Nongezi 28
28
1Wasang'hana gehile okimbila kuno hawakimbizigwa na munhu,
lakini wene haki magalu kamba simba.
2Isi ili na ndwagi yokuwa na vilongozi wengi,
lakini kilongozi imoja yeli na nzewele na kutanga vinhu isi yotindiwala.
3Munhu yowadununza wakiwa,
kaigala na mvula ng'hulu inanga minoga.
4Wanhu obena malagizo owatogola wasang'hana gehile,
lakini waja ogoga malagizo owabamilila.
5Wasang'hana gehile hawatanga haki,
lakini waja omdumba Mndewa Imulungu otanga.
6Vinoga kwa mkiwa yogenda mnzila igoloke,
kubanza mgoli yosang'hana gehile.
7Mwana yogoga malagizo kana nzewele,
lakini mbwiga wa wamelo komgela kinyala tatake.
8Munhu yokwengeza ugoli wake kwa liba,
komzahilila munhu iyagwe yowonela bazi wakiwa.
9Munhu yolema kugoga malagizo,
munhu ayo hata kupula kwake ngevuzo kwa Imulungu.
10Yowafunza wanhu wanogile kusang'hana gehile,
kogwa mdisimo jake mwenyego,
lakini wanhu welibule kitala ohazi ganogile.
11Munhu mgoli koiyona mbala,
lakini mkiwa yotanga goya komgubula.
12Wene haki wahapata ukulu, wanhu odeng'helela,
lakini wanhu wehile wahatawala, wanhu oifisa.
13Yofisa gehile gake honda yatendeligwe ganogile,
lakini yolonga gehile gake na kugaleka kokoneligwa bazi.
14Kamweda munhu yomdumba Mndewa Imulungu siku zose,
lakini yeli na moyo mdulu kopata magazo.
15Mtawala yehile yowatawala wakiwa,
kaigala na simba yobuma hebu dubu yovamila.
16Mtawala hatanga goya kowavizila wanhu,
lakini yolema vinhu va uvizi kotawala kwa kipindi kitali.
17Munhu yeli na kitala cha ukomaji,
kokuwa tanga nzulule mbaka mdipanga,
munhu yoyose sambi yageze kumtaza.
18Munhu yotembela mwiinzila igoloke kokomboligwa,
lakini munhu yotembela mwiinzila ihile kogwa.
19Yolima mgunda wake koigwisa ndiya nyingi,
lakini yokweleleza vinhu havifaya kopata ukiwa.
20Munhu yotamaniligwa kopata ganogile,
lakini yeli na bwisabwisa da kupata ugoli kopata nhaguso.
21Havinogile kumbagula munhu,
hata ivo wanhu osang'hana gehile kwa kihande cha gate.
22Munhu mgila kokimbilila ugoli,
hatanga kamba ukiwa omwizila.
23Yomzuma miyage kopata ganogile,
kubanza ija yomuhembekeza kwa mbuli zili mulile.
24Yokwiba vinhu va tatake hebu mamake, na kolonga, “Sibanange bule,”
heyo mbwiga wa munhu yobananga.
25Munhu yeli na himu kowatenda wayage wagombe,
lakini yomtamanila Mndewa Imulungu komweda.
26Yotamanila nzewele zake mwenyego, mbozi,
lakini yokala kwa ubala kokomboligwa.
27Yowataza wakiwa honda yahungukilwe na kinhu,
lakini yolema kuwataza koduwiligwa.
28Watenda gehile wahatawala, wanhu oifisa,
lakini wahakomigwa, weli na haki okwengezeka.
Currently Selected:
Nongezi 28: King'hutu
Highlight
Share
Copy
Want to have your highlights saved across all your devices? Sign up or sign in
NT: © 2014 Pioneer Bible Translators and The Word for the World
OT: © 2019 Pioneer Bible Translators
