Matiu 10

12fu'a Aposol naga huzmantege'za vu'za e'za hu'naza naneke

(Mak 3:13-19, Luk 6:12-16)

1Jisasi'a amage'ma nentaza disaipol nagara zamagi hige'za ageno, zamagrama hankro'ma ahe natinetre'za, ruzahu ruzahu krima zamagu'afi me'nea vahe'ene, krima erinesaza vahe'ma zamazeri so'e hanaza hanavea zami'ne. 2Ana 12fu'a aposol naga'mokizmi zamagi'a ama'ne, Pusana, Saimoni'e (Pita'e huza nehaze) Andru'e agri negna'e, Jemisi'e Zebeti nemofo Joni nefu'e. 3Filipiki Batolomiuki Tomasiki Matiu zamagire takesi zgo eneria nere, Jemisi Alfias ne'mofo ene, magora Tadiasi'e. 4Romu vahe ha' renezmantaza zaretie nehaza nagapinte nera Saimoni'e, hagi magora Judas Iskalioti Jisasima avrezmi'nea Aposolo nere.

Jisasi'a eri'za zami'nea naneke

(Mak 6:7-13, Luk 9:1-6)

5Jisasi'a ana 12fu'a aposol nagara hunezmanteno, amanahu ke huno zamavumro ante'ne, megi'a vahe'mokizmi kaziga oviho, ana nehutma mago Samaria vahe kumapina u'ofreho. 6Hianagi vnazana, Israeli vahe'ma fnane hu'nesaza vaheteke viho. 712fu'a aposol nagamota nevusutma, amana naneke hiho, Anumzamofo kumamo'a hago erava'o nehie, nehutma, 8kria eri amane nehutma, fri vahera zamazeri o'neti'tma, fugo namure'nea vahera zamazeri so'e nehutma, hankrora ahenatitreho. Hankavea amane tamuanki, amane zamiho. 9Magore hutma kolio, silvo, kopa tmasopare kupina eri'oritfa hiho. 10Nantuma vukura tmavate kutamia e'oriho, mago'a anakrekuro, tmaga none, azompanena e'oritfa hiho. Na'ankure eriza vahe'mo'ma upama haniazana amigahie. 11Osi taonifi vnazano, kumatema vnazana, haketma erifore hutma aza anampina knarera hu'neo, zamagrane maninetma, vukuma hanaza kna vugahaze. 12Hagi ana nompima unefresutma, tamagra musenkea huzmanteho. 13Kegeno ana nompi vahe'mo'ma knare'ma hanagenka, karimpa fru nanekea atregeno ana nonte meno. Hianagi knarema osnagenka, karimpa fru naneke ka'a atregeno kagripi meno. 14Hanki mago'a vahe'mo'zama muse hu'za tmareontege, nanekema hanazama ontahisagetma, anankumama netresutma tmagareti kugusopa arupopo hunetretma, ana kumara atretma viho. 15Tamage hu'na neramasmue, Anumzamo'ma keagama refako huzupa, Sodomune, Gomora kumate korapa hu'neazana, agatereno ranknaza erigahie.

Hakare knaza fore hania naneke

(Mak 13:9-13, Luk 12:12-17)

16 Antahiho, Nagrama humanermantoana afi kramo'za avite'za maninafi sipisipi afumo ufrea kna hu'na huneramantoe, hagi osifavemoma nehia kna hutma kva hunetma, knare antahintahi eneritma, maho namamo nehia avu'ava hutma mago havizana osiho. 17Hu'neanagi vahekura kvahiho, na'ankure kanisol vahete zamagra tamavre'za vuza keaga hunermante'za, osi mono nompi omermante'za sefukno tamigahaze. 18Ana nehu'za mago'ene tamavre'za Gavanane, kini vahetaminte vugahaze. Na'ankure tamagra Nagri namage'nentaza nagare. Hagi Nagri nanekea Jiu vahera nezmasamita, megi'a vahera anahu hutma zamasmiho. 19Hianagi tamagrima tamavre'za vnagetma, inankna keaga hugahune hutma tamagesa ontahiho. Na'ankure nankna kema hanaza kea, anakna fatgore Anumzamo'a tmasamisnigeta hugahaze. 20Na'ankure tamagra'a ana keaga osugahaze. Hagi tamagri neramafa Avamumo tamagripi efreno hugahie. 21Nefu'a ami'mi huno nefuna azeri frigahie, nefa'a mofavre'a anazanke hugahie, hanigeno mofavre zgamo'a, arera afana ha'rezmanteno zmahe frigahie. 22Hakare vahe'moza Nagri nagima hesaza'zanku ha'reramantegahaze. Hianagi aza'o oti hanavetino refare'ma vanimofona agu'vazigahie. 23Hianagi mago kumate'ma vnageno tmazanva hanagetma atretma ru kumate viho. Tamage hu'na neramasmue, Israeli kumapina vuvga ore'nesageno, Vahe'mofo Mofavrea egahie.

24 Amage'ma nentea disaipol nemo'a rempi huzami nera agatereno mani anagamu otregahie. Kazokzo eriza nemo'a, kva ne'amofona agate'oregahie. 25Amne amage'a nentea ne'mo'a rempima humi ne'a knara hugahie, hanigeno kazokzo eri'za vahe'mo'a kva ne'agna hugahie. Hagi mago nagamofo ugotama huzmante'neasia ne'kuma ugagota hankrore (Belzabul) haniana, naga'amofonena mago'ane havi zamagi zamigahie!

Vahekura kore osunka, Anumzanku kore hunto.

(Luk 12:2-7)

26 Zamagrikura korera osiho, hakare fraki'neazana efore hugahie, hakare'zama oku'a me'neazamo'a efore hugahie. 27Nagrama hanimpima tmasamisua kea, msare zamasamiho. Hagi sumi kema tamagesafima antahisaza kea, nomoteti kezatitma hugahaze. 28Tamufama tamahe fri vahekura korera osiho. Hianagi tamagu'a ahe ofrigahie. Anazanku kore'ma huntesanana, kagu'ane kavufane teve tirupima kre fanane hanimofo Anumzamofonku korera hunteho. 29Tare kisave nama azeriza osi zagorera netrafi? Ana hu'neanagi, mago zanimo'a mopafina negafa avesi zampintira asgahu orami'ne. 30Kanunte'ma me'nea kazokara ko miko hampri'ne. 31Ana hu'negu korera osuo, kagra miko kisave nama'zga zamagaterenka raza mani'nane.

Jisasi agenke huama hanuna naneke

(Luk 12:8-9)

32 Aza'o vahepi huama huno, Jisasi vahe mani'noe hanimofona, Nagra monafinka Nenfante agrira huama huna nagri vahe manine huntegahue. 33Hianagi aza'o, Nagrima vahepi hufra kisimofona, Nagra monafinka Nenfa avurera agrira hufra kintegahue.

34 Nagrama e'noa zankura rimpa fruza erino ama mopafi e'ne hunka kagesa ontahio. Nagrama e'noana rimpa fruza erina ome'noe, hagi ha' kazi bainati eri'na e'noe. 35Na'ankure Nagrama e'noana vahe kankamu retro hanenkeno nefana ha' rentesigeno, mofa'amo nerera ha' rentesigeno, Nenofero'a a' nenofero ha' rentesigeno, 36hagi ana ne'ma ha'ma rentesazana agri'a naga'amoza otiza hara rentegahaze. 37Aza'o nefano, nererama avesinte zamo'ma ra hanigeno, Nagrima avesinante zamo osima hanimo'a, Nagrima namage'ma antezantera knarera osugahie. Hanigeno aza'o ne'aguro mofa'aguma avesinte zamo'ma ra hanigeno, Nagrima avesinante zamo osima hanimo'a, Nagrima namage'ma antezantera knarera osugahie. 38Hanigeno iza'o keka zafa'a erisaga huno namage ontesimo'a, Nagrima namage antezantera knare osu'ne. 39Iza'o agra'a nomanizama'are asimu'a atresimo'a, asimura e'origahie. Hagi iza'o Nagriku huno nomanizama'a atresimo'a henka'a asimura erigahie.

Museza erisanaza naneke

(Mak 9:41)

40 Iza'o kagrima kavaresiana, Nagri navaregahie. Hagi aza'o Nagrima navaresimo'a, hunantegena e'nomofo avaregahie. 41Aza'o ksanampa ne'mofo agifi kasnampa ne' avaresimo'a, kasnampa ne'mo erisa avamente mizana erigahie. Aza'o fatgo ne'mofo agifi fatgo ne' avaresimo'a, fatgo ne'mo erisia avament mizana erigahie. 42Hagi azago zasi tintafama taginka namage'ma nentaza nagapinti mago agima omane'nesi mofoma amisamoka tamagerafa hunka mizanka'a erigahane.

Currently Selected:

Matiu 10: kbq

Highlight

Copy