Genesis 18
18
Telo se memanit i Abraham
1Peg-ogpà i Abraham doton te menge olayan i Mamre, migpekità se Timanem diyà kandin. Pegkeinit te aldaw, nenenoo si Abraham doton te lelebangan te tolda inogpaan din. 2Pegtengteng din kidoen te lowà, kinità din se telo otaw timindeg medapag kidoen. Pegkità din kandan, ayas sikandin simongon kandan. Limongken sikandin lamig minapet se olo din diyà te tanà amon megsagman kandan. 3Minikagi sikandin, “Sir, apit kaw den dini kanak. Ikà niyo eglaklak. 4Ibingen ko se wayeg ionaw te benis niyo, aw mekeetod kaw dini te kayo seini. 5Ipekaen ko heman sikiyo amon todà kaw megkagsen te eked kaw pa deleg. Neluba se pedowan ko so dimini kaw, aw meibeg a megtabang kenyo.”
Minikagi dan, “Mepakay iyan diyà kenami.”
6Ayas minawop si Abraham aw minikagi sikandin diyà ki Sara, “Kegaen ka. Gemiti se sebad sako ontò mèpiya arina, aw inangi se pan ipekaen kandan.”
7Penga niyan, kimagnan si Abraham doton te menge ayam-ayam din, aw pinemallì din se ontò mèpiya nati te baka. Imbegay din iyan diyà te sebad sineligan din amon iyawen din iyan aw ilegaen te eked kenamay. 8Pegtegilan dan te kedita, inibing i Abraham se kisiyo, aw gatas, aw pengelapen tinoeg, aw imbayaw din iyan diyà kandan. Dalem te pegpengaen dan, timindeg sikandin medapag doton te siyong te kayo.
9Mig-insà dan diyà kandin, “Kenan lay se esawa nikaw si Sara?”
Timaba si Abraham, “Doton didalem.”
10Minikagi se sebad, “Doen inangen ko metolos te modi omay, so doen batà meama tomebaw diyà te esawa no si Sara.”
Nayan, kidoen si Sara te lelebangan lenged te getan din, aw dinineg din se inikagi dan. 11Ontò den temoay si Abraham, aw ontò den lokes si Sara. Wedad bayi tebawan aw mapet se omay din iling te omay i Sara. 12Yan se doun te nebebayat si Sara diyà te kandin pegkeotawun, aw mig-aneng-aneng sikandin, “Meneng ontò a den lokes, aw ontò den temoay se esawa ko. Menonen se pegdateng te keluba sìyan diyà kanak?”
13Penga niyan, mig-insà se Pengolo diyà ki Abraham, “Nengà lay nebebayat si Sara? Nengà lay minikagi sikandin te menonen se pegtebaw te batà diyà kandin so ontò den sikandin lokes? 14Wedad palos eked kebatog te Timanem. Doen inangen ko metolos te modi omay, so doen batà meama tomebaw diyà ki Sara.”
15Nelemitan si Sara, aw yan migkebolalaw sikandin aw minikagi, “Wedà a kebebayat.”
Meneng minikagi se Pengolo, “Benal ka nebebayat.”
Pegpemoyò i Abraham tepad te tege Sodoma
16Pegkesayo te telo memanit lekat kidoen, dimoton dan te pemebongan aw migpeatap-atap dan doton te lonsod te Sodoma. Timaking si Abraham kandan amon megtedò kandan te dalan. 17Mig-aneng-aneng se Pengolo, “Eked ko elesi diyà ki Abraham se tod ko agpet den inangen, 18so meinang dakel pongan se menge bowad-bowad din, aw mèpiya se ibegay ko diyà te kedita te otaw pineokit kandin. 19Pinemallì ko sikandin amon megtoladà sikandin te menge batà din aw menge bowad-bowad din te keilangan tomolò dan kanak, aw keilangan meg-inang dan te metòlid. Aw yan se inangen dan, tomanen ko se kedita te impakang ko diyà kandin.”
20Penga niyan, minikagi se Pengolo diyà ki Abraham, “Medita se minikagi diyà kanak te medaet se eg-inangen te menge tege Sodoma aw tege Gomora. Ontò ekon mebegat se salà dan. 21Yan domoton a den amon ketegahan ko aw benal se dinineg ko, aw kenà.”
22Penga niyan, nesayo se didowa otaw migpesalo doton te Sodoma, meneng mig-ogpà pa se Pengolo aw si Abraham kidoen. 23Migpedapag si Abraham diyà te Pengolo, aw mig-insà sikandin, “Aw igelaen no se menge medaet otaw, ipesipat no lay heman se menge mèpiya otaw? 24Simpana aw keliman se mèpiya otaw eg-ogpà doton te lonsod sida, tigkan no lay pegbàtan se lonsod? Eked no lay iyan keidowi tandà te keliman mèpiya otaw? 25Aneng-aneng ko eked no imetayi se menge mèpiya otaw sipat te menge medaet otaw. Eked kepakay aw yan se inangen nikaw. Aw ipelumun no se medaet otaw, eked no pesipati se mèpiya otaw, so sikona se eg-okom te kedita te otaw, aw keilangan metòlid se inangen nikaw.”
26Timaba se Pengolo, “Aw keliman se mèpiya otaw kitaen ko doton te lonsod sida, keidowan ko se kedakel te lonsod tandà te keliman mèpiya otaw.”
27Minikagi heman si Abraham, “Sir, pengkey ontò ka melangkaw diyà kanak, meneng pekeleyati se pedowan no diyà kanak te peg-ikagi ko todà diyà kamno. 28Simpana aw olò kepatan teg lima se mèpiya otaw, pegbàtan no lay se kedakel te lonsod so kolang te lima?”
Timaba se Pengolo, “Aw kepatan teg lima se mèpiya otaw kitaen ko kidoen, eked ko pegbàti se lonsod.”
29Minikagi heman si Abraham, “Simpana aw olò kepatan se kitaen nikaw?”
Timaba se Pengolo, “Aw doen kepatan, eked ko iyan pegbàti.”
30Minikagi si Abraham, “Sir, ikà egkeopal kanak aw todà a mikagi diyà kamno. Simpana aw olò ketlowan se kitaen nikaw?”
Timaba se Pengolo, “Aw ketlowan se kitaen ko, eked ko iyan pegbàti.”
31Minikagi si Abraham, “Sir, pekeleyati se pedowan no diyà kanak te peg-ikagi ko todà diyà kamno. Simpana aw olò kelowan se kitaen nikaw?”
Timaba se Pengolo, “Aw kelowan se kitaen ko, eked ko pegbàti se lonsod.”
32Minikagi si Abraham, “Sir, ikà bag egkeopal kanak, so seini se temanan te peg-ikagi ko. Simpana aw olò sempolò se kitaen nikaw?”
Timaba se Pengolo, “Aw doen sempolò, eked ko iyan pegbàti.”
33Penga te pegpebelaw-belaway te Pengolo aw si Abraham, nesayo se Pengolo, aw minolì si Abraham.
Currently Selected:
Genesis 18: mbs
Highlight
Share
Copy
Want to have your highlights saved across all your devices? Sign up or sign in
© 1982, Wycliffe Bible Translators, Inc. All rights reserved.
