Afositolo 9

Saulo, muliya ana egana Folo ma givebutu

Yesu againe givetumagana.

Afositolo 22:6-16, 26:12-18

1-2 # Af 8:3 Tu Saulo badi kaliva vevine Kaiwabu Yesu againe hivetuvetumagana amanadi aimo gikikivekoyodi, nuwanuwana ginaluve'alikadi. Au abaveyao ana tofaisewa adi tokaiwabu againe gina give'o'ola be leta gina'etoladina, ada manuwa-abavehawala sinagogi moya'aina Damasiko melala againe ginanauwena. Badi sinagogi adi tonagona leta hina'itani-yo Saulo ana vehimeya hinahalamanena, higa badi gaveyao Kaiwabu yana edeya hinunudadana, ka'i kaliva o ka'i vevine, medema ginakive'avidi be Yelusalema againe ginanauwedi. 3Au gilowoga Damasiko againe ginauna tu melala-mo'ena liline gidayemu ma auhe'ama mahalina lobameya give'akinamanamalena, Saulo ginauna againe gituvemahali-'owona. 4Ada bana babiya gibe'u tu tamo hakwadi agona ginogalina gigahena gigayo, “Saulo, Saulo! Gavana fa'ina ukikivekoyoku?”

5 # Af 5:39 Bana Saulo gigayo, “Kaiwabu, O hakwa'adi?”

Kadu agona ginogalina gigayo, “Iya'eku Yesu, ada Iya ukikivekoyoku. 6Au umidi melala againe unaluku, ada mededei tamo hakwadi gavadi unagani ma ginavenuwa'ata.”

7Tu badi kaliva Saulo hibwa'ulina-ma himididi-vagata, meyadi gibou. Agona hinogalina tu keke tamo hakwadi hida'itani. 8Ada au Saulo gimidi matana gi'aleleyena tu keke tamo gavadi anafaiweya gida'itani, au matana gikoyo-mo'a. Au nimane hi'abina be Damasiko againe hinauwena. 9Ada aiyeta tohiye agaidiya givematakoyo, ada keke tamo gavadi gida'u'ani o ka'i gidayuyuni.

Kaiwabu Ananaiyasi Saulo againe gi'iveninisena.

10Tu tovetumagana sa'eyana Damasiko againe gimiyami, ana egana Ananaiyasi. Bana gi'eno'ita ada yana ita againe Kaiwabu bana ana egana gikovana gigayo, “Ananaiyasi.”

Ada bana gigayo, “Kaiwabu, we'a.”

11Au Kaiwabu gigahena gigayo, “Umidi be eda ana egana Eda Tunutunugina againe unana kaliva sa'eyana unalelena, ana egana Saulo kwanaTasasi. Au bana Yudasi yana manuweya gimimiyami, ada tova adamoya give'ove'o'ola. 12Ada yana eno'ita againe kaliva sa'eyana gi'itana, ana egana Ananaiyasi, higa vaita bana againe uda'ela nima udasena be matana ginayamumu fa'ina.”

13Bana Ananaiyasi gigayo, “Kaiwabu, hida kaliva fa'ine moya'aidi hivenuwa'ataku higa ya kalivamomo Yelusalema againe gikivekoyodi keke kabi'ona. 14Ada bana hide'i Damasiko againe gi'ela fa'ina abaveyao ana tofaisewa kikaiwabudiyao ana vehimeya hivelena be moya'aima a egana ayakayakahina-ma ginakive'avima be ginanauwema.”

15 # Af 25:23; Lo 1:5 Tu Kaiwabu gigahena gigayo, “Au unana. Hida kalivai-nadi gavegidena be Iya fa'ikuya ginafaisewa. E, gavegidena be yo'o tulidiyao yadi kini buye agaidiya kadu miIsileli agaidiya aku egana ginakilakahina ada hinahalamaneku fa'ina. 16#2Ko 11:23-28Kadu aku egana ginakilakahina fa'ina, vita lakahina ginanuhagana ma Iya Tauku ganavehawalena.”

17Au Kaiwabu hidedemi gigahe fa'ina, Ananaiyasi gina Saulo gimiyami manuwai-nadi againe giluku ada nimana Saulo againe gisena gigayo, “Tobohiyaku Saulo, Kaiwabu Yesu boi edeya unauna tu Tauna o againiya gi'ivemogatalina-ma Kalivai-nadi gi'iveniniseku be mata gina'italele ada Alu'aluwa Mahalina o ginaluvaiye fa'ina.” 18Gigahe-yo auhe'ama gaitoma sa'eyana vaita igana kwanavina amine Saulo matane gibe'u, ada anafaiweya gi'ita'italele. Au gitowamidi ada gibafitaiso. 19Ada a'a gi'ani-yo yana faiwala kadu giyemu.

Saulo Damasiko againe gilumamala.

20Tu tovetumagana Damasiko againe badi agaidiya Saulo gimiyami aiyeta tufona. Ada sinagogi agaidiya gimaduluku givebutu Yesu fa'ine gilulumamala, au gigahedi gigayo, “Bana Yesu ma Yaubada Natuna.” 21#Af 9:1-2Ada gaveyao moya'aidi yana laumamala hinogalina-ma hiyaulowoga, au hivebutu buye hive'agahegahe higayo, “Taumadi! Bana hidema kalivai-nadi badi gaveyao Yesu ana egana hiyakayakahina-ma Yelusalema againe gikikivekoyodi keke kabi'ona. Kadu meda anafaiweya yana inubai-nadi fa'ina hidedei gi'ela, higa Yesu yana kaliva ide agaideya ginakive'avidi be abaveyao ana tofaisewa kikaiwabudiyao agaidiya ginanauwedi. Au makewa hidedemi yana inuba.” 22#Af 17:3, 18:28Badi higahegahe tu Saulo yana laumamala againe gifaiwala, gifaiwala-mo'a. Ada miYuda Damasiko againe himiyami-ma gihawavetuvetunudi, higa Yesu velemo'ena Yaubada yana Tovegida Keliso, ada au yana hawavetuvetunu againe gifaiwalahegedi be keke adifaiweya bonana hinafatani, au hive'awavitavita.

23 # Af 23:12 Tu aiyeta a gavaiyehi hihegedi tu miYuda yadi tonagona hivaga'auta be hivevai, higa vaita Saulo hinaluve'alikana. 24Uyadayada be bogi melala ana abaluku hibodabodafifina be hinaluve'alikana fa'ina. Tu tamo hakwadi yadi nuwanuwa bana againe gi'awatalatalainena. 25Au bogi sa'eyana ana tomuliya hivega'aulena, ada feyawa againe hidodona digo hisehobuyena melala ana sifa kugakugana tabone hitunevelowona.

Saulo Yelusalema againe giyewana.

26Tu Saulo Yelusalema againe giyewana ada giyemu againe, gina higa tovetumagana adi yo'o agaidiya gidaluku tu badi moya'aidi himatausena, fa'ina hinuwanuwa vaita keke velemo'ena Yesu againe gidavetumagana. 27#Af 9:4Giga-wayoga fa'ina tovetumagana sa'eyana ana egana Banabasi givelugana, ada afositolo agaidiya ginauwena be gina'itadi fa'ina. Au Banabasi Saulo fa'ine gikivetuvetunudi, Kaiwabu edeya gi'itana kadu agona ginogalina ma gilukahihiyena. Kadu gigahedi gigayo, “Bana Saulo ase'asena bouna Yesu ana eganeya Damasiko againe gilumamala.” 28Au hidedemi Banabasi ahe gigahe-yo Saulo badi afositolo agaidiya giluku buye himiyami, Yelusalema againe hinunudadana, ase'asena bouna Yesu ana eganeya gilulumamala. 29Kadu miYuda bona Gilika againe hilulukahihi-ma agaidiya gina giluluhifufu be buye hivekwavekwageya, tu au hivevai be hinaluve'alikana fa'ina. 30Tu tobohiyaneyao badi tovetumagana amanadi miYuda yadi nuwanuwa hihalamanena againe, Saulo Sisaliya againe hinauwena ada wakeya hiveyagena be Tasasi againe ginana.

31Ada au tovetumagana adi yo'o tulina tulina Yudiya Galili kadu Sameliya adi fafali agaidiya himiyami hagihagina, fa'ina kaliva boi hikikivekoyodi-ma hi'ilova. Ada Alu'aluwa Mahalina yana veluga againe yadi vetumagana gitubuga kadu himoya'ai, ada yadi dewa againe tova moya'aina Kaiwabu ana egana hikikilakahina.

Fita tovefela Lida melala againe gisiveyawana.

32Himiyami tu bana Fita melala tulina tulina agaidiya ginunudadana, ada tova sa'eyana Yaubada yana kaliva melala ana egana Lida againe himiyami-ma agaidiya gina giwakawaka. 33Medede againe kaliva sa'eyana ginuhagana, ana egana Iniya, ada bana givefela be ana ivi againe gidauda ada ginunauwena malamala eita. 34#Yo 5:8-9Au Fita bana againe gigahe gigayo, “Iniya, adamoya Yesu Keliso ginasiveyawa. Au umidi be a ivi una'uwani.” Ada auhe'ama Iniya gimidi. 35Ada miLida moya'aidi hi'itana, kadu kaliva moya'aidi laube'u ana egana Seloni againe himiyami-ma hi'itana, ada yadi nuwanuwa uyu'uyuyuna hihegena be Kaiwabu Yesu againe hivetumagana.

Fita kwamayoku Yofa againe alikeya gisivemididina.

36Tu kwamayoku sa'eyana gimiyami, ana egana Tabita vineYofa, ada bana tovetumagana. Bona Gilika againe ana egana Dokasa, ada egana ana kaivila kevakeva ana egana diya. Ada bana kwamayoku-nadi tova moya'aina ginuwanuwakabubu, koyokoyo giveluvelugadi. 37Ada Fita Lida againe gi'ela ana toveya, kwamayoku gi'aulolo lakahina be gi'alika. Au wowona hikolana ada manuwa ana vetawana wese getane hisena. 38Tu Yofa ma Lida liline, ada Fita Lida againe gi'ela ma tovetumagana Yofa againe hinogalini-yo au kaliva adi'iselu hi'iveninisedi be Fita hinayowanina hinagayo, “Ime agaimeya udamadu'ela.”

39 # Mk 5:38-41 Yadi gahe Fita ginogalini-yo au gikidewadewa be badi buye hina. Giyemu ada manuwa ana vetawana getane hinauwena, ada au sikwasikwa moya'aidi himidififina ada hitagitagi tu dobodi ana kaleko kadu adi aikeva Dokasa aimo yawayawane gi'onana-ma hivehavehawalena. 40Au Fita moya'aidi giwavidi be melaleya hihobu, ada bana tugana give'etodonena be give'o'ola. Give'o'ola gihavaina kwamayoku wowona againe gihagavilana gigayo, “Tabita, umidi!” Au matana gi'aleleyena ada Fita gi'ita-yo gimidi. 41Au Fita nimane gi'abina be gisivemididina, ada au sikwasikwa kadu tovetumagana velugadiyao gikovadi-yo kwamayoku yawayawana giseyemaunena. 42Ada au kwamayoku valeyana give'aliyahega be miYofa moya'aidi hinogalina, ada tufoidi moya'aidi Kaiwabu againe hivetumagana. 43Tu Fita ma aiyeta a gavaiyehi Yofa againe gimiyami. Kaliva sa'eyana ana egana Saimoni againe gimiyami, bana yana faisewa ma bulumakau kwafilidi againe lokoloko gibubuna.

Currently Selected:

Afositolo 9: viv

Highlight

Copy