Genesis 25

Menge doma bowad-bowad i Abraham

1Nayan, todà nengognan si Abraham, aw si Ketura se ngadan te modi esawa din. 2Se menge batà meama i Abraham timebaw diyà ki Ketura, yan si Simran, si Jocsan, si Medan, si Midian, si Isbac, aw si Sua. 3Si Jocsan se amay i Seba aw si Dedan. Se menge bowad-bowad i Dedan, yan se neinang menge pongan te Asur, Letus, aw Leum. 4Se menge batà meama i Midian, yan si Epa, si Eper, si Hanoc, si Abida, aw si Eldaa. Menge bowad-bowad i Ketura se kedita niyan.

5Si Isaac se binegayan i Abraham te kedakel te keyemanan din. 6Meneng te wedà pa kematay si Abraham, doen heman imbowang din diyà te menge batà te menge doma esawa din. Penga niyan, impekesayo din dan pesalo doton te eglibtakan te aldaw amon eked dan pegsamok te batà din si Isaac.

Pegkematay i Abraham

7Sebad gatos kepitowan teg lima se omay i Abraham te pegkematay din. 8Ontò sikandin temoay te pegkematay din aw mèpiya se peg-ogpà din, aw yan neketelokon sikandin te menge kemonaan din nematay. 9Inlebeng te batà din si Isaac aw si Ismael se lawa din diyà te ilib te Macpela kidoen te tanà lenged te eglibtakan te lonsod te Mamre tapay tinig-apò i Efron batà i Sohar tege Heti. 10Yan se tanà tapay bineyadan i Abraham diyà te menge tege Heti. Yan se linebengan dan ki Abraham sipat te esawa din si Sara. 11Penga te pegkematay i Abraham, mèpiya se imbegay te Timanem diyà te batà din si Isaac, aw mig-ogpà sikandin doton medapag te Beer Lahai Roi.

Menge bowad-bowad i Ismael

12Seini se menge bowad-bowad i Ismael batà i Abraham timebaw diyà ki Agar tege Ehipto allang i Sara. 13Seini se ngadan te menge batà i Ismael egpetibos-tibosay dan lekat te penganay. Si Nebaiot se kakay, inolid din si Kedar, si Adbeel, si Mibsam, 14si Misma, si Duma, si Masa, 15si Hadad, si Tema, si Jetur, si Napis, aw si Kedema. 16Yan se menge batà i Ismael, aw neinang dan datò te sempolò teg dowa pongan. Yan heman se in-ingadan te menge lonsod aw ogpeanan dan. 17Sebad gatos ketlowan teg pito se omay i Ismael te pegkematay din. 18Mig-ogpà se menge bowad-bowad i Ismael doton te tanà diyà te tengà-tengà te lonsod te Habila aw Sur lenged te eglibtakan te Ehipto pesalo te Asirya. Wedà dan peg-ogpà doma te menge doma bowad-bowad i Abraham.

Si Esau aw si Jacob

19Seini se indan tepad te batà i Abraham si Isaac. 20Kepatan se omay i Isaac te pegpengognan din ki Rebecca batà i Betuel tege Aramea te Mesopotamya. Si Rebecca se etebay i Laban tege Aramea heman.

21Nayan, wedad palos batà i Rebecca, aw yan migtawal-tawal si Isaac diyà te Timanem tepad kenyan. Nenenalan se Timanem te pinemoyò din, aw yan miglaman si Rebecca. 22Doen pingin diyà te belenakan din, aw iling te migbolaw dan te wedà dan pa tebaw. Minikagi si Rebecca, “Nengà lay neinang ini diyà kanak?”

Penga niyan, mig-insà sikandin diyà te Timanem tepad kenyan. 23Minikagi se Timanem, “Se pingin kidoen te belenakan nikaw, yan se meinang kemonaan te dowa pongan. Eked dan pegsebad. Meinang labi pa magsen se sebad pongan, aw meinang sineligan te batà no adi se kakay din.”

24Pegdateng te aldaw te pegtebaw, pingin se timebaw. 25Melalag se tagnà timebaw, aw bolbolen se lawa din, aw yan iningedanan dan sikandin ki Esau (kelebadan niyan, bolbolen). 26Pegtebaw te adi din, minawid sikandin te palo te kakay din, aw yan iningedanan dan sikandin ki Jacob (kelebadan niyan, nengawid te palo, aw doen heman kelebadan niyan, eg-akal). Keneman se omay i Isaac te pegtebaw te didowa dan.

27Pegketelaki te didowa dan, migketomawan si Esau aw gayed eglegeb doton te kebenesan. Meneng netelek si Jacob, aw gayed sikandin netingen medapag te tolda inogpaan dan. 28Ontò dakel se pedowan i Isaac diyà ki Esau, so ibeg din egpengànen se menge menenanap te kebenesan egpenaen i Esau. Meneng ontò dakel beling se pedowan i Rebecca diyà ki Jacob.

29Doen aldaw migpesebo si Jacob te sabaw te temboway melalag. Dimateng si Esau lekat te kebenesan, aw ontò sikandin binallos. 30Minikagi sikandin diyà ki Jacob, “Begayi a den te melalag sabaw sìyan, so ontò a binallos.” (Yan se doun te doen doma ngadan i Esau si Edom, kelebadan niyan, melalag.)

31Minikagi si Jacob, “Eked a pemegay kamno singed aw begayan a no te ontong kinewaen no aw matay se amay ta, so sikona se penganay batà din.”

32Minikagi si Esau, “Mepakay iyan diyà kanak. Pengkey penganay a, meneng wedad ontong ko kenyan aw matay a den tandà te ballos ko.”

33Minikagi si Jacob, “Eked a pemegay kamno singed aw onà ka megsapà.”

Yan migsapà si Esau te ibegay din diyà ki Jacob se ontong ibegay te amay dan diyà te penganay batà din. 34Penga niyan, nemegay si Jacob diyà ki Esau te pan aw sabaw te temboway melalag. Kimaen si Esau aw mininem. Penga niyan, nesayo sikandin. Yan mig-aneng-aneng sikandin te wedad elagà te ontong ibegay te amay din diyà te penganay batà din.

Currently Selected:

Genesis 25: mbs

Highlight

Copy