Ñwaè' Ruêm 2

1Banɛ wɛ̌ ŋwɛ̀ ce à ce sa' bèe mo', mbò wɛ̀ rìŋ wɛnɛ àde' à fʉr yo tu efa mnsa' Nyʉ̀ ka' a? Wɛ̀ ka' làa enɛ wowèe a gèe buu bbebep, banɛ wɛ̀ ce sa' yò nyor foŋ njobè' wɛ̀ ku ce gèe ba njɛ̀ɛ buu ce wowèe a ce gèe. 2Sèe rìŋ seenɛ Nyʉ̀ e ke gèe yɛɛnì à nfè' ce e ce sa' bèe ce a ce gèe njɛ̀ɛ buu ca. 3Ŋkarà, wà' wɛ̀ ka' ce sa' bèe ce a ce gèe njɛ̀ɛ buu ca, ker ce gèe vi foŋ, wà' àde' Nyʉ̀ buu efa rsa' wɛ̀ a? 4Wà' à ce lòr ŋgěe bòŋboŋ ce Nyʉ̀ ce gèe nè bèe, a gee yuu mo' nè wowèe ka', a tʉr ntee mʉfɛ̀ɛ nà, à yuu cicì a? Mbò wɛ̀ rìŋ wɛnɛ Nyʉ̀ ce gèe ŋgěe bòŋboŋ ca nè wɛ̀ wa'a, a ce fa wɛ̀ fɛŋ tɛ à bo kupse yo ŋgěe bebep a? 5Wɛ̀ tèe tu, a kani efa rkupsè, banɛ à ce kè' sè'ni ba rshentee Nyʉ̀ ce li be kè yɛɛti àwaŋ à nòŋ ce e be kè sa' bèe wɛɛwɛ à njǐ yɛɛnì nà. 6Nyʉ̀ be kè là' ŋwɛ̀ wɛɛwɛ à buu wɛɛwɛ ce ŋgàŋ à m gèe. 7Bèe ce a lɛ̀ ntee à rgèe buu bbòŋboŋ à nfè' wɛɛwɛ, a lɛ mmir mbendù bkù' ese Nyʉ̀ ba ryu'nì ba ryòŋ ce nfesè, Nyʉ̀ be gèe tɛ wowèe a cu nfesè. 8Bèe mò' ce a yu bwer, a kani yuu mini, a ce gèe ba buu bbebep nà, a be yɛ ŋgɛ' rshentee ba bepntee Nyʉ̀. 9E be kè fa ŋgɛ' nè ŋwɛ̀ wɛɛwɛ ce e ce gèe buu bbebep tɛ wowèe a yu' ryaŋ sê. E be kè kɛ̀' nè Jûs, ka' du mbendù bèe enje jɛɛ foŋ. 10À ka' ba yi àmbò bèe ce a ce gèe buu bbòŋboŋ, wowèe a be kè koni bkù' ba ryu'nì ba cumʉnyaŋ ese Nyʉ̀. E be kè kɛ̀' nè Jûs, ka' fa nè bèe enje jɛɛ foŋ. 11Nyʉ̀ e ke so'niŋgòŋ ka'.

12Bèe ce a gèe buu bbebep, a riŋ mncir Nyʉ̀ ka', a be bʉ, ka' a be kè sa' wowèe nè mncir ka' wa'a. Bèe ce a gèe buu bbebep a riŋ mncir Nyʉ̀ nà, Nyʉ̀ be sa' wowèe nè mncir anà. 13Bèe ce Nyʉ̀ à gèe wowèe a ba byɛɛnì a yě bsii yu bèe ce a ce yu' mncir ba nè btù' cà'cà' ka', yu bèe ce a ce lɛ̀ mncir. 14Bèe ce a yu Jus ka', a riŋ mncir ka', a ka' ce gèe buu mo' ce mncir vi ce làa à mkwà'shì map, ka' wowèe a rìŋ mncir ka' wa'a, wowèe a ku riŋ yuu ce yi yu yɛɛnì. 15Yap ŋgèe yi ce dùŋshi enɛ mncir Nyʉ̀ anà vi yu njep wǎp ntee ghup. Wap bfee vi ce gèe wowèe a riŋ wa'a foŋ njobè' wowèe a gèe yuu bòŋboŋ, ku rîŋ, a gèe yuu bebep, ku rîŋ. 16A mbò yi be kè ba wa'a à nòŋ ce Nyʉ̀ be fa ŋger nè Jisos Krǎis tɛ e sa' bèe a yě tù, teni wap mnsa' nà. E be sa' wowèe à buu wɛɛwɛ ce wowèe a m ce gèe à bsʉ̀ti àmbò m ce fè'shi Nsuŋ Mbòŋmboŋ, a ce suŋ bèe nà.

17Wɛ̀ ce à ce nàa nyor enɛ a wɛ̀ ŋwɛ̀ Jûs, à ce làa enɛ à yu yɛɛnì njobè' à rìŋ mncir, a ce nàa nyor enɛ à rìŋ Nyʉ̀ jɛɛ, 18wɛ̀ rìŋ yuu ce Nyʉ̀ ce kòŋ, a riŋ yuu ce yi yu bòŋboŋ njobè' a yɛ'ni wɛ̀ mncir Nyʉ̀. 19Wɛ̀ lòr yo yu enɛ àde' à duŋshì mnfèp nduunjì. À ce làa wɛnɛ à yu rraa nè bèe ce a yu à tʉ̀'nji. 20À ce làa wɛnɛ àde' à yɛ'ni blʉr, ker yɛ'ni foŋ bèe ce a rìŋ buu ka', njobè' mncir vi fa wɛ̀ bfee, a gee wɛ̀ riŋ yuu mini. 21Wà' wɛ̀ ce wɛ̌ ke yɛ'ni bèe mo', wɛ̀ yɛ'ni yò nyor a? Wɛ̀ ce wɛ̌ ke yɛ'ni enɛ bèe a fa yɛ̀ɛ ka', wà' wɛ̌ ke yɛ̀ɛ a? 22Wɛ̀ ce à ce làa enɛ bèe a fa koo bbyèŋge bèe mo' ka', wà' wɛ̌ ke koo bbyèŋge bèe mo' a? Wɛ̀ ce à bàa mnyʉ̀ enjep ŋgòŋ na, wà' wɛ̌ ke yɛ̀ɛ buu embe ndap mnyʉ̀ anà a? 23Wɛ̀ ce à ce nàa nyor enɛ à riŋ mncir Nyʉ̀ sê, wà' wɛ̌ ke gèe bèe a ce làa bebep àmbò Nyʉ̀ njobè' à ce bʉ' mncir anà a? 24A saŋ mbe Ŋwǎ' Nyʉ̀ enɛ̂, “Bèe enje jɛɛ a ce bepsi rlii Nyʉ̀ njobè' yuu ce wèe ce gèe.”

25À ce gèe bʉ̀ à rdùŋshi enɛ à yu ŋwɛ̀ Nyʉ̀. Bʉ̀ ce à ce gèe anà be ba nè sɛ'-ŋwɛ̀, ce à ka' ce lɛ̀ mncir Nyʉ̀. Wɛ̀ ka' ce bʉ' mncir Nyʉ̀, banɛ yi yu sè'ni àmbò wɛ̀ gèe lɛ bʉ̀ ka' wa'a. 26À ka' ba yi àmbò ŋwɛ̀ ce e gèe bʉ̀ ka', ŋgàŋ à ka' ce lɛ̀ mncir Nyʉ̀, banɛ Nyʉ̀ be kù lòr ŋgàŋ àmbo ŋwɛ̀ ce e gèe bʉ̀ wɛɛ wa'a. 27Ŋwɛ̀ ca be coosi wɛ̀ ce wɛ̀ gèe bʉ̀, a riŋ mncir Nyʉ̀ ce a saŋ mbe Ŋwǎ' Nyʉ̀, a lɛ vi ka' nà. 28Yi yu enɛ ŋwɛ̀ ce e yu ŋwɛ̀ Jus ghup yu ba ŋwɛ̀ ce a ce yɛ ba nè mmir ka'. Bʉ̀ ce yu bʉ̀ mini à bsii Nyʉ̀ yu ba yì ce à gèe ŋwɛ̀ ka'. 29Ŋwɛ̀ ce e yu ŋwɛ̀ Jus ghup yu ŋwɛ̀ ce e yu wa'a ba enjep ntee, bʉ̌ mini yu ba yì enjep ntee. Bʉ̀ anà yu ba rfà' ce à gèe ba Yʉ' Rara, a ke' ba yuu ce mncir vi ce làa ka'. E ke vʉse ba bèe vʉse njɛ̀ɛ ŋwɛ̀ anà ka'. Nyʉ̀ a ŋwɛ̀ ce e ke vʉse njɛ̀ɛ ŋwɛ̀ ca.

Currently Selected:

Ñwaè' Ruêm 2: LNT

Highlight

Copy