Joni 13

Amage'ma nentaza disaipol naga Jisasi'a zamaga sese hu'nea naneke

1Menina kinafinti zamare'nea knagu antahimiza (Pasova) ne'za nekna atupa higeno, Jisasi'a antahi'ne, ama mopa atreno Nefantega vnia kna egeno, amage nentaza disaipol nagara, Agrama zamesi nezmantea zamo'a atupare ehnati'ne.

2Jisasi'a amage' nentaza disaipol naga'ane ne'za nenegeno, Hankromo (Sata) Judas Iskariot, Saimon nemofo rimpafi ha' vahe zamazampi komoru huno avrentesia antahi'zana eme ante'ne. 3Jisasi'a antahi'ne, Nefa'a maka'zana Agri azampi ante'ne, Anumzamofonteti e'neankino, ete Anumzamofonte vugahie. 4Ne'za nenafinti otino, anakre ku'a zafi nenteno, tauri erino afafafi rugagino anakine. 5Anante Jisasi'a zompafi ti taginteno, amage nentaza disaipol naga zamaga agafa huno sese huteno, afafafi rugagi'nea taurinu zamagia eriho'mu huzmante'ne. 6Anante Saimon Pitante aga sese hunte'naku egeno, agra Jisasinku anage hu'ne, Ramoka nagia sese hugahano? 7Jisasi'a kenona anage huno asmi'ne, menima ama nehuazana kagra ontahi'nane, hianagi henka'a antahi ama hugahane. 8Pita'a anage huno Jisasina asmi'ne, Kagra nagia sese osu'tfa hugahane! Jisasi anage huno kenona'a hu'ne, Nagra kagiama sese osnugenka, Nagranena omnigahane. 9Saimon Pita'a anage huno Jisasina asmi'ne, Ramoka nagiarfana sesera osuo, hianagi anazanke hunka nazane, nanune sese huo! 10Jisasi'a anage huno asmi'ne, iza'o ko'ma tima fre'nemo'a, agiage sese hugahie, e'ina nehuno avu sese huno mani'gahie. Hanki kagra ko avu sese hu'nane, hianagi ana maka'mota avu sese osu'naze. 11Na'ankure mago'mo komoru huno ha' vahe zamazampima avrentesimofona, Agra ko antahi'ne, e'ina hu'nea agafare, tamagra maka'mota avu sese osu'naze hu'ne.

12Anage huteno Jisasi'a zamagia sese huvga rezmantete'no, Nakre ku'a erino mani'neno hu'nere umniteno, Jisasi'a anage huno zamsmi'ne, amazama tmagri'ma hunermantoana antahi'nazo? 13Tamagra Nagrikura rempi hurami Ne'ene, Rantie nehazana, tamagra tamage nehaze, Nagra ana nere. 14Nagrama Rantimi manina, hurmasmi Ne'mona tmagia sese hunermantesugeta, tamagra nena anazanke huta rumokizmi zamagia, sese ohunte ahunte hiho. 15Nagra hurmeri nehuanki, tamagranena anahu kna hutma rumokizmi'a zamagia sese huzmantegahaze. 16Tamage hu'na Nagra nermasmue, kazokzo eri'za vahe'mo'a kva'amofona agateoregahie. Kema erino vnimo'a, katogema huntegeno vu'nemofona agateore'ne. 17Tamagrama amazama keta antahita nehuta, anazama hanutma asomu erigahaze.

Jisasima komoru hu'za ahesaza naneke

(Mat 26:20-25, Mak 14:17-21, Luk 22:21-23)

18 Makamotagura nosue, Nagra huhampri'noa vahera antahi'noe. Hianagi Anumzamofo avontafepi kre'nea nanekea eri knare hugahie. Nagrane breti nenemo ha' renantegahie huno kre'neana, hago avufga'a fore hugahie. (Sam-Zga 41:9) 19Meninena Nagra anazana efore osu'nege'na neramasmue, anazama efore'ma hanigeta, tamagra tamentinti nehuta, ana nere hutma Nagrikura hugahaze. 20Tamage hu'na neramasmue, Nagrama huntesugeno vnia vahe, avreno azeri so'e huntesimo'a, Nagri navreno nazeri so'e hunantegahie. Iza'o Nagri'ma nazeri so'e hanimo'a, Agra hunantege'na e'nomofo azeri so'e hugahie.

21Jisasima anage huvgama reteno, agu'amo kna nehigeno anage hu'ne, Tamage hu'na nermasmue, tamagripinti mago'mo ha' vahe azampina navre antegahie. 22Amage nentaza disaipol naga'mo'za zamagra zamagra oge age nehu'za, inamo anara hunaku higeno nehie hu'za hu'naze. 23Amage' nentaza disaipol nagapinti, Jisasi'ma avesi nentemo, azantmaga kaziga tvaonte mani'ne. 24Ana higeno Saimon Pita'a avesima nentea disaipol ne'ra avame'name huno, izanku Jisasi'a nehifi antahigenka ko huno asmni'ne. 25Anante avesima nentea ne'mo, Jisasi asumpi mase kantiteno, anage huno Agrira antahige'ne, Ramoka ana nera iza'e? 26Jisasi'a kenona anage hu'ne, bretima sosifima rete'na amisuana e'i ana nere, nehuno bretia sosifi reteno, Saimon Iskarioti nemofo Judasina ami'ne. 27Ana bretima netegeno, Sata'a havi avamumofo kvamo agu'afi ufre'ne. E'ina nehigeno Jisasi anage huno asmi'ne, ina knazama hunaku'ma hnunka, kvune antenka huo. 28Mani'ne'za ne'za ne'naza vahe'mo'za, anama Judasinku'ma hia kea na'a agafare hu'nefi, antahi amara osu'naze. 29Judasi zgo taferote (bogisi) kva nehia neki'za, mago'amo'za antahizana mago'a upama hunona ne'za ome miza sege, amunte omne vahe, zgo ome zaminogu Jisasi'a hunente hu'za zamagesa antahi'naze. 30Ana higeno, Judasi'a bretima nehana nehuno'a, atiramino megi'a vu'ne. (Ko hani hu'negeno ana hu'ne.)

Kasefa tvumro tante'nea naneke

(Mat 26:31-35, Mak 14:27-31, Luk 22:31-34)

31Judasi'ma megi'a vute'geno, Jisasi anage hu'ne, menina Vahemofo Mofavremo ra agi erisigeno, Anumzamo'a ra agi Agriteti eri'nia kna ne-e. 32Anumzamo ra agi Agriteti eritesuno'a, anazanke huno Anumzamo ra agi Agrira amigahie, nehuno hantaka'a ra agi amigahie. 33Mofavre zgamota antahiho, Nagra osi'a knafi tamagra nena manigahue. Tamagra Nagrikura hakregahaze, Jiu mono kva vahera anankea ko zamasmi'noe. Meninena ana kege nermasmue, Nagrama inantega vnurega tamagra omegahaze. 34Nagra kasefa kasege tamagrira neramue, Nagrama navesi neramantoa kna huta rumokizmia zmesinezmanteta, anahu kna hutma ovesinte avesinte hiho. 35Tamagrama mago'mofo ovesinte avesinte nehnage'za, maka vahe'mo'za nege'za, tamagra Nagri namage nentaza disaipol naga mani'naze hu'za hugahaze.

36Saimon Pita'a anage huno Jisasinku hu'ne, Ramoka, kagra iga vunaku nehane higeno? Jisasi'a ana kenona'a huno, Nagrama vanurega, menina kagra navaririnka omegahane, hianagi kagra henka egahane. 37Pita'a anage Jisasinku hu'ne, Ramoke, na'a hanige'na nagra menina Kagri kmagera omegahue? Nagra Kagriteku hu'na frinaku menina tro nehue. 38Jisasi'a kenona'a anage huno asmi'ne, Nagriku hunka frigahano? Tamage hu'na negasmue, Nagrikura onke'noe hunka 3'a zupa vahane hutesankeno, henka kokoregea hugahie.

Currently Selected:

Joni 13: kbq

Highlight

Copy