Ñwaè' Ruêm 5

1À ka' ba njobè' sèe yu byɛɛnì à bsii Nyʉ̀ njo' lisèe rbyemì, sèe ce cu nè rfʉtè-ŋwɛ̀ sèe Nyʉ̀ wèe njo' yuu ce yìsèe Tata Jisos Krǎis à m gèe. 2Yu ye ce e gèe sèe à konì fɛŋ, a riŋ rbǒŋntee Nyʉ̀ ce sèe ce yɛ sè'ni na, a ce lu'shi njobè' sèe rìŋ seenɛ sèe be koni fòo ce yi lò ese Nyʉ̀. 3Mo' foŋ yi yu enɛ sèe ce lu'shi à ŋgɛ' ce sèe ce yɛ njobè' sèe rìŋ seenɛ ŋgɛ' e ke gèe ŋwɛ̀ e kur ntee; 4ŋkur ntee anà e gèe ŋgèe ŋwɛ̀ yi boŋ Nyʉ̀. Yisèe ŋgèe yi ka' boŋ Nyʉ̀, banɛ yi be gèe tɛ sèe lɛ mmir mbendù Nyʉ̀. 5Sèe à ka' lɛ mmir mbendù Nyʉ̀ wa'a, sèe lɛ à cicì ka' njobè' sèe rìŋ seenɛ Nyʉ̀ à kòŋ sèe magòr sê. Sèe rìŋ wa'a, ba à ŋger Yʉ' Rara ce e fa nè sèe nà.

6Yi yu enɛ à m ba à nfè' ce sèe à m rìŋ à rjà' visèe btu ka' nà, Krǎis à vʉ à nfè' ce Nyʉ̀ à m lɛ̀, a kwe a sěe btù ce sèe yu ŋgǎa ŋgèe buu bbebep. 7Sèe rìŋ seenɛ yi yu àtɛ̀r nè ŋwɛ̀ à rkwe àtu ŋwɛ̀ mò' ka'; ka' ŋgàŋ à ka' ba ŋwɛ̌ nyɛɛnì ɛ̀. Seemò' àde' ŋwɛ̀ ku byemi enɛ e be kwe àtu ŋwɛ̀ ce yì ndèe bòŋ sê. 8À ka' ba yi àmbò Nyʉ̀, e dùŋshi sèe enɛ e kòŋ sèe sê, njobè' à m ba à nfè' ce sèe à m ku bii ŋgǎa ŋgèe buu bbebep nà, Krǎis à kwe a sěe btù. 9À ka' ba njobè' rkwe Jisos Krâis, Nyʉ̀ à gee sèe à ba byɛɛnì, banɛ yi yu mini ghup enɛ Jisòs be jà' sèe efa rshentee Nyʉ̀ foŋ. 10À m ba à nfè' ce sèe à m ku bii ŋgǎa bbàa nè Nyʉ̀, muu yì à gee sèe Nyʉ̀ wèe à kʉtì àbee njo' li rkwe. Yi ka' ba enɛ sèe Nyʉ̀ wèe à kʉtì àbee, banɛ yi yu mini enɛ sèe be lùŋ njobè' e cu ntèe. 11A yi wa' wɛɛ ka'. Sè'ni na, sèe ce lu'shi njo' yuu ce Nyʉ̀ à gèe nè sèe njo' rkwe yìsèe Tata Jisos Krâis, à ba ye ce e m gèe sèe Nyʉ̀ wèe à kʉtì àbee.

12Yi yu enɛ buu bbebep à m vʉ̀ njep ŋgòŋ na njo' ŋwɛ̀ mò'sir, a vʉ nè rkwe. Yi ka' ba wa'a, rkwe li vʉ àndù bèe wɛɛwɛ njobè' bèe wɛɛwɛ a gèe buu bbebep. 13Buu bbebep à m ku ba njep ŋgòŋ tɛ Nyʉ̀ ka' kè fa vi mncir. Mncir vi ka' tɛ ba àgho ka', àde' a be' buu bbebep ce ŋwɛ̀ à gèe ka'. 14Ka' yi yu wa'a, rkwe li m ku ba à nfè' ce ncir yi m be ba ka', kɛ' ese à nfè' yì Adàm du ba' à nfè' yì Musìs, rkwe li m ku ba, ka' wowèe a m gèe njɛ̀ɛ yuu bebep ce Adàm à m gèe à nfè' ce e m tèe tu nè Nyʉ̀ nà ka' wa'a.

Adàm yu àmbò rlèŋshi Jisos Krǎis ce e bii ka' vʉ̀. 15Ka' yi yu wa'a, rfa ce Nyʉ̀ à m fa njo' ŋwɛ̀ ce e m bii ka' vʉ̀ anà li yu jɛɛ efa yuu bebep ce Adàm à m gèe. Bèe magòr a m kweŋger njo' yuu bebep ce ŋwɛ̀ mò'sir ce yu Adàm à m gèe. À ka' ba njobè' rbǒŋntee ŋwɛ̀ mò'sir foŋ ce yu Jisos Krâis, bèe magòr se a konì rbǒŋntee Nyʉ̀ ce yu rfa ce e fa à cicì. 16Sɛ' efa rfa Nyʉ̀ yu jɛɛ efa sɛ' efa yuu bebep ce ŋwɛ̀ mò'sir à m gèe. Ŋwɛ̀ mò'sir à m gèe yuu bebep, Nyʉ̀ à sa' bèe, wowèe a gwe mnsa'. Geewa'a, bèe magòr a ku ce gèe buu bbebep, Nyʉ̀ à ku fa bèe rfa à cicì, a gee wowèe a ba byɛɛnì a yě bsii. 17Ka' ba enɛ yuu bebep ce ŋwɛ̀ mò'sir à m gèe, yi m gèe rkwe li tʉr ŋger mbendù ŋgòŋ wɛɛwɛ, bèe wɛɛwɛ a ce kweŋger njobè' ŋwɛ̀ mò'sir anà, banɛ yi yu foŋ enɛ rbǒŋntee ŋwɛ̀ mò'sir, ce yu Jisos Krâis, li be gèe bèe magòr a koni rfa ce à cicì, ba běe byɛɛnì à bsii Nyʉ̀, koni ryòŋ, so buu bbebep.

18Banɛ àmbò yuu bebep ce ŋwɛ̀ mò'sir à m gèe yi m gèe bèe wɛɛwɛ a gwe mnsa' Nyʉ̀ nà, yi yu foŋ enɛ yuu yɛɛnì ce ŋwɛ̀ mò'sir à m gèe nà, yi gèe bèe wɛɛwɛ a konì fɛŋ à rso mnsa', koni ryòŋ. 19Àmbò bèe magòr a m ba ŋgǎa ŋgèe buu bbebep njobè' ntèetu ŋwɛ̀ mò'sir nà, yi yu foŋ enɛ bèe magòr a be ba byɛɛnì à bsii Nyʉ̀ njobè' ŋwɛ̀ mò'sir à m yu'ni nè Nyʉ̀.

20Nyʉ̀ à m fa mncir tɛ bèe a bo gèe buu bbebep gòr. Ka' yi yu wa'a, fà dì' ce bèe a m ce gèe buu bbebep gòr, rbǒŋntee Nyʉ̀ li m gha' buu bbebep anà àfo gòr sê. 21Banɛ àmbò buu bbebep à tʉr ŋger mbendù bèe, a vʉ nè rkwe, yi yu foŋ enɛ rbǒŋntee Nyʉ̀ li tʉr ŋger à rgèe bèe tɛ a ba byɛɛnì à bsii Nyʉ̀, koni ryòŋ ce nfesè njo' yìsèe Tata Jisos Krâis.

Currently Selected:

Ñwaè' Ruêm 5: LNT

Highlight

Copy