Afositolo 7

Sitiveni miYuda yadi Koniselo givebutu gilumamaledi.

Nagona Abelahamo kahihina gilukahihiyena.

1Tu abaveyao ana tofaisewa adi tokaiwabu Sitiveni againe gitoliluvaluva gigayo, “Ka'i badi tohawavemogatala higahe amine uhuluva?”

2 # Aba 12:1-5 Bana Sitiveni givebutu gilumamaledi gigayo, “Tobohiyakweyao kamakweyao, yaku gahe wananogalina. Tuwai-mo'ena Yaubada Tokaiwabu-mo'a bwaneneda Abelahamo gilakayemaunina, bana babi ana egana lakahina Mesofotemiya againe gimiyami tu aimo keke gidana melala ana egana Helani againe gidamiyavehaila ana toveya. 3E, Yaubada bana againe gilakayemu gigahena gigayo, A yo'o kadu ya babi unanuyabuyabudi, ada babi sa'eyana aimo ganahawavemogatalena amanadi againe unana. 4Ada Yaubada hidedemi gigahe-yo Abelahamo gilowoga fafali ana egana Kalidiya gihegena, ada bana tamana buye hina Helani againe himiyami. Himiyami tu tamana gi'alika, ada muliya Yaubada hida babi kamimiyami againe gi'iveninisena be gi'ela. 5#Aba 17:8Hida babi againe gi'ela tu keke babi ma'ita gidaveleni be vaita gidagahe gidagayo, Hidevama yaku babi, keke-mo'a. Keke gidaveleni tu giwonadabedabena gigayo, Hida babi Iya ganavele, o'eni kadu tova mulina a unumamomo hinatubuyemu amanadi ganaveledi. Ada hidedemi Yaubada giwonadabadaba ana toveya Abelahamo natuna keke. 6#Aba 15:13-14; Yem 3:12Kadu Yaubada gigahena gigayo, Aimo tova mulina a unumamomo babi tulina yuwa lauveya hinamiyami, ada medede againe yadi tovehimeya agaidiya hinave'agetoga be hinaluluya'aya'alidi, ada hidedemi hinanunauwena malamala fowa hanaledi (400). 7Tu badi yo'o hinave'agetogedi be hinakivekoyodi-ma matahiwadi Iya nimakuya hinavaina, ada tova mulina a yo'o meda babi-nadi hinanuyabuyabuna, ada hida babi againe hina'ela be hinahawadavadavaku. Hidedemi Yaubada Abelahamo againe gigahe. 8#Aba 17:9-11Ada muliya Yaubada yana veyao Abelahamo againe gisena, ada givehimeyena be bana'e kadu ana unumamomo iya'iyaya wowodiya hinatomogolohina, higa yana veyao ana iya'iyaya. Ada Abelahamo Aisake gi'ivetubugina, ada ana aiyeta eita givaidi-yo iya'iyayai-nadi wowone gitomogolohina. Meda anafaiweya Aisake natuna Yakobu wowone gitomogolohina, kadu Yakobu natuneyao kaliva tuwelo wowodiya gitomogolohina, badi bwanenedeyao kikaiwabudiyao.

Kadu Yosefa kahihina.

9-10 # Aba 37:11,28, 39:23, 41:37-44 Tu badi bwanenedeyao kikaiwabudiyao tobohiyadi Yosefa againe higa'uma'uma fa'ina, kaliva agaidiya hikimonevedamanena be hinauwena Idifita againe ginave'agetoga. Tu Yaubada bana againe gimiyami, ada ana vita moya'aina agaidiya gilugolegolena. E, nuwahuya kadu gakalikalivalakata Felo miIdifita yadi tokaiwabu matane givelena, ada au Felo miIdifita moya'aidi yadi tovehimeya Yosefa gisena, kadu yana manuwa hinagena moya'aidi agaidiya abavehimeya givelena.

11 # Aba 41:54 Abavehimeya givaini-yo loka gilakayemu, Idifita Kenani giluyabudi ada moya'aidi vita lakahina hinuhagana. Badi bwanenedeyao adiga keke. 12#Aba 42:1-5Himiyami tu Yakobu a'a Idifita againe gidauda-ma valeyana ginogalini-yo, natuneyao higa bwanenedeyao medede againe gi'iveninisedi, ada hidevama yadina nagona againe taidi hifaniyena. 13#Aba 45:1-11Ada muliya yadina anavelu againe bana Yosefa tobohiyaneyao agaidiya gi'ivemogatalina higa bana tobohiyadi, ada bana Felo Yosefa ana unuma valeyadi ginogalina. 14Au Yosefa tamana Yakobu againe venuwa'ata gi'iveninisena be higa bana'e kadu ana unuma matatabudi Idifita againe hina'ela hinamiyavehaila. Ada ana unuma adi kilagalaga seveniti-faifi (75). 15#Aba 46:1-7, 49:33Ada au Yakobu Idifita againe gina gimiyavehaila ana unuma buye'i, ada medede againe bana'e kadu natuneyao higa bwanenedeyao hi'alika. 16#Aba 33:19Ma wowodi yadi melala ana egana Sekemu againe hiyewedi ada tomohuyehuyeya hihuyadi, tomohuyahuyai-nadi ma tuwai-mo'ena Abelahamo yo'o adi egana Hemo agaidiya mani againe gikimonena.

Kadu Mosese kahihina.

17 # Yem 1:7-8 Malamala a gavaiyehi hihegedi tu Yaubada yana wonadabadaba ana tova giluveda'ufo, higa tuwaina Abelahamo againe giwonadabadaba be hida babi ana unumamomo ginaveledi. Ada wonadabadaba ana tovai-nadi giluveda'ufo againe, yada yo'o Idifita againe himoya'ai. 18Himoyamoya'ai himoyamoya'ai hinunauwena tu kini velugana Idifita againe givebutu givehimeya, tu Yosefa tuwaina gi'alika-ma keke gidahalamaneni. 19#Yem 1:10-22Bana yada yo'o gilololodi lakahina, ada bwanenedeyao giluya'aya'alidi. Givehimeyedi be yadi fwefweya ivagudiyao kabu'avane hinahegedi ada hina'alika fa'ina.

20 # Yem 2:1-10 Ada hida vehimeya ana toveya Mosese gitubuga fwefweya tomo'aiwaka Yaubada matane. Ada vaikohi tohiye agaidiya hinana manuweya himiyamiyatagona. 21Vaikohi tohiye gihavaidi-yo hisehobuyena be kabu'avane hiseni tu Felo natuna kwamayoku ginuhagana be gisilakahina, ada gifayayena be vaita tauna natuna amine. 22Ada miIdifita yadi nuwahuya moya'aina gisikuluye-'owona, ada yana gahe againe kadu yana gugai againe givekalivalakata.

23 # Yem 2:11-15,21-22 Tu Mosese ana malamala foti (40) givaidi againe, nuwanuwana yana yo'o miIsileli gina'itadi. 24Au badi agaidiya gihobu ada kwanaIdifita sa'eyana gi'itana kwanaIsileli gimunumununa. Au gimadu gilugolegolena, ada kwanaIdifita nimana gifatana, ada gimunumunukoyokoyona tu gi'alika. 25Bana Mosese higa ginuwanuwa vaita tauna yana yo'o hidahalamaneni Yaubada bana Mosese nimane gidalugolegoledi, tu badi keke hidahalamaneni. 26Au tova anavelu miIsileli adi'iselu buye hive'afwaiki-ma gi'itadi, ada nuwanuwana hina'ilova be hinaveyao fa'ina gigahedi gigayo, Omi kaliva wanogali! Omi watobohiyamiyao. Gavadi-yo taumiyao wave'akivekoyo?

27Tu bana kaliva sa'eyana tobohiyana gikikivekoyona-ma Mosese gi'atuhegena gigahena gigayo, O hakwadi giseni-yo higa vaita unavehimeyema unavedewayaugima? 28Ka'i o nuwanuwa iya unaluve'alikaku, boiyesedi kwanaIdifita uluve'alikana amine? 29Ada Mosese kwanaIsileli yana gahe ginogalini-yo Idifita gi'otayabuyabuna, ada gina babi ana egana Midiyani againe givekwanahawahawala. Ada medede againe ginagi be kaliva luhei gi'ivetubugidi.

MiIsiledi adi lugolagola Mosese nimane kahihina.

30 # Yem 3:1-10 Malamala foti (40) gihegedi tu tova sa'eyana babigaga againe oya Sainai liline gimiyami tu lobama ana tovenuwa'ata bana againe gilakayemu. Ai kabi'ona sa'eyana giyabela-vagata ada noya'aina againe tovenuwa'ata gilakayemu. 31-32Ada Mosese hida aituha gi'itana againe nuwana givegafo'uya'uya, au gina ai kabi'ona giyabela-vagata gida'ita-hagihagiyena ma Kaiwabu agona ginogalina gigayo, Iya'eku bwanenemomo Abelahamo Aisake Yakobu yadi Yaubada. Au gigahe-yo Mosese givebutu givetavetatava gimatautave'ine fa'ina keke anafaiweya gida'ita-mo'eni.

33Bana Kaiwabu gigahena gigayo, Iya hidedei gamimiyami fa'ina abageya umidimidi-ma babi hawahawatana. Au a ageyafayafa uyau be useni. Hida babi hawahawatana, keke unakivebwaneneni. 34MiIdifita yaku yo'o kalivai-dina himunumunukoyokoyodi-ma Iya makewa ga'itana. MiIsileli yadi tagiya a ganogalina ada gahobu'ela be ganalugolegoledi fa'ina. Au umidi, Idifita againe gana'iveninise be unana.” Hidedemi Kaiwabu gigahe ada bana Sitiveni giyakahina.

35Kadu Sitiveni yana laumamala ginauwena gigayo, “Tu bana hidevama Mosese ma badi miIsileli hikilowena fa'ina higahena higayo, O hakwadi giseni-yo higa vaita unavehimeyema unavedewayaugima? E, bana'e ma Yaubada Tauna gi'iveninisena be ginavehimeyedi ada ginalugolegoledi. Au lobama ana tovenuwa'ata awane givegidena, bana ai giyabela-vagata hinagene Mosese againe gilakayemu amanadi. 36#Yem 7:3, 14:21; Ail 14:33Ada au bana'e miIsileli Idifita againe givega'auledi. Aituha fifiwalana kadu abaveyaulowoga Idifita againe ada Lehaga Yabeyabelina againe gifaisewadi be givega'auledi, ada babigaga againe hinunudadana-ma yana aituha fifiwalana ginunauwena malamala foti (40) agaidiya.

37 # 2Veh 18:15 Kadu'e bana hidevama Mosese-nadi miIsileli gigahe-vagahidi gigayo, Aimo tova mulina Yaubada bonana ana to'awatalatalaina sa'eyana omi yami yo'o hinafamiya ginakivemididina. Iya gakivetuvetunumi amine, meda bana ginakivetuvetunumi. Hidemi Mosese yana gahe. 38#Yem 19:3; 2Veh 9:10Kadu bana Mosese ma babigaga againe miIsileli buye hivaga'auta. E, bana'e bwanenedeyao buye himiyami, ada oya Sainai againe gilaka lobama ana tovenuwa'ata buye hilukahihi, ada Yaubada bonana miyamiya-vagahina ginogalina be ide agaideya ginasedamanena fa'ina.

MiIsileli yadi kilumina ana hawadavadava kahihina.

39 # Ail 14:3 Tu bwanenedeyao hidibutoyoga keke bonana hida'abini, au bana hikilowena be nuwahinagediya hinuwanuwa vaita Idifita againe hinayewadi. 40#Yem 32:1-6Hidedemi hinuwanuwa fa'ina Mosese tobohiyana Eloni againe higahe higayo, Kilumina yada viviluwa unabubudi be hinanagoyeda. Bana hidevama kaliva Mosese ma Idifita againe givega'auleda amanadi bana hami gina? Keke kadahalamaneni. 41Hidedemi bwanenedeyao higahe tu kilumina ana ita vaita bulumakau natudi amine hibubuna, ada kevakeva yadi abaveyao fa'ina hikabudi be kilumina hihawadavadavana. Kadu avemwamwala lakahina hisena be nimadi yana aibubuna hinahawaveyamumuyena fa'ina. 42#Emo 5:25-27Tu Yaubada givekwaulaugedi ada gihegedi be ibadibadi lobameya hinahawadavadavadi. Ada au hihuluva Yaubada bonana ana to'awatalatalaina yadi buki againe to'awatalatalaina sa'eyana gigahe amine gigayo,

Omi miIsileli, malamala foti (40) babigaga againe wamiyami ana toveya, keke Iya fa'ikuya kevakeva wadamunudi, keke abaveyao wadakabuni be wanahawadavadavaku fa'ina, keke-mo'a. 43Au omi mene kilumina wabubudi be higa wanahawadavadavadi. Viviluwa sa'eyana ana egana Moloki, keke Iya fa'ikuya tu bana fa'ine falai wa'ava'avaladadanena. Kadu ikilukiluma vaita badibadi amine wakilakahina, medema yami viviluwa ana egana Lefani yana gaitoma. Au yami ikilukiluma wahawadavadavadi fa'ina, ganawavimi be yuwa wanana lauveya, melala Babiloni yuwa fafaline wanavehawahawala.”

Au hidedemi Yaubada yana to'awatalatalaina awane miIsileli agaidiya gigahe ma Sitiveni giyakahina.

Yaubada yana abamiyami kahihina.

44 # Yem 25:9 Kadu Sitiveni yana laumamala ginunauwena gigayo, “Falai lakahina, Yaubada yana abamiyami, bwanenedeyao agaidiya babigaga againe gidauda, ada medema falai-nadi Yaubada yana miyami ana aituha yana yo'o hinafadiya. Ada Yaubada Mosese givehimeyena be gihawavetuvetununa amine falai-nadi hibubuna. 45#Yos 4:11, 18:1, 23:9Himiyami tu muliya bwanenedeyao falai-nadi Yaubada yana abamiyami natudiyao agaidiya hisedamanena. Ada Mosese ana hilafa bana Yosuwa bwanenedeyao ginagoyedi be hida babi yo'o tulidiyao nimadiya hilemadi. E, Yaubada yo'o tulidiyao givenegadi be miIsileli yadi babi hilemadi, ada hina hiluku ana toveya falai-nadi kadu hinauwena be hida babi againe hikivemididina, ada au gidauda gidauda ginunauwena tokaiwabu Devida yana toveya. 46#2Sam 7:1-2Bana Devida ase'asena yamumuna Yaubada matane fa'ina Yaubada gihawaveyamumuyena, ada bana Devida give'o'ola gigayo, O'eni Yakobu bwanenema lakahina yana Yaubada. Iya nuwanuwaku ya abamiyami ganayogona fa'ina udahawahegeku be gadayogona. 47#1Kin 6:1,14Hidedemi Devida gigahe tu bana keke gidayogoni, au natuna Solomoni Yaubada yana manuwa giyogona.

48 # Ais 66:1-2 Tu Yaubada Getane-mo'ane keke velemo'ena kaliva manuwa hiyogona-ma agaidiya gidamiyami, keke. Hidema fa'ina Yaubada bonana ana to'awatalatalaina sa'eyana awane tuwai-mo'ena gigahe gigayo,

49Iya'eku Yaubada Kaiwabu.

Lobama yaku didiga'u'u, babi ageku ana abasewadi,

au lobameya kadu babiya gavehivehimeya.

Gavaiya'amine manuwa Iya fa'ikuya wanayogoni?

Gava abamiyami wanabubuni-ma akufata?

50Au keke amifaiweya, fa'ina hida lobama be babi ana gaitoma moya'aina Iya Tauku nimakuya gabubuna.”

Hidedemi Yaubada yana to'awatalatalaina awane gigahe, ada bana Sitiveni giyakahina.

Sitiveni miYuda yadi Koniselo yadi dibutoyoga fa'ina gidakeyedi.

51 # Yem 32:9 Kadu Sitiveni miYuda yadi Koniselo agaidiya gigahe gigayo, “Omi tagami kuluna. Badi kaliva-kawowo Yaubada keke hidavetumaganeni, meda anafaiweya omi'iyao. Keke nuwanuwami Yaubada bonana wananogalini, kadu keke nuwanuwami Bana'e nuwami gina'aiyauga. Bwanenemiyao hihuluva amine, meda anafaiweya omi wahuluhuluva. Tova moya'aina Alu'aluwa Mahalina wadibudibutoyogena. 52#2Kah 36:16Bwanenemiyao Yaubada bonana ana to'awatalatalaina moya'aidi hikivekoyo-'owodi, keke tamo hakwadi againe hidahuluva hagihagina. Au badi to'awatalatalaina Yaubada yana Kaliva Mahamahalina yana hobu'ela fa'ina higaheye-vagahina amanadi hiluve'alikadi, ada tova adamoya ahe gihobu'ela-yo nibaineyao agaidiya wahawavemogatalena be au waluve'alikana. 53#Af 7:38; Hi 2:2Tuwai-mo'ena omi yami yo'o agaimiya Yaubada yana tovenuwa'ata gi'iveninisedi be hihobu'ela, yana vehimeya bwanenemiyao giveledi ada omi agaimiya hisedamanena. Omi vehimeyai-nadi wavaina tu keke wada'itave'avini.” Au hidedei Sitiveni yana laumamala giluyabuna.

Sitiveni hitutuve'alikana.

54Tu badi Koniselo Sitiveni hida yana gahe hinogalini-yo hi'ila'a-manimanini gadodi hi'alamuhumuhuna. 55Tu Alu'aluwa Mahalina bana Sitiveni giluvaiyena ada lobameya gi'italele, au Yaubada yana mahalina ve'akinamanamalina gi'itana, kadu Yesu Yaubada i'atagine gimidimidi-ma gi'itana. 56#Kl 3:1Au gigahe gigayo, “Wa'ita! Lobama gi'ayavalina-ma ga'itana, kadu Bana Tohobu'ela Yaubada i'atagine gimidimidi-ma ga'itana.”

57-58 # Af 22:20 Hidedemi gigahe-yo hivebutu hikova'awafatafata, ada tagadi nimadiya hikibodani tu moya'aidi bana againe se'eyaine himadu, hituwamadumadugena digo hihobuyena melala kabu'avane be hivebutu hitutuve'alikana. Ada to'aifihaga higa togahe adi aikeva hivehalilina be kwanatubulakahina sa'eyana ana egana Saulo againe hisena be gina'itave'avina. Saulo ana egana velugana Folo.

59 # Lu 23:46 Ada badi kabala againe hi'i'ifihaga tu bana Sitiveni Kaiwabu againe gitagivedadaga gigayo, “Kaiwabu Yesu, alu'aluwaku unavaina.” 60#Lu 23:34Hidedemi gigahe-yo tugana give'etodonena ada gikova agona lakahina gigayo, “Kaiwabu, hida yadi koyona fa'ina keke badi agaidiya unalaufata.” Hidedemi gigahe-yo yawaina gihavaina. Ada au bana Saulo badi Sitiveni hitutuve'alikana-ma gihawaveyamumuyedi.

Currently Selected:

Afositolo 7: viv

Highlight

Copy