Joni 19

Paeroti'a Jisasina kinafinti azeri atre'naku hu'nea naneke

(Mat 27:15-31, Mak 15:6-20, Luk 23:13-25)

1Anante Paeroti'a huzmantege'za Jisasina sefu ami'naze. 2Anante sondia vahe'mo'za ave'ave nofite kini vahe'mokizmi fetorikna huza tro hute'za, Jisasi anunte antani nente'za, koranke kukena hunte'naze. 3Zamagra Agrite ete'vute nehu'za, Husga hunte'za ankaza nente'za, Keho, ama Jiu vahe'mokizmi kinia! Nehu'za avugosafi mago'ene ruhapa hapa hu'za ahe'naze. 4Mago'ene Paeroti'a ete atiramino, Jiu kva vaheku amanage huno zamasmi'ne, Keho, ama ne'ma nagrama avare'na tmagrite'ma neoana, antahisazana mago keaga Agri'ma hunte'zana omne'ne. 5Anante Jisasina ave'ave nofite fetori'ene, koranke kukena antani antetageno, atiramino e'ne. Paeroti'a anage hu'ne, Keho, ama Nera! 6Vugote'naza pris vahe'ene, mono no kegva nehza vahe'mo'za (gad) Agri'ma nege'za amanage hu'za kezati'naze, aheta hantiho, aheta hantiho! Hzageno Paeroti'a zamasmi'ne, Tamagratmi avretma rugeka zafare ome aheho, na'ankure nagra mago hazenke'a omne'nege'na negoe, huno zamasmi'ne. 7Jiu kva vahe'mo'za ke nona'a amanage hu'naze, Tagrira kasegetia me'ne, hagi ana kase kemofo amage' anteno Agra frigahie. Na'ankure Agra Anumzamofo Ne'mofavre mani'noe huno hu'ne. 8Ana kema Paeroti'a nentahino, tusiza huno agra mago'ene amanogura hu'ne. 9Eteno Paeroti'a kuma'afi ufreno, Jisasinku anage hu'ne, Kagra igati e'nane? Hianagi Jisasi'a magore huno agri kenona'a osu'ne. 10Ke osigeno, Paeroti'a anage huno asmi'ne, kema hunami'zankura nahigeno kave nosie? Kagra ontahi'nano, Kagri'ma katufe katre hanavene, rugeka zafare kahena hanti hanavema nagrama eri'noana? 11Jisasi ke nona'a asmi'ne, Kagra Anumzamoma hanavema onkamiasina, Nagri'ma kegva hunantega hanavea e'orintesine, hagi monafinkati ne'mo hanigenka anara hugahane. Na'ankure navreno kzampima eme ante'nemo'a, kagrira kagatereno tusi'a kumi hu'ne. 12Ana kema antahiteno'a Paeroti'a aza huno katufe atrenaku tusiza huno agesa antahi'ne. Hianagi Jiu kva vahe'mo'za kezati'za, kagrama ama ne'ma katufe atresunka, kagra Sisa knampa omni'nane! Mago'mo kini manigahue hanimo'a, Sisana ha' rentegahie. 13Paeroti'a ana kema haza nentahino, Jisasi avare fegi'a atreno naneke fgagohu trate umani'ne, ana kumamofo agi'a, Havereti simeni hunte'naza kumare nehaze, hagi Hibru/Arami kefina, Gabate hu'za nehaze.

14Jiu vahe'mo'za kinafinti zamare'nea knagu antahimiza nenaza (Pasova) ne'za retro tra hunaku nehzageno, zgemo'a feru asegeno Paeroti'a Jiu vaheku huno, Keho, ama tamagri Kinia! 15Anagema hige'za kezanke hu'za, Avretma viho, avretma viho, Agrira ahetma hantiho! Nehzageno Paeroti'a zamantahige'ne, Nagra, tamagri Kinia ahena hantisuo? Hige'za pris vahe'mo'za ke nona'a hu'za, Tagri kinia magora omni'neanki, Sisa agrake mani'ne. 16Anagema hzageno Paeroti'a Jisasina ahe'zama keka zafare hantihogu zamige'za Jisasina azeri'naze.

Keka zafare Jisasi ahe'naza naneke

(Mat 27:32-44, Mak 15:21-32, Luk 23:26-43)

17Anante Jisasi'a keka zafa'a erino, vahe anu zaferine nehaza mopare, Hibru kefina Golgote nehazare erino vu'ne. 18E'i anante Jisasina nehe'za, tare netrena ruga raga asopare znahe'za rugeka zafare nehanti'za, Agrira amu'nompi hanti'naze. 19Paeroti'a mago avona kreno, ana keka zafare hanti'ne. Anage huno kre'ne, JISASI'A NAZARETI NERE, JIU VAHE'MOKIZMI KINIE. 20Huno krente'nege'za hakare Jiu vahe'mo'za hampri'za ke'naze. Na'ankure Jisasima ahe'za hanti'naza mopa, rankuma tva'onte me'ne, ana kema krente'neana Hibru kefine, Latini kefine, Griki kefima huno ana avona krentene. 21Anante Jiu vahe'mokizmi vugota pris vahe'mo'za Paerotina asmi'za, Jiu vahe'mokizmi Kinie hunka onkrenka, hagi Agra'a huno, Nagra Jiu vahe'mokizmi Kinie huno hu'ne hunka kro hu'za asmi'naze. 22Paeroti'a ke nonazmire zamasmino, Inankna keo nagrama krente'noana hago krente'noe.

23Anante sondia vahe'mo'za, Jisasi rugeka zafare ahe'za hantite'za, amegati kukena'a eri refko hu'za 4'a kevu ante'naze, mago'mo mago kevu eritere hu'are, avate kukena'ama hati'nazana eri mago hu'za anagamuti hati'za fenkamu urami'naze. 24Hige'za sondia vahe'mo'za ke hugantu hugma hu'za, erisagnera osinkero, hagi satu zokago reta kesune, aza erisifi, e'i ana kemo Anumzamofo avon tafe'mo hu'nea ke eriama hu'ne, Zamagra amega kena'ni'a amu'no zamifi fagago hu'za eri'naze, zamagra nagri kenarera, taisi zokago re'naze. (Sam-Zga 22:18) Anama kre'naza kante anteza sondi'a vahe'mo'za ana kemofo eri knare hu'naze.

25Hianagi Jisasi ahe'za hanti'naza keka zafamofo agafafina, Agri nereraki, nererana nenunknaki, Klopas nenaro Mariaki, Magdala kumateti Mariaki hu'za oti'naze. 26Nerera'ene, amage' nentegeno avesi nentea disaipoli ne' ene anante oti'nakeno Jisasi'ma neznageno'a, Agra nereranku huno, A'moka ko, ama'ne kagri ne'mofavrea! 27Anante amage' nentea disaipoli neku hu'ne, Ko, kagri negrera'a ama'ne! Ana knareti agafa huno amage' nentea disaipoli ne'mo ana ara avreno noma'are vu'ne.

Jisasi fri'nea naneke

(Mat 27:45-56, Mak 15:33-41, Luk 23:44-49)

28Anama huteno'a, Jisasi antahino keno hiama maka'zamo hago vgaregeno, Anumzamofo avontafemo hu'nea kea eriknare huteno, tinku navenesie, huno hu'ne. (Sam-Zga 69:21) 29Mago mopa kavofi akake waini ti aviteno anante menege'za, kapuki eri'za hisopu zafare anakite'za, ana aka waini timpi rete'za (spons) erisaga hu'za agite ante'naze. 30Ana hzageno Jisasi'ma ana akake waini tima neteno'a, Agra hu'ne, Ha vgare! nehuno Agra kepri huno avamu'a atre'ne.

31Anante retrotra huknazmi me'negu hu'za, mni fruhu kna (sabat) efregahianki rugeka zafare kerfa'a omnesie hu'naze, (na'ankure kinafinti zamavre'nea knagu antahimiza ne'za nenaza knane, mni fruhu (sabat) knanena magoka ra kna'zmi me'negu hu'za,) Jiu kva vahe'mo'za huza, zamagia ru hantagi tenketa, anante fri kerfa eri mopafi atreta, erita vamneno hu'za Paeroti antahige'naze. 32Higeno sondia vahe'mo'za e'za, Jisasine znahe'za hanti'naza netremo'kizni znaga ru hantagi'naze, pusante mago'mofo ru'hantagiteno, mago'mofona henka ana hu'ne. 33Hianagi Jisasinte'ma e'za eme kazana, ko fri'nege'za tarega agia ruha'ontagi'naze. 34Hianagi mago sondia ne'mo krugru kevereti Agrira asopafi regeno, hantaka huno korane, avufa rimo'ene herfino evu'ne. 35E'i ana zama ke'nea ne'mo ama naneke huama huno kre'ne, agrama hu'nea nanekea tamage hu'ne, agra antahi'neno tamage huno nehie. Ana hanigenka kagranena anazanke hunka kmentinti hugahane. 36Na'ankure ama anazama fore hu'neana, Anumzamofo avontafepi kre'nea nanekemo nena'a fore hanigu huno, agri zaferina magore huza ruha ontagigahaze hu'ne (Sam-Zga 34:20) 37Ete mago avontafemo mago'ene huno, Zamagra zamuma kesazana, agri'ma krugru asopafi re'namofonte kegahaze huno hu'ne. (Sek 12:10)

Jisasima havegampi eri asente'naza naneke

(Mat 27:57-61, Mak 15:42-47, Luk 23:50-56)

38Anazama vgaregeno Arimatia kumateti ne' Josefe, Jisasi amage' nentea disaipoli ne'mo, Jiu kva vahe koro nehuno oku'a Jisasi fri'kerfa erino vanigu Paerotina antahige'ne. Antahigegeno Paeroti'a hugnare huntegeno agra vuno Jisasi fri'kerfa ome erino vu'ne. 39Nikodimasi mago kenage, Jisasinte e'nea ne'mo, Josefe'ene tragoteno eno, mana nentake msavena miane, alone, magopi tagi havia hu'nea masvena kna'zanimo 34 kilo'naza hu'nea erino vu'ne. 40Anante znagra Jisasi fri'kerfa eri'ne, ana masaventami avufare frente'ne, tvarave tafepi frikerfa'a kargina'e. Jiu vahe'mo'za vahe ase nezmante'za nehaza avu'ava hu'na'e. 41Anama ahe'za Agri'ma hanti'naza kaziga hoza me'negeno, anante ksefa havegana, vahera ase ozmante'naza havega ana hozafina me'ne. 42E'ina hu'negu Jiu vahe'mokizmi mni fru hunaku retro tra nehaza kna'zmi (sabat) atupa hige'za, ana tva'onte me'nea havegampi Jisasina eri'za ome asente'naze.

Currently Selected:

Joni 19: kbq

Highlight

Copy