Maki 13

Ra mono no tapage hugahie hu'nea naneke

(Mat 24:1-2, Luk 21:5-6)

1Ra mono nompinti atiramigeno, amage'ma nentaza disaipol nagapinti mago'mo anage hu'ne, Hurami ne'moke, asinentike havereti hiro naro nontamina ki'nazanki ko! 2Higeno Jisasi'a anage huno zmasami'ne, tamagra ama hironaro nontami negazo? Mago havemo'a, mago havemofo agofetura omane'tfa hugahie. Mika havemo fragu vazi ramigahie.

Maka'zama vgarenaku hania knafi fore hanizamofo naneke

(Mat 24:3-14, Luk 21:7-19)

3Anante ra mono nomofo kantu kaziga, Olive agonare Jisasi'a marerino umaninege'za, Pita'ma, Jemisi'ma, Joni'ma, Endru'ma hu'za zamagrake emanine'za Jisasina antahige'naze. 4Tagrira tasamio, nankna zupa anazana fore hugahie? Anazama fore hunaku'ma hanigeno'a, nankna avame'za fore hinketa ketenunkeno ana knazana fore hugahie? hu'za hu'naze. 5Jisasi'a agafa huno zmasami'ne, mago'mo havige huno tmavareno havi kante vu'zankura, kva hiho. 6Rama'a vahe'mo'za Nagri nagifi ne-eza anage hugahaze, Nagra ana ne' ama'i neoe nehu'za, rama'a vahe havi kante zmavrentegahaze. 7Hanki ha'ma hania kema nentahita, ha'mofo zaho nanekema antahi sanuta korora osiho. E'ina hu'zana fore hugahie. Hianagi vgare kna ome'ne. 8Hanki anantera mago kumate naga'mo'za, oti'za mago kumate nagara zmahegahaze. Mago kaziga vahe'mo'za oti'za, mago kaziga vahera ha' rezmantegahaze. Ana nehnageno mago'a kumapina imi e'nerisigeno, mago'a kumapina agate'za fore hugahie. Ama anazamo'a, a'moma mofavre kasentenaku higeno, agafa huno ata negriankna ataza fore hugahie.

9 Hanki tamagra tamia kva hutma maniho. Kanisol vahete tmavare'za nevu'za, osi mono nompi tamavre'za knonkeve ome nerami'za, rankuma kva vahete'ene kini vahe zamavure tmavrentesageta otigahaze. Na'ankure nagriteku ana hanageno, e'i anazama fore'ma haniana nagri nagenkema eri'ama hutma nezmasami'za zanteku fore hugahie. 10Hanki esera maka mopane mopanena vahe'mo'za knare musenkea huama hanageno antahi vgaretesageno'e. 11Keaga hurmanteku tmazeri'za vnagetma, na'ane huta hugahune hutma antahintahi hakare osiho. Ana knafima hiho hunoma hania nanekea amane hiho. Na'ankure ana nanekea tamagra'a osugahazanki, Ruotage Avamumo hugahie. 12Ana knafi nefuna ahe frinogu avare nezaminkeno, nefa'a nemofona avreno ahe frinogu anazanke nehinkeno, mofavremo'za anazanke huza nerera nefana zmahe frinogu avare zamigahaze. 13Maka vahe'mo'za tmagrira zmarimpa kna hunermante'za ha' reramantegahaze. Na'ankure Nagri nagimo'a tmagripi me'negu hu'za anara hurmante'gahaze. Hianagi iza'o oti hanavetino manino vu refarega vanimofona agu vazigahie.

Maka'za agtereno haviza hania zamofo naneke

(Mat 24:15-28, Luk 21:20-24)

14Jisasi'a anage huno zmasamine, nanekema hampri snamota, nehamprita ama hiho. Tusi'a havizantfa huno agotenesizamo, agra otiga osu'nenia trate otina, ana knazupa Judiama mani'nesaza veamo'za freza agonare viho. (Dan 9:27, 11:31, 12:11) 15Nomofo agofetuma mani'nesamo'za, uramiza nompintira mago'a zana eriza atioramigahaze. 16Hozafima mani'ne snimo'a, kuma'aregati kukena'a eme e'orino, koro fregahie. 17Ananknafima amu'ene hu'nesnia a'negu'ene, mofavre aminte mani'nesnia a'negura, nasunku huzmantoe. 18Hianagi nunamuna nehinkeno, tusi'a zasi knafina anazana forera osino. 19Na'ankure ananknafina tusi'a knaza fore hugahie. Anumzamo mopa tro hu'nereti eno menima ehanatinerera, fore osu'neankna knaza fore hugahie. Hagi henka'a ana hukna knaza fore osutfa hugahie. 20Ramo'a ana knama eri atupa osanigeno'a, mago'a vahera omanigahie. Hianagi Nagri vahere hunefinti huhampri'nea vahekuma agesama antahiteno, ana kna eri atupa hugahie. 21Ana knafi mago'a vahe'mo'za hu'za, keho ama'i kraisi'e huge, agra antu mani'ne hanigetma tamentintia osutfa hiho! 22Na'ankure ana knafina mago'a havige kraisi'e huza efore nehu'za, kasnampa vahe efore hu'za, haviza hu'za kagu'vazane avame'za hugahaze. Anama hanazana Anumzamo'ma huhampri zmante'nea vahe'mokizmi, rezmataga hu'naku hugahaze. Hianagi zmagra Anumzamo'ma huhampri zmantenea vahe zmazeri savari hu'naku anara hugahaze. 23Hagi tamagra kva hutma maniho! Ana maka'zana fore osunege'na, tamagrira neramasamue.

Vahe'mofo Mofavremo ete esianknamofo naneke

(Mat 24:29-31, Luk 21:25-28)

24 Hianagi ana knafina tusi'a knazamo vgama resigeno'a, zagemo hani hanigeno, ikamo'a remsa osanigeno, 25monafinti hanafi tamimo'za atafri neraminke'za, monafi me'nea hanave zantamimo'za tore hugahaze. (Aisa 13:10, 34:4, Joel 2:31-32) 26Anante Vahe'mofo Mofavremo'a hampompi, tusi'a hihamu'ane msa'afi ne-esigeta kegahaze. (Dan 7:13) 27Anante ankero vahe'a huzmantena, Anumzamo huhampri zamante'nea vahera mona mopa ome tre emetre kazigatira ome zmavare eme zmavare hu'za zmazeri atru hugahaze.

Fiki zafamofo fronka naneke

(Mat 24:32-35, Luk 21:29-33)

28 Ama fronka kema fiki zafare'ma hanua fronka kereti antahizana eriho. Azanku'namo asinareno amosrema nehegetma, hago zgegna tava'o nehie hutma nentahize. 29Tamagra anahu zama fore'ma hanigetma negesnutma, hago Vahemofo Mofavre esia kna'a tava'o huno kafante me'ne hutma tamagesa antahiho. 30Tamage hu'na tamagrira neramasamue. Ama knafi veamota ofri mani'nesnageno, ana zana fore hugahie. 31Monane mopane fanane hugahianagi, Nagri nanekemo'a fanane osu mevava hugahie.

Jisasi'ma esia kna mago vahe'mo'e huno ontahine hu'nea naneke

(Mat 24:36-44)

32 Hianagi mago vahe'mo'e huno anazama fore'ma hania knane zgenena ontahi'ne. Monare nemaniza ankero vahe'mo'za ontahi'zageno, Mofavre'amo'a ontahi'ne. Nenfa Agrake ana kna antahi'ne. 33Kva hunetma retro hutma maniho. Na'anakure tamagra anazama efore'ma hania kna ontahi'naze. 34Amanahu hugahie, mago ne'mo afete vunaku, kazokzo eriza vahe'a noma'a kegva hiho hunezmanteno, magoke magoke eri'za vahe'a eri'za refko hunezamino, kafante kva nekura kavu antenka maninenka kva hu so'e huo huno hunte'ne. 35E'ina hu'negu tamagra anahu kna huta, kva hu so'e huta maniho. Nomofo nfa'amo esnia kna ontahi'naze. Kinaga esifi, kenage amu'no esifi, kokore ke nehinkeno esifi, nantera esifi ontahi'naze. 36Aru mase nenageno, ame huno eno eme tamageno eri fore hanigi, kva hutma maniho. 37Hanki tmagri'ma neramasmuana mifka veaku nehue. Kva huso'e hiho.

Currently Selected:

Maki 13: kbq

Highlight

Copy