LUKA 14

Sabatha. Boikokobetšo. Selallo se segolo. Go latela Jesu

1Ya re ge a etla ngwakong wa e mongwe wa bagolo ba bafarisei go ja bogobe ka Sabatha, a hwetša ba motheile. 2A bona a lebane le monna e mongwe wa go kukumoga mmele ka bolwetši bja mokebe. 3Jesu a ba raka pele a botšiša bamangwalo le bafarisei bao, a re: A go dumeletšwe go fodiša motho ka la Sabatha?

4Bona ba homola. Jesu a mo swara ka seatla a mo fodiša, a mo lesa a ikela. 5Ya ba gona a boletšego le bona a re: Ke mang mo go lena yo e rego ge pokolo ya gagwe, le ge e le kgomo ya gagwe, e wetše moleteng, e a ka se kego a akgofa a e ntšha le ka letšatši la Sabatha?

6Ba šitwa go fetola selo tabeng yeo.

7Ge a bona ba ba biditšwego ba ikgethela madulo a ka pele, a ba botša seswantšho a re: 8Ge o laleditšwe wa tla monyanyeng wa tšeo, o se ke wa dula sedulong sa ka pele; gore e se be mohlomongwe go laleditšwe e mongwe e a go fetago. 9Gomme e a laleditšego wene le yena, a tla a bolela nago a re: Šuthela yo sebaka! Ya ba gona o tlo go tšea sebaka sa ka morago ka dihlong. 10Ge o laleditšwe, o ye o dule sebakeng sa ka morago, gore e a go laleditšego ge a tla, a bolele nago a re: Mogweraka! Fetela kwa pele! Ke mo o tlo go godišwa ke ba ba dutšego dijong le wene. 11Gobane bohle ba ba ikgodišago ba tlo kokobetšwa; e a ikokobetšago o tlo godišwa.

12Le eo wa go mo laletša, Jesu a bolela nae a re: Ge o lokišitše sefihlulo le ge e le selalelo, o se bitše bagwera ba gago, le ge e le bana beno, le ge e le metswalo ya gago, le ge e le ba geno ba bahumi, e se be gore le bona ba go bitše, ya ba go boelwa ke tše o ba neilego tšona. 13Ge o dira monyanya o bitše bahumanegi, le digole, le bahlotši, le difofu. 14Ke mo o tlo go ba wa lehlogonolo ka gobane bona ga ba na se ba kago go bušetša sona; go bušetšwa wa tlo go bona mohla bahu ba tsogago.

15E mongwe wa ba ba bego ba dutše dijong, ge a kwile tšeo, a fetola a re: Wa lehlogonolo ke eo a tlo go ja bogobe mmušong wa Modimo.

16Jesu a re: Motho e mongwe o be a dirile selalelo se segolo, a laleditše bantši. 17Ka lebaka la go lalela a roma mohlanka wa gagwe, a re a yo bitša balalediwa, a re: Tlang, gobane tšohle di lokišitšwe. 18Ba latola ka moka ka o tee ka o tee; wa pele a re: Ke rekile tšhemo; mme ke swanetše go yo e bona. Ke a go rapela, o ko mpolelele o re ga ke tle. 19E mongwe a re: Ke rekile pholo tša yoko tše tlhano: mme ke ya go di leka. Ke a go rapela, o ko mpolelele o re ga ke tle. 20E mongwe a re: Ke nyetše mosadi; ke sona se se ntšhitišago go tla.

21Mohlanka eo a boa a di botša mong wa gagwe. Mong wa ngwako a befelwa, a roma mohlanka wa gagwe a re: Akgofa o tšwele mekgotheng, le mapatlelong a motse, o boe fa o na le badiidi le digole le dihlotša le difofu. 22Mohlanka a tla a re: Morena, go dirilwe ka mo o laetšego ka gona; fela, go sa na le sebaka. 23Morena a re: Tšwela kua ditseleng le dikgoreng, o ba phegelele gore ba tsene, ngwako wa ka o tle o tlale. 24Gomme ke a le botša, le o tee wa banna bala ba ba bego ba laleditšwe a ka se ke a leka selalelo sa ka.

25Ya re ge mašaba a mantši a sepela le yena, a retologa a bolela le bona a re: 26Ge motho a etla go nna a sa hloye tatagwe le mmagwe le mosadi le bana le bana babo le dikgaetšedi, le bjona bophelo bja gagwe, a ka se ke a ba morutiwa wa ka. 27E a sa rwalego sefapano sa gagwe a tla a ntšhala morago, a ka se ke a ba morutiwa wa ka.

28Gobane ke mang mo ga lena, yo e rego ge a rata go aga morako o motelele, a se thome a dula a bala tšhelete ya gagwe, a tle a bone ge a na le ye e lekanetšego go tlo phetha modiro woo? 29E se be mohlomongwe ge a beile motheo a šitwa go phetha; a tloga a kwerwa ke bohle ba ba di bonago, 30ba re: Motho e o thomile go aga; mme o šitilwe go phetha.

31Goba kgoši ke efe, yeo e rego ge e tšwela kgoši e nngwe dira, e ka se kego ya thoma go dula ya eleletša ge go tlo kgonega ge a ka tšwa le ba dikete tše lesome a yo gahlana le e a mo tšwetšego le ba dikete tše masome a mabedi? 32Ge a bona go sa kgonege, o tlo roma batseta, a loba yola a sa le kgole. 33Go bjalo le mo go lena; e a sa fularelego tšohle tše a nago natšo, a ka se ke a ba morutiwa wa ka.

34Letswai ke selo se botse; fela, ge le tapa, le sa tlo nokwa kang? 35Ga le sa na modiro mo tšhemong le mo moroleng; ba le lahlela kgakala. E a nago le ditsebe tša go kwa a a kwe.

Currently Selected:

LUKA 14: NSO51

Highlight

Copy