Mat. 6

Tepad te pegtabang

1“Ikà niyo egpemekità te pegtolò niyo te Timanem diyà te doma otaw amon iduyun kaw dan, so aw ibeg niyo iduyun kaw te doma otaw, wedad ontong kinewaen niyo lekat te Amay niyo Timanem eg-ogpà doton te langit.

2“Yan aw megtabang kaw te otaw sagkep, ikà niyo eg-indan diyà te kedita te otaw amon iduyun kaw dan, so iling kenyan se eg-inangen te otaw eden dan aw egpenimanem dan. Yan se eg-inangen dan doton te simbahan te Judiyo aw kidoen te dalan, amon iduyun dan te menge doma otaw. Meneng eneng-enengi niyo se kagi ko seini. Wedad palos ontong ibegay te Timanem kandan. 3Meneng aw megtabang kaw te otaw sagkep, keilangan eked iyan ketegahi te doma otaw pengkey sigalak niyo. 4Aw eked niyo petega-tegahi diyà te doma otaw se pegpemegay niyo diyà te otaw sagkep, kitaen iyan te Amay niyo Timanem doton te langit, aw begayan kaw din te ontong.”

Tepad te pegtawal-tawal

Mat. 6:5-15; Luc. 11:2-4

5“Aw megtawal-tawal kaw diyà te Timanem, ikà niyo eg-iling te otaw eden dan aw egpenimanem dan, so egkeibeg dan egtawal-tawal doton te simbahan aw doton heman te dalan amon kitaen dan te menge doma otaw. Meneng eneng-enengi niyo se kagi ko seini. Wedad palos ontong ibegay te Timanem kandan. 6Meneng aw megtawal-tawal kaw, pegsiolì kaw. Tekepi niyo se lelebangan, aw pegtawal-tawal kaw diyà te Amay niyo Timanem eked kitai. Pengkey eked kaw kitai te doma otaw, komità se Timanem kenyo, aw begayan kaw din te ontong.

7“Ikà niyo egtawal-tawal aw kenà lekat te pedowan niyo se kagi, so iling kenyan se pegtawal-tawal te menge otaw kenà egpenimanem. Eden dan aw menenalan se Timanem kandan tandà te medita se kagi dan. 8Ikà niyo eg-iling kandan, so tapay netaga-taga se Amay niyo Timanem aw eden se kelidoan niyo pengkey wedà kaw pa pemoyò diyà kandin. 9Pegtawal-tawal kaw diyà te Timanem iling kani. ‘Amà kidoen te langit, ibeg day iduyun ka te kedita te otaw. 10Ibeg day lomowan ka diyà te kedita te otaw. Ibeg day metoman se ibeg no dini te keneyonan iling te pegketoman te ibeg no doton te langit. 11Begayi kay te kànen botong te kelikit te aldaw. 12Pegwedadi se salà ininang day diyà kamno onawa te pegwedad day te salà ininang te doma otaw diyà kenami. 13Ikà egpeokit kenami diyà te peg-akal, meneng pekediyoi kay diyà ki Satanas.’

14“Aw pegwedaden niyo se salà ininang te doma otaw diyà kenyo, pegwedaden heman te Amay niyo Timanem se salà ininang niyo diyà kandin. 15Meneng aw eked niyo pegwedadi se salà ininang te doma otaw diyà kenyo, eked heman pegwedadi te Amay niyo Timanem se salà ininang niyo diyà kandin.”

Tepad te pegpowasa

16“Aw megpowasa kaw, ikà niyo egpetaga-taga kenyan diyà te doma otaw pineokit te bawa niyo. Ikà niyo eg-iling te menge otaw eden dan aw egpenimanem dan, so eg-inangen dan medaet se bawa dan amon metaga-taga se doma otaw te kenà dan egpengaen. Eneng-enengi niyo se kagi ko seini. Wedad den palos ontong ibegay te Timanem kandan. 17Meneng aw megpowasa kaw, penowat kaw te logay, aw pegdàpog kaw te bawa, 18amon eked ketaga-taga se doma otaw te wedà kaw kaen. Pengkey eked iyan ketegahi te doma otaw, meneng ketegahan iyan te Amay niyo Timanem eked kitai, aw doen ontong ibegay din diyà kenyo.”

Kedònan doton te langit

Mat. 6:19-21; Luc. 12:33-34

19“Ikà niyo egtipon te kedònan dini lanto te tanà, so peg-enayen iyan, aw megkedaet iyan, aw ebaten iyan te menenakaw. 20Meneng keilangan megtipon kaw te kedònan doton te langit. Eked iyan peg-enayi, aw eked iyan pegkedaet, aw eked iyan heman ebati te menenakaw. 21Aw kenan ketipon se kedònan niyo, yan heman se keeneng-enengan niyo.”

Mata te otaw

Mat. 6:22-23; Luc. 11:34-36

22“Komità se otaw pineokit te mata. Aw mèpiya se mata te otaw, melowa se pegtengteng din. 23Meneng aw medaet se mata, iling te mengitngit se pegtengteng din pengkey aldaw. Iling heman kenyan, aw medaet se pedowan te otaw, ontò medaet se kedita te eg-inangen din.”

Timanem aw kedònan

Mat. 6:24-34; Luc. 16:13; 12:22-31

24“Wedad otaw meketolò te dowa amo din. Aw megpelenged sikandin diyà te sebad, eked sikandin tolò te sebad. Sebad olò se tekingan din, aw eked din segmani se sebad. Iling heman kenyan, eked pegsebad se pegpenimanem niyo aw pegpengewarta niyo.

25“Yan se doun te mikagi a den diyà kenyo, ikà niyo egketetana tepad te keogpà niyo aw eden se kànen aw inemen niyo. Ikà niyo heman egketetana tepad te lawa niyo aw eden se ekasan niyo. So binegayan kaw den te Timanem te ontò meelagà, sìyan pedowan niyo aw lawa niyo, yan ikà niyo egketetana tepad te kànen aw ekasan niyo. 26Eneng-enengi niyo tepad te menge manok te kebenesan. Kenà dan egpenanem. Kenà dan heman eglegani. Kenà dan heman eglodok te kànen dan kidoen te pol. Meneng gayed dan egbegayan te Amay niyo Timanem te kànen. So eg-ipaten te Timanem se kedita te manok te kebenesan pengkey iling te wedad keelagà dan, ontò kaw din heman ipaten, so meelagà kaw pa diyà te kedita te manok te kebenesan. 27Pengkey metetana kaw, meneng eked pegkelayat se omol niyo pineokit te ketetana niyo. 28Ikà niyo heman egketetana tepad te ekasan niyo. Eneng-enengi niyo se bolak te kebenesan. Gayed dan egtilles pengkey kenà dan egterbaho, aw kenà dan heman egpengabel te penenaktun. 29Meneng eneng-enengi niyo se kagi ko seini. Pengkey mèpiya se bawa te penenaktun te selotan si Solomon gebii, meneng labi pa mèpiya se bawa te bolak te kebenesan. 30So ininang te Timanem mèpiya se bawa te bolak te kebenesan pengkey sonogen iyan te eked kenamay, labi pa metoman se peg-ipat din kenyo. Meneng wedà pa kedì kelobos se pegsalig niyo kandin. 31Ikà niyo egketetana tepad te kànen niyo, aw inemen niyo, aw ekasan niyo. 32Se kedita te otaw kenà egsalig te Timanem, gayed dan egketetana tepad te keogpà dan. Meneng netegahan den te Amay niyo Timanem se kedita te kepulukan niyo. 33Yan pelowani niyo se Timanem diyà te kenyo pegkeotawun, aw tolò kaw te ibeg din, aw yan begayan kaw din heman te keilangan niyo.

34“Yan ikà niyo egketetana aw eden se domateng diyà kenyo kealdaw. Pebeyai niyo se kepulukan domateng te modi aldaw, so botong se kepulukan niyo te aldaw seini.”

Currently Selected:

Mat. 6: mbs

Highlight

Copy