Ñwaè' Ruêm 1

1Ŋwà' ca ce saŋ mɛ̌ Pol ce m yu ŋwɛ̀ rfà' nè Jisos Krâis. Nyʉ̀ à m ce mɛ̀ enɛ m ba ŋwɛ̀ ntuu nè Jisòs, a fʉr mɛ̀ enɛ m fe'shi yì Nsuŋ Mbòŋmboŋ nè bèe. 2Nsuŋ mbòŋmboŋ ca yu nsuŋ ce Nyʉ̀ à m kà' nè bèe. E m làa, ŋgǎa ncep ntuu Nyʉ̀ a saŋ mbe Ŋwǎ' Nyʉ̀ ce yi yu rara. 3Nsuŋ mbòŋmboŋ ca kùu muu yì ce Jisos Krǎis ce e yu Tata nè sèe. À ka' ba àmbò li rbi, a m bi ye mbe ndʉ̀' Dɛvìd. 4À ka' ba yi àmbò yi yʉ' ce yi yu rara, Tata Nyʉ̀ à fʉr Jisòs efa rkwe a yě ŋger, à rdùŋshi enɛ e yu muu yì. 5Yu njo' Jisòs ce Nyʉ̀ à tʉr mɛ̀ à ntee bòŋboŋ, a fa mɛ̀ fɛŋ à rba ŋwɛ̀ ntuu, tɛ běe à bto' wɛɛwɛ a bo byemi nè ye, yu'ni nè ye, nàa ye mbekì. 6Wee wèe yu à mʉ̀ bèe ce Nyʉ̀ à ce enɛ a ba bèe Jisos Krâis.

7M ce saŋ ŋwà' ca nè wèe wɛɛwɛ ce wèe yu à rla' Rûm, ce Nyʉ̀ à kòŋ wèe, a kɛ' wèe enɛ wèe ba yì bèe. M ce loo mɛnɛ Nyʉ̀ ce e yu yìsèe Ta ker ba Tata Jisos Krǎis tʉr wèe à ntee bòŋboŋ ker fa wèe cumʉnyaŋ.

8Tɛ m ka' làa buu mò', m ce yòŋshi yà Nyʉ̀ à rlii Jisos Krǎis njo' wèe wɛɛwɛ, njobè' bèe a ce suŋ àmbò le rbyemì à bdì' wɛɛwɛ. 9Nyʉ̀ ce m ce fà' nè ye nè ya ntee wɛɛwɛ àmbò m ce fè'shi Nsuŋ Mbòŋmboŋ àmbò muu yì na, rìŋ enɛ m ce loo nè wèe à nfè' wɛɛwɛ. 10M ce loo mɛnɛ Nyʉ̀ à ka' byemi, e fa mɛ̀ fɛŋ sè'ni tɛ m vʉ yɛ wèe. 11M ce kòŋ à ryɛ wèe sê, tɛ m bo koni bghònì ce à yʉ', tɛɛ tatap. 12Yi yu enɛ sèe ja' visèe mnyor. M be tʉr ŋger njo' le rbyemì tɛ wèe tʉr ŋger njo' la rbyemì.

13Bfʉr wâ, m ce kòŋ mɛnɛ wèe riŋ enɛ yu nfè' magòr ce mɛ ke lò kwa'shi enɛ m vʉ yɛ wèe. caar ba' ntìni na, mɛ̌ kwà'shi wa'a, yuu mo' yi ku jepsi mɛ̀. M ce kòŋ à rgèe tɛ bèe a byemi nè Jisòs tɛ la rfà' li ba nè sɛ'-ŋwɛ̀ a wěe mʉ àmbò li yu nè bèe enje jɛɛ foŋ nà. 14Yu ya dì' enɛ m fe'shi Nsuŋ Mbòŋmboŋ nè bèe wɛɛwɛ; m be fè'shi nè bèe Grêk, ba nè bèe ce a yu bèe Grěk ka', ker ba nè bèe ce a rìŋ ŋwà' ba bèe ce a rìŋ ŋwà' ka'. 15A mbùu ce mɛ̀ lɛ̀ ntee à rfè'shi Nsuŋ Mbòŋmboŋ nè wèe ce wèe yu à rla' Rum foŋ.

16Rìtu yi ce koo mɛ̀ nè Nsuŋ Mbòŋmboŋ ca ka'. Nsuŋ Mbòŋmboŋ ca yu ŋger Nyʉ̀ ce yi gèe bèe ce a byemi a lûŋ. Ca yi yu entombì nè Jûs, a ka' ba foŋ nè bèe enje jɛɛ. 17Nsuŋ Mbòŋmboŋ ca ce dùŋshi sèe njɛ̀ɛ njì ce Nyʉ̀ e ke gèe bèe a ba byɛɛnì a yě bsii. Njɛ̀ɛ njì anà à kɛ̀' nè rbyemì, a misi nè rbyemì. Yi ku ba àmbò a saŋ mbe Ŋwǎ' Nyʉ̀ enɛ̂, “Ŋwɛ̀ ce e yu yɛɛnì à bsii Nyʉ̀ njobè' e byemi nè ye, ŋgàŋ be lùŋ.”

18Nyʉ̀ ce ko'si rshentee nè bèe ce a gèe buu bbebep nè ye, a ker ce gèe nè bee mò' foŋ nà. Yàp buu bbebep anà ce jepsi bèe efa rrìŋ yuu mini. 19Nyʉ̀ ce ko'si li rshentee njobè' buu wɛɛwɛ ce àde' bèe a riŋ àmbò ye vi yu brara nè wowèe. Nyʉ̀ ye ye à dùŋshi wowèe buu anà. 20Kɛ̌' à nfè' ce Nyʉ̀ à m gèe ŋgòŋ, buu ce Nyʉ̀ à m gèe vi ce dùŋshi bèe buu ce àde' wowèe a m ba riŋ kuu ye ka' nà. Vi ce dùŋshi bòŋboŋ sê, enɛ e tʉr ŋger ce àde' yi ke mi ka', a ker ce dùŋshi foŋ enɛ e yu Nyʉ̀. Banɛ njì mò' yu àgho ce àde' wowèe a fʉr yap tu ka'. 21Ka' wowèe a rìŋ Nyʉ̀ wa'a, wowèe a ce kù'si ye ka', a ker ce yòŋshi ye ka'. Yi ka' ba wa'a, bfee vi jep wowèe, wowèe a riŋ yuu ka'. 22Wowèe a m ce làa enɛ wowèe a tʉr bfee, a kʉti ba blʉr. 23Wowèe a m borni efa rloo nè Nyʉ̀ ce e yu ŋwɛ̀ fòo a ker ba Nyʉ̀ ce e ke kwe ka', a ce loo ba nè blaŋ ce a sòp vi feesè ŋwɛ̀ ce e ke lò ku kwe, ba bsiŋ ba mnyàa ker ba buu ce vi tʉr mnyǒr ka'.

24A mbùu ce Nyʉ̀ à mà'shi enɛ wowèe a gee buu bbebep àmbò wowèe a ce kòŋ à rgèe. Wowèe a ce gèe buu ce vi yu nè rìtu-ŋwɛ̀ nè wap mnyor, a wǎp mʉ. 25Wowèe a mà' mini Nyʉ̀, a lor ba mnde'. Wowèe a ce loo ba nè buu ce Nyʉ̀ à m gèe, a ce fà' ba nè buu anà, a ke' ce loo nè Nyʉ̀ ce e m gèe buu anà ka'. Yu ye ce bèe a ba ce yòŋshi à nfè' wɛɛwɛ. Yi yu wa'a.

26Yi ka' ba wa'a, Nyʉ̀ à ma'shì enɛ wowèe a gee buu ce a ce kòŋ à rgèe, à ba buu ce vi yu nè rìtu-ŋwɛ̀. Bbyèŋge a kupse yuu ce ŋwɛ̀ à ba gèe, a ce gèe ba yuu ce ŋwɛ̀ à ba gèe ka'. 27Mmbaŋrù wowo a bornì efa rnòŋ a bbyèŋge wèe, a ce lùu à rnòŋ ba a mmbaŋrù mo' wèe, a ce gèe buu ce vi yu nè rìtu-ŋwɛ̀ sê. Wowèe a kɛ' ŋgɛ' mbe wǎp ndù, à ba ŋgɛ' ce e ghɛɛte à yàp buu bbebep anà.

28À ka' ba njobè' bèe ca a kani efa rrìŋ Nyʉ̀ àmbò yàp Nyʉ̀, Nyʉ̀ à ma'shì wowèe a ce kwà'shi ba mkwà'shǐ mmbembep tɛ wowèe a bo gèe buu ce vi yu yɛɛnì ka' na. 29Yap ntee yi ruu nè buu bbebep njɛ̀ɛ jɛɛ jɛ̀ɛ jɛɛ. Wowèe a ce gèe bsàrbuu. Wowèe a lɛ mmir mbendù buu bèe mo', a ce kwà'shi bebep àmbò bèe mo'. Wowèe a ce ko'ndoŋ, a ce yʉshi bèe, a ce rè bkòr a bèe wèe, a ce bo' bèe, a tʉr mntee byayaŋ nè bèe, a ce cʉ̀ bèe, a ce sa' bèe. 30Wowèe a bàa Nyʉ̀, a ce nyʉ̀' bèe, a ce nàa tu, a ce yu' nyor, a ce kwà'shi mnduunjì jɛɛ jɛ̀ɛ jɛɛ ce àde' wowèe a gee buu bbebep. Wowèe a ce yu'ni nè wap mma ba wap bta ka'. 31Wowèe a rìŋ yuu ka'. Wowèe a kà' yuu, gee yuu anà ka', a ce kòŋ bèe ka', a ce koosimnse nè bèe ka'. 32Wowèe a rìŋ enɛ Nyʉ̀ ce làa enɛ bèe ce a ce gèe njɛ̀ɛ buu ca a ghɛɛte à rkweŋgèr. Ka' wowèe a rìŋ wa'a, wowèe a ku ce gèe yap yu buu ca. Yuu ce yi bep sê, yi yu enɛ wowèe a ce làa enɛ bèe ce a ce gèe njɛ̀ɛ buu ca a gèe yɛɛnì.

Currently Selected:

Ñwaè' Ruêm 1: LNT

Highlight

Copy