Genesis 9

Pegpakang te Timanem diyà ki Noe

1Mèpiya se imbegay te Timanem diyà ki Noe aw pamilya din, aw minikagi sikandin, “Pegbatà kaw den te medita, amon doen menge bowad-bowad niyo meg-ogpà doton te kebelad te tanà. 2Lekat seini, melemitan kenyo se kedita te menenanap, manok, aw ikan. Inangen ko sikiyo olo te kedita niyan. 3Mepakay den kànen niyo se kedita te ayam-ayam aw menenanap. Tapay ko impekaen kenyo se menge tinemunun, meneng mepakay den heman se pegpengaen niyo te menenanap aw ayam-ayam. 4Sebad olò se eked niyo kepakay kànen, aw yan se pengelapen doen pa dipanog, so doen pedowan pineokit te dipanog.

5“Aw memonò se otaw, keilangan ipelumun sikandin. Aw mengimatay se ayam-ayam aw menenanap te otaw, keilangan imetayan heman iyan. 6Ininang se otaw iling te Timanem, aw yan se doun te keilangan imetayan se otaw memonò te doma.

7“Pegbatà kaw den te medita amon doen menge bowad-bowad niyo meg-ogpà doton te kebelad te tanà.”

8Minikagi se Timanem diyà ki Noe aw pamilya din, 9“Doen ipakang ko diyà kenyo aw menge bowad-bowad niyo, 10sipat te kedita te manok, ayam-ayam, aw menenanap dimoma kenyo kidoen te arka. 11Seini se ipakang ko diyà kenyo. Eked todà kegelà se kedita doen pedowan dini lanto te tanà te pegkelinep te tanà te wayeg. Eked todà kebàti se tanà pineokit te pegkelinep te tanà te wayeg. 12Doen pengilala inangen ko amon ketegahan niyo te gayed ko tomanen se pakang ko kenyo aw kedita doen pedowan dini te keneyonan te wedad temanan. 13Isawol ko den se binengonan kidoen te labon. Yan se pengilala tepad te pakang ko diyà te otaw eg-ogpà dini lanto te tanà. 14Aw meglabon dini te tanà, aw kitaen se binengonan kidoen te labon, 15keeneng-enengan ko se pakang ko kenyo aw kedita doen pedowan dini lanto te tanà, te eked todà kegelà se kedita pineokit te pegkelinep te tanà te wayeg. 16Aw doen binengonan doton te labon, kitaen ko iyan, aw keeneng-enengan ko se pakang ko wedad temanan diyà te kedita doen pedowan dini lanto te tanà. 17Yan se pengilala tepad te pakang ko diyà te kedita eg-ogpà dini lanto te tanà.”

Si Noe aw menge batà din

18Se menge batà i Noe timenà lekat te arka, yan si Sem, si Ham (amay i Canaan), aw si Japet. 19Se ditelo batà i Noe sìyan, yan se menge kemonaan te kedita te otaw eg-ogpà dini te keneyonan.

20Nayan, so biyasa si Noe egpawà, sikandin se monà nenanem te paras. 21Peg-inem din te bino ininang din lekat te paras, nelasing sikandin. Minibat sikandin migpetabeg-tabeg kidoen didalem te tolda inogpaan din. 22Timengteng si Ham amay i Canaan te pegpetabeg-tabeg te amay din, aw penga niyan limowà sikandin aw mig-indan te menge kedowa din. 23Penga niyan, nengabat si Sem aw si Japet te penenaktun itaklub kandin. Inewidan dan se taklub diyà te getan dan, aw minipanaw dan te getan te peg-awop dan diyà te tambì din, aw tinekluban dan sikandin. Wedà dan lingì amon eked dan kitai se lawa te amay dan migpetabeg-tabeg. 24Pegkelibwan i Noe te pegkelasing din, aw pegketaga-taga din tepad te ininang i Ham diyà kandin, 25minikagi sikandin, “Ipelumun te Timanem si Canaan batà i Ham. Meinang sikandin allang te menge kedowa din. 26Iduyun se Timanem egseligan i Sem. Meinang si Canaan allang i Sem. 27Inangen te Timanem medita se menge bowad-bowad i Japet (kelebadan niyan, pegkedita). Ipeogpà dan te Timanem doma te menge bowad-bowad i Sem. Meneng meinang se menge bowad-bowad i Canaan allang te menge bowad-bowad i Japet.”

28Penga te pegkelinep te tanà te wayeg, telo gatos keliman se omay minokit te wedà pa kematay si Noe. 29Siyam gatos keliman se omay i Noe te pegkematay din.

Currently Selected:

Genesis 9: mbs

Highlight

Copy