Genesis 37

Si Jose aw menge kedowa din

1Mig-ogpà si Jacob doton te Canaan, sìyan tanà inogpaan te amay din. 2Seini se indan-indan tepad te menge batà i Jacob.

Nayan, sempolò teg pito se omay i Jose, aw migtelaban sikandin te menge kedowa din kakay migtonggò te menge ayam-ayam te amay dan. Se menge kedowa din, yan se menge batà meama te doma menge esawa te amay din si Bilha aw si Zilfa. Doen medaet eg-inangen te menge kedowa i Jose, aw dimoton sikandin te amay din aw mig-indan diyà kandin tepad kenyan.

3Pengkey dakel se pedowan i Jacob diyà te menge doma batà din, meneng labi pa dakel se pedowan din diyà ki Jose, so temoay den si Jacob te pegtebaw i Jose. Yan impeinang din se mèpiya saol melayat se buktun aw imbegay din iyan kandin. 4Pegkità te menge kedowa din te ontò sikandin nedekelan te pedowan te amay dan, nebensi dan ki Jose, aw wedad palos mèpiya kagi dan diyà kandin.

5Nayan, migtegeinep si Jose, meneng peg-indan din tepad te tegeinep din diyà te menge kedowa din, labi dan pa nebensi kandin, 6so minikagi sikandin, “Penenalan kaw tepad te tegeinep ko. 7Peglegani tadon te trigo doton te pawà, nemagkes kidon te ginani tadon. Tigkan neketindeg se kanak bagkes nelibedan te kenyo bagkes, aw limongken se bagkes niyo aw migsagman dan te bagkes ko.”

8Minikagi se menge kedowa din, “Eden no aw meinang ka selotan day. Eden no aw lomowan ka diyà kenami.”

Penga niyan, labi dan pa nebensi kandin tandà te tegeinep din aw tandà te inikagi din diyà kandan.

9Todà migtegeinep si Jose, aw yan se in-indan din diyà te menge kedowa din, kagi din, “Todà a migtegeinep, aw kinità ko se aldaw, aw bolan, aw sempolò tegusà se bitoen tigkan limongken diyà kanak.”

10Meneng peg-indan din kenyan diyà te amay din aw menge kedowa din, nenompelà se amay din kandin, kagi din, “Eden lebò se kedegdagan te sìyan tegeinep nikaw? Lomongken a lay diyà kamno sipat te inay nikaw aw menge kedowa nikaw?”

11Gayed miningà se menge kedowa i Jose kandin, meneng gayed mig-aneng-aneng se amay din tepad te kedegdagan niyan.

Pegbeligyà ki Jose te menge kedowa din

12Doen sebad aldaw, nengibing se menge kedowa i Jose te menge ayam-ayam te amay dan doton te Sikem amon ipeloyaw kidoen. 13Minikagi si Jacob diyà ki Jose, “Dimoton te Sikem se menge kedowa no aw migpeloyaw dan te menge ayam-ayam kidoen. Peketagad ka so isogò ta doton kandan.”

Minikagi si Jose, “Neketagad a den.”

14Minikagi se amay din, “Doton ka, aw laoy ka kandan aw menge ayam-ayam egtonggoan dan. Penga niyan, likò ka dini amon ketegahan ko se pegkesawol dan.”

Yan timolò si Jose te sogò te amay din, aw nesayo lekat te Baog te Hebron.

Pegdateng i Jose doton te Sikem, 15miglegeb sikandin aw nengemahà te menge kedowa din. Doen otaw kimità kandin aw mig-insà aw eden se inahà din kidoen.

16Timaba si Jose, “Nengemahà a te menge kedowa ko. Indani a bag aw kenan dan pegpeloyaw te menge ayam-ayam dan.”

17Minikagi se otaw sìyan, “Dimeleg den dan, so minikagi dan te domoton dan te Dotan.”

Yan timelokon si Jose kandan, aw kinità din dan doton te Dotan.

18Pengkey mediyò pa sikandin, kimilala se menge kedowa din kandin. Te wedà pa sikandin dateng doton kandan, miglalang dan te imetayan dan sikandin. 19Migpebelaw-belaway dan, “Migpesalo den dini se otaw sìyan gayed egtegeinep. 20Ayas kaw. Imetayan tadon sikandin aw idagdag tadon se lawa din doton te medalem sokian. Mikagi kidon te doen menenanap te kebenesan nengimatay kandin. Penga niyan, tegadan tadon aw doen ketomanan te menge tegeinep din.”

21Meneng pegdineg i Ruben te inikagi te menge kedowa din, ibeg din eked dan peelegi se adi dan. Yan minikagi sikandin, “Mèpiya aw eked tadon imetayi. 22Ikà niyo egpeeleg kandin, meneng botong aw idagdag tadon sikandin doton te medalem sokian doton te kebigtilan amon matay sikandin te wedad megpeeleg kandin.” Yan se inikagi i Ruben so ibeg din ipelowà din si Jose amon ibingen din doton te amay din.

23Pegdateng i Jose doton kandan, piglowasan dan sikandin te saol din melayat se buktun. 24Penga niyan, inibing dan sikandin doton te medalem sokian wedad wayeg, aw indagdag dan doton.

25Penga niyan, dalem te pegpengaen dan, tigkan dan kinità se menge bowad-bowad i Ismael aw menge ayam-ayam dan kamilo minokit kidoen lekat te Galaad. Doen inlolan diyà te menge kamilo dan menge enagay aw bebolong te saka ibingen dan doton te Ehipto. 26Yan minikagi si Juda diyà te menge kedowa din, “Aw imetayan tadon se adi tadon aw ibolon tadon iyan, wedad ontong tadon. 27Meneng labi pa mèpiya aw ibeligyà tadon sikandin diyà te menge bowad-bowad i Ismael sida. Eked kepakay aw imetayan tadon sikandin, so telekedowa kidon aw sebad olò se amay tadon.”

Yan timandù heman se menge kedowa din. 28Pegdateng te menge tege Midian doton kandan, impelowà dan sikandin lekat te sokian, aw imbeligyà dan sikandin. Kelowan plata selapì se kwarta imbayad te menge bowad-bowad i Ismael kandin, aw penga niyan, inibing dan sikandin doton te Ehipto.

29Nayan, pegdoton i Ruben te sokian amon megpelowà ki Jose, kinità din te wedad den kidoen. Yan miglisì sikandin te saol din tandà te puluk din. 30Dimoton sikandin te menge kedowa din aw minikagi, “Megmeno a? So wedad den kidoen si Jose.”

31Penga niyan, nengimatay dan te kambing, aw linegeb dan se saol i Jose te dipanog niyan. 32Penga niyan, impeibing dan se saol din melayat se buktun doton te amay dan, aw minikagi dan, “Seini se netelaan day. Tengtengi aw yan se saol te batà nikaw.”

33Kinilala din te yan se saol i Jose, aw minikagi sikandin, “Ee, kandin ini. Inimetayan sikandin te mebolot menenanap te kebenesan, aw kinaen se lawa din.”

34Penga niyan, miglisì si Jacob te saol din aw nengelibaeg sikandin te sako tandà te lano din. Nenamay sikandin minoloy tepad te pegkematay te batà din. 35Netipon se kedita te batà din amon megsinalay dan kandin, meneng kimulu sikandin, kagi din, “Gayed a moloy tandà te pegkematay te batà ko lamig komità a kandin doton te ogpeanan te otaw nematay.”

Yan gayed sikandin minoloy te batà din si Jose.

36Meneng kenan si Jose? Doton sikandin te Ehipto, so inibing te menge tege Midian aw imbeligyà dan doton. Bineyadan sikandin i Potifar, sebad opisyal migtelaban te selotan te Ehipto si Paraon, aw sikandin se kapitan te menge sondalo din.

Currently Selected:

Genesis 37: mbs

Highlight

Copy