, sur a taro rop det in nurnur uni. 8I ut awu sur a talapor, i wanpat kut sur in wasiso puaso una talapor. 9#Jn 8:12A talapor mulus, ra i ser utalapor a taro rop, in nanpat mo urin una rakrakon bual.

10A Wasiso i kis una rakrakon bual. Ma una Wasiso, o God i ukis a rakrakon bual, ikut a taro una rakrakon bual ka det tama lele pasi. 11I wanpat sur anun a taro, ikut anun a taro ut ka det gas pasi. 12Ikut, torom det ra det gas pasi, ma det nurnur una risano, i mulaot pas det sur det a kum nutnutun o God. 13#Jn 3:3-6; Pil 2:7; Jn 2:11; 1 Pit 1:23Awu sur di watung det a kum nutnutun o God kibino una usus na kabotaro, o una nuknukin tu musano taginin upiso, o una nemnem tagun a nolin, awu. Di usus det una nion, una nemnem ut anun o God.

14A Wasiso i wanpat a musano mulus, ma i kis epotor tamet. Met sa tama tar anun a minamar, a minamar anun o Nutunu, ara sot kut, ra i wan tagisapat tan o Tamano, i bukus nama marmaris ma a lingmulus. 15O Jon i wasiso talapor uni, ma i watungi namin labino walngano lena, “I ut ri, ra a wasiso mugu taru uni lena, ‘I ra in mur tang, i labo tang, uni i laun raut numugu tang.’” 16I bukus nama marmaris, ma gusun anun a labino marmaris i udan dat nama susut na wakak na utna ra i wanan pat torom dat. 17#Kis 34:28; Rom 6:14Un o Moses, o God i pitar tar a Warkurai torom dat, ikut un o Iesu Karisito i pitar tar a marmaris ma a lingmulus torom dat. 18#Kis 33:20; Jn 6:46; 1 Tim 6:16Kataio utmakai i tama tar o God. Ikut ara Nutunu kut, ra i kis tomo nam o Tamano, i ut i ese o God torom dat. Ma i ut o God.

O Jon a Tene Baptaiso i inanos talapor a taro uni ut

(Mt 3:1-12; Mk 1:1-8; Lk 3:1-18)

19A kum mugumugu anun a taro Juda tagisapat o Jerusalem, det tulu ru a ramano kum tene etabor torom o God, ma a ramano taro tagun a kabotaro Liwai,#1:19 A taro tagun a kabotaro Liwai det ser papam una rumu na etabor. torom o Jon sur det in tingi lena, “Ui osi?” 20O Jon ke wasiso batbati, i wasiso talapor ut uni lena, “Awu sur iau a Karisito.” 21#Lo 18:15, 18; Mt 11:14Det ting meleti lena, “Osi ui? Ui o Elaija?” Ra i balu det lena, “Awu, awu sur iau o Elaija.” Det ting meleti lena, “Ui a poropet ra di watung tari sur in nanpat?” I balu det lena, “Awu.” 22Numur det tingi lena, “Osi ui? Un inanos met sur met in inanos det ra det tulu ru met urin. Asau un watungi un ui ut?” 23O Jon i balu det lena, “Iau a musano ra a poropet Aisaia i wasiso mugu taru uni lena, ‘Una nubual kalako taro uni, in nalngan ara i kakabo lena: Mot in pam kodos a kisapi anun a Labino.’” Ais 40:3

24A kum Parisi ra di tulu tar det torom o Jon, 25det tingi lena, “U watungi lena, awu sur ui a Karisito, ma awu sur ui kai o Elaija, o a poropet, ra di watung tari sur in nanpat. Ra i lenra, ilai sur u baptaiso a taro?” 26O Jon i balu det lena, “Iau, a baptaiso mot nama danim, ikut ara kura i tur epotor tamot, ra ka mot tasman pasi. 27#Jn 1:15I ra, in mur tang. Ka elar sur an palos aru su gusun aru kikino, uni a natino doko tano.”

28A kum utna ri, i wanpat tong o Betani una ara papor danim Jodan, ra o Jon i baptaiso a taro iai.

O Iesu a Barman na Sipsip anun o God, ra in mat una sakino petutna anun a taro

29 # Ais 53:6-7; 1 Pit 1:18-19 Ara bung numur, o Jon i tama o Iesu i wan nanan toromi, ra i watungi uni lena, “Mot tama i, a Barman na Sipsip anun o God, ra in lakro ru a sakino petutna anun a rakrakon bual. 30#Jn 1:15A musano kut ri, ra a wasiso mugu taru uni lena, ‘A musano ra in mur tang, i labo tang, uni i laun raut numugu tang.’ 31Iau kai numugu ka tasmani. Ikut a baptaiso nama danim sur an upuaso a musano ri torom a taro Israel.”

32-33 # Mt 3:16 Ma o Jon i watungi lena, “Ka tasmani lena osi a Karisito. Ikut o God, ra i tulu ru iau sur an baptaiso nama danim, i inanos iau lena, ‘Un tama a Tokodos na Nion in nan pirso ma in kis un ara musano. I ra a musano ra in baptaiso nama Tokodos na Nion.’ Ma a tama a Tokodos na Nion i wan pirso tagisapat una langit, i elar namin natabun ma i kis taru netes un o Iesu. 34#Mt 3:17A sa tama tar a utna ri i wanpat, ra a inanos uni lena, i a Nutun o God.”

A kum mugano nat na ususer anun o Iesu

35Ara bung palu melet, o Jon ma aru nat tagun anun a kum nat na ususer detul tur taru melet tiro. 36#Jn 1:29I tama pas o Iesu i wan sakit detul, ra i watungi uni lena, “Tama i, a Barman na Sipsip anun o God.”

37Aru nat na ususer der longoro a wasiso ra, ma der muri mut o Iesu. 38O Iesu i tur tupukus, i tama der ra der muri, ra i ting der lena, “Asau ra mur nemi?” Der balu i lena, “Rabai,” (a kukuraino a Tene Ususer), “kura u kis awai?” 39O Iesu i balu der lena, “Mur iap sur mur in tama i.” I mo ra der muri, ma der tama a dino ra o Iesu i kis iai. Ra detul wanpat, i sa wat na pakano bung pas, ma detul kis mukut tiro iai a kudulano lirop ra.

40 # Mt 4:18-20 Ara tagun aru musano ra der longoro a wasiso anun o Jon ma der mur o Iesu, a risano o Endru, a tisin o Saimon Pita. 41A mugano utna ra o Endru i pami, i sio pas o Saimon a tisinolik, ra i inanosi lena, “Met sa sio pas a Mesaia!” (a kukuraino a Karisito)#1:41 Mesaia, a du wasiso Ibru, ma una wasiso Grik, di watungi nama Karisito. O Iesu i a Mesaia, a musano ra o God i pilok pasi sur in ulaun a taro. A kum poropet tagun numugu det wasiso na poropet uni, lena in nanpat, ra a taro Juda det kis langlang suri..

42 # Mt 16:18 O Endru i ben pas o Saimon torom o Iesu. O Iesu i tama i, ra i watungi tano lena, “Ui o Saimon, a nutun o Jon,#1:42 O Jon ra a taman o Pita, awu sur o Jon a Tene Baptaiso. din watung ui nam o Kepas.” (Una wasiso Grik di watungi nam o Pita, a kukuraino a wat.)

O Iesu i kabo pas o Pilip ma o Natanael

43Ara bung palu melet, o Iesu i nem na wan utong o Galili. I sio pas o Pilip, ra i watungi tano lena, “Un mur iau.” 44O Pilip, tagitong o Betsaida, a tamon anun o Endru ma o Pita. 45#Lo 18:18; Ais 7:14; 9:6; Jer 23:5; Ese 34:23O Pilip i sio pas o Natanael, ra i inanosi lena, “Met sa sio pas a musano ra o Moses i tumtumus mugu taru uni una Buk na Warkurai, ma a kum poropet kai det sa tumtumus mugu taru uni. I ra, o Iesu a te Nasaret, a nutun o Josep.” 46Ikut o Natanael i balu i lena, “O Nasaret! Pepetlai, tu wakak na utna ut in nanpat tagitiro iai?” O Pilip i balu i lena, “Un nan urin ma dar in nan sur un tama i.”

47O Iesu i tama pas o Natanael i wan nanan toromi, ra i watungi lena, “A te Israel mulus ut ri, ke tasman a torotoro.” 48O Natanael i ting o Iesu lena, “U tasman lan iau?” I balu i lena, “Ra o Pilip ke kabo pas ui utmakai, a sa tama mugu tar ui ra u kis taru nago utuntudu in nanai na fig.” 49#Mt 14:33; 16:16; Mk 3:11O Natanael i watungi tano lena, “Tene Ususer, ui a Nutun o God, ui a King anun a taro Israel.” 50O Iesu i watungi tano lena, “Pepetlai u nurnur un iau, uni a inanos ui lena u kis taru nago utuntudu in nanai na fig? Numur un tama a kum lamlabino utna sakit in nanpat, in labo taun a utna ri u tama i.” 51#Stat 28:12O Iesu i watung meleti lena, “A inanos mot nama lingmulus, mot in tama a langit in papos, ma a kum ensel anun o God det in nanan toto ma det in nanan pirso torom a Nutun a Musano.”

Currently Selected:

Jon 1: kqw

Highlight

Copy