Madiu 20
20
Faha ana tofaisewa adi gahetalahobuhobu.
1Kadu'e Yesu gigahe gigayo, “Yaubada yana yo'ogaga ana luku hidede amine. Tonifaha lakahina gimiyami tu mala gilauna gihobu be gina yana faha ana tofaisewa ginaleledi. 2Kaliva tufoidi ginuhagadi-yo adi laufata buye hilukahihiyena higa vaita aiyeta sa'eyana fatana ginaveledi, ada au yana faha againe gi'iveninisedi.
3Gimiyami tu kauwana gilaka au gina kaliva velugadiyao melaleya himiyamiya-kawowo ma gi'itadi. 4Gigahedi gigayo, Kadu omi'iyao ma wanana yaku faheya wanafaisewa be fata hagihagina ganavelemi.
5Au badi hina tu kauwana getadeya kadu kauwana giwahivekenana amine gina kaliva givaidi. 6Ada mala gilavina amine kadu gihobu kaliva tufoidi melaleya himiyamiya-kawowo gi'itadi-yo gigahedi gigayo, Gavadi-yo wamiyamiya-kawowo tu mala a gilavina?
7Badi higayo, Keke tamo hakwadi faisewa gidavelema. Bana gigayo, Au kadu omi wanana yaku faheya wanafaisewa.
8Badi hina tu mala a gibogi-yo tonifaha yana tofaisewa adi to'itave'avina gigahena gigayo, Tofaisewa unayowanidi be adi laufata unaveledi. Badi wai himulina-ma unamidiveledi unanunauwena tu badi wai hinagona-ma muliya unaveledi.
9Au badi wai himulina-ma hi'ela be aiyeta sa'eyana fatana aiyeta sa'eyana fatana hivaina. 10Atu badi wai hinagona-ma hi'ela be yadi mani hinavaina againe, hinuwanuwa vaita adi laufata gina'alalaka tu kadu badi aiyeta sa'eyana fatana hivaina. 11-12Yadi mani hivaini-yo hivebutu tonifaha againe hi'alawoluwolu higayo, Hida hima kaliva wai himulina-ma bai sa'eyanaga hifaisewa tu ime'eyao ma malalaugeya avebutu anunauwena kauwana lakahina gikabuma tu ama laufata badi adi laufata amine.
13Tonifaha tofaisewa sa'eyana gigahena gigayo, Tobohiyaku, unogali. Keke o againiya gadakivekoyo. A laufata buye kalukahihiyena tu kagahe vaita aiyeta sa'eyana fatana ganavele. 14Au ya mani uvaini be una. Iya nuwanuwaku kaliva wai gimulina-ma aiyeta sa'eyana fatana ya mani amine ganavelena. 15Yaku mani gavadi gavadi againe ganaseni-ma iya tauku akufaiweya ganavehimeyena. Gavadi-yo iya gafolafolaka fa'ina o uga'uma'uma?”
16Hidedemi Yesu gigahetalahobuhobu kadu yana gahe giluyabuna gigayo, “Au badi wai hinagona-ma wai hinamulina tu badi wai himulina-ma wai hinanagona.”
Tova anaveto Yesu yana alika fa'ina gilukahihi.
Maki 10:32-34; Luke 18:31-34
17-18 #
Md 16:21, 17:22-23 Tu Yesu Yelusalema againe ginauna tu ana tomuliya tuwelo gisi'aliyedi gigahedi gigayo, “Wa'ita, Yelusalema againe kananauna ada Iya Tohobu'ela abaveyao ana tofaisewa kikaiwabudiyao kadu Mosese yana vehimeya ana tovehawala nimadiya hinahegenauweku, be badi alikeya hinahegeku. 19Nuwanuwadi alikeya hinahegeku fa'ina yo'o tulidiyao nimadiya hinahegenauweku be badi hinahawavelaigeku kadu hinamunukoyokoyoku ada kelose againe hinatutuvefoseku. Atu tova anaveto againe Yaubada alikeya ginasivemididiku.” Hidedemi Yesu givenuwa'atadi.
Yemesa Yoni hinadi hive'o'ola be natudiyao hinakaiwabu.
Maki 10:35-45
20Tu medema tovai-nadi Sebedi vavinena wanatudiyao Yesu againe hi'ela hi'ibo'ula-mo'a be higa tamo gavadi fa'ina hinave'o'ola.
21Bana gigayo, “Gavadi-yo wa'ela?” Badi higayo, “Udavehimeya be tova mulina unakaiwabu-mo'a againe, hida natukweyao adi'iselu buye wadakaiwabu higa i'ataginiya kadu i'imawaniya hidavetoga.”
22 #
Md 26:39
Yesu gigahedi gigayo, “Gavadi wave'o'olena-ma ana nuwanuwa keke wadahalamaneni. Aimo tagiya aulolo ana gowa ganayuyena. Iya ganayuyena amine, ka'i kadu omi ami'iselu amifaiweya wanayuyena o ka'i keke?” Badi higayo, “Ime amafaiweya anayuyena.”
23Yesu gigayo, “Wona velemona yaku tagiya yaku aulolo ana gowa againe wanayu tu gaveyao i'atagikuya i'imawakuya hinavetoga, medema keke yaku abavehimeya. Au gaveyao fa'idiya Kamaku mena abavetoga kikaiwabuna gikidewedewena, medema hinavaina.”
24Tu tomuliya velugadiyao teni Sebedi natuneyao adi'iselu yadi ve'o'ola hinogalina againe hinuwakoyoyedi. 25#Lu 22:25-26Au Yesu gikovavaga'auhidi gigahedi gigayo, “Omi wahalamanena yo'o tulidiyao yadi tovehimeya yadi wa'agodadaga hi'ita'itave'avidi, kadu yadi tokaiwabu yadi waselakalaka kaliva koyokoyodiyao higahegahedi. 26Tu omi'iyao ma keke medede amine wanahuluhuluva. Au gaveyao omi agaimiya nuwanuwami wanakikaiwabu, medema tobohiyamiyao agaidiya wanavetofaisewa. 27Kadu gaveyao nuwanuwami wanavetonagona, medema tobohiyamiyao agaidiya wanave'agetoga. 28#Lu 22:27; Fl 2:7Meda anafaiweya Iya Tohobu'ela keke omi tomiyababi agaimiya gada'ela be omi wanavelugaku fa'ina. Au ga'ela be Iya omi ganavelugami ada yawaiku ganahawahegena be mena yaku laufata againe moya'aimi yami koyona fa'ina yogoyogonimiyao wamimiyami-ma ganayaumi.” Hidedemi Yesu gigahe.
Tomatakoyo adi'iselu hiyamumu.
Maki 10:46-52; Luke 18:35-43
29Tu Yesu ana tomuliya buye melala ana egana Yeliko hilowolowoga tu yo'o lakahidi hivebwa'uliyena. 30#Md 9:27Tomatakoyo adi'iselu edeya hihiyoto tu Yesu lilidiya ginauna ma hinogalini-yo hivebutu hikovakova higayo, “Kauveya, O Devida bwanenena, uda'itanuwakabubuyema.”
31Kaliva yo'oyo'o agaidiya hidakeyedi be higa hinave'amata. Tu badi kadu agodi gilakata-mo'a hikovadona higayo, “Kauveya, O Devida bwanenena, uda'itanuwakabubuyema.”
32Au Yesu ginumidi ada giyowanidi be hi'ela ada gigayo, “Gavadi nuwanuwami omi fa'imiya ganagani?”
33Badi higayo, “Kauveya, matama gida'italele.”
34Au Yesu gihinekalikaliyedi matadi gikibwa'ena ada auhe'ama matadi gi'ita'italele ada Yesu himuliyena.
Currently Selected:
Madiu 20: viv
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
