Maluko 6

Yesu kolemigwa ako Nazaleti

(Matayo 13:53-58; Luka 4:16-30)

1Yesu kasegela hanhu aho kachola kudibuga diyavumbuke, na wanahina zake wamkweleleza. 2Vidivikile siku da Kubwihila, Yesu kasonga kufundiza mng'anda ya kumpula Imulungu. Wanhu wamuhulike wakanganya ng'hani, waiuza, “Munhu ino kazipata kwahi mbuli zino? Nzewele gani ino mbaka kodaha kutenda unzonza uno? 3Vino ino siyo ija fundi selemala, mwanage Malia, na ndugu zake Yakobo na Yusufu na Yuda na Simoni? Vino lumbu zake hawakala bahano bule?” Avo wamulema.

4Yesu kawalongela, “Mtula ndagu kotegelezigwa kila hanhu, lakini hategelezigwa ukae kumwake na kwa ndugu zake, na kwa wanhu wa lukolo lwake mwenyego.”

5Yesu hatendile unzonza wowose, ila kawekila makono watamu kidogo na kawahonya. 6Yesu kakanganya ng'hani kwavija wanhu wakala wabule kutamanila.

Yesu kowatuma wanahina longo na wabili

(Matayo 10:5-15; Luka 9:1-6)

Abaho Yesu kachola mna ivijiji vili behi, na kasonga kuwafundiza wanhu. 7Kawakema wanahina longo na wabili, kawatuma wabili wabili, na kawagwaa udahi wa kulava vinyamkela. 8Kawalongela, “Sikumusole kinhu chochose, ila mkongoja wiiyeka. Sikumusole gate hebu mkoba hebu sente mkibindo. 9Valeni vilatu, lakini sikumusole kiwalo kiyagwe. 10Hanhu hohose honda mubokeligwe, kaleni aho mbaka vonda musegele. 11Mwahavika kudibuga jojose na wanhu wa aho wahalema kuwabokela hebu kuwategeleza, segeleni na kung'huseni matimbwisi geli mmagulu genu ili iwe kilaguso kamba wawatendela nzambi.”

12Avo wasegela na kuwapetela wanhu waleke nzambi zao. 13Wawalava vinyamkela wengi na kuwabakaza mavuta wanhu wengi wakalile watamu na kuwahonya.

Ifa ya Yohana Mbatizaji

(Matayo 14:1-12; Luka 9:7-9)

14Mndewa Helode kahulika mbuli azo zose, kwavija twaga da Yesu dikala dijuwike kila hanhu. Wanhu wayagwe wakala olonga, “Yohana Mbatizaji kazilibuka kulawa kwa wafile, lekaavo kana udahi wa kutenda unzonza.”

15Wanhu wayagwe walonga, “Ino Eliya.”

Na wanhu wayagwe walonga, “Ino mtula ndagu kaigala na imoja wa watula ndagu wa Imulungu wa kuko umwaka.”

16Helode viyazihulike mbuli azo, kalonga, “Ino ayo Yohana Mbatizaji inimkanhile pala jake lakini kazilibuka kulawa kwa wafile!” 17Helode mwenyego kakala yalagize Yohana yagodekigwe nzabi, abaho yekigwe mkifungo. Katenda avo mbuli ya Helodiya iyamsolile, hamoja kakala mwehe wa Filipo, mdodo wake. 18Yohana Mbatizaji kakala yomulongela Helode, “Malagizo golonga, havinogile bule gweye umsole mwehe wa mdodo wako!”

19Avo Helodiya kakala komwihila Yohana, na kalonda kumkoma. Lakini hadahile bule, 20kwavija Helode kakala komdumba Yohana na kajuwa kamba kakala munhu yanogile na yang'alile avo kamkaliza. Kakala konogelwa kumuhulika, hamoja moyo umuluma ng'hani kila viyamalile kumuhulika.

21Siku dimoja, Helodiya kapata nyafasi mna idisiku da kukumbuka kuvumbuka kwa Helode. Helode kawatendela nyimwilinyimwili ng'hulu wakulu wa mabuga, na wakulu wa wakalizi, na vilongozi wa isi ya Galilaya. 22Mndele wa Helodiya viyengile kucheza, kamnogeza ng'hani Helode na wageni wagonekigwe kuna inyimwilinyimwili. Avo mndewa Helode kamulongela mndele ayo, “Nipule chochose kiulonda, nokugwaa.” 23Kaiduwila, “Noiduwila, nokugwaa chochose chonda unipule, hata nusu ya undewa wangu nokugwaa!”

24Avo mndele ayo kalawa kunze kamuuza mamake, “Nipule choni?”

Nayo kamwidika, “Pula pala da Yohana Mbatizaji.”

25Bahaja mndele ayo kakimbila mbaka kwa mndewa, kamulongela, “Sambi baha nigwelele pala da Yohana Mbatizaji mditanda!”

26Mndewa kona usungu ng'hani, lakini kwavija kaiduwila mgameso ga wanhu wagonekigwe, hadahile kumulemela. 27Bahaja mndewa kamulagiza mkalizi yadigale pala da Yohana. Mkalizi kagenda mkifungo, kakanha pala da Yohana. 28Abaho kadika pala dija mditanda, kamgalila mndele ayo, nayo kamgwaa mamake. 29Wanahina wa Yohana viwahulike mbuli ayo, wachola kulusola lukuli lwa Yohana na kuluzika.

Yesu kowagwaa ndiya lunhu mkulu lwa wanhu

(Matayo 14:13-21; Luka 9:10-17; Yohana 6:1-14)

30Watumigwa wabwela, waiting'hana na Yesu na wamulongela gaja gose gawatendile na kufundiza. 31Baho kukala na wanhu wengi wakalile okwiza na kusegela, mbaka Yesu na wanahina zake hawapatile nyafasi ya kuja kinhu. Avo Yesu kawalongela wanahina zake, “Tucholeni twiiyeka hanhu kuduhu wanhu mkabwihile kidogo.” 32Avo wasegela waiyeka mwiingalawa, wachola hanhu kuduhu wanhu. 33Wanhu viwonile osegela, bahaja wawajuwa. Avo walawa mna gamabuga gose, wakimbila mbaka wawalongolela kuvika Yesu na wanahina zake. 34Yesu viyahumuluke mwiingalawa, kaluvika lunhu mkulu lwa wanhu. Kawonela bazi kwavija wakala kamba ng'hondolo welibule msusilaji. Avo kasonga kuwafundiza vinhu vingi.

35Zuwa vidikalile dohonga, wanahina zake wamcholela Yesu, wamulongela, “Hanhu hano hatwili kuduhu wanhu, na sambi zuwa dohonga. 36Walongele wanhu wachole mna imigunda na vijiji vilibehi ili wakaigulile vinhu va kuja.”

37Yesu kawedika, “Wagweleleni mweye kinhu chakuja waje.”

Wamuuza, “Vino tuchole tukagule magate ga sente ifa ya kumuliha msang'hanaji kwa miyezi minane#6:37Sente za miyezi minane, hebu sente magana mabili. tuwagwee waje?”

38Yesu kawauza, “Munago magate mangapi? Gendeni mukalole.”

Viwagalolile, wamulongela, “Kuna magate matano na somba wabili.”

39Abaho Yesu kawalongela wanahina zake wawagole wanhu wose mna ivibumbila bumbila, wakale hasi mna gamajani mabisi. 40Avo wakala mna ivibumbila va wanhu gana na va wanhu malongo matano. 41Abaho Yesu kasola gaja gamagate matano na somba wabili, kalola uchanha na kamgwaa nhogolwa Imulungu. Abaho kagabanzula gaja gamagate, kawagwaa wanahina zake wawagolele wanhu. Vivija kawagolela wose somba waja wabili. 42Wanhu wose waja na kwiguta. 43Abaho wanahina zake wadondola magate gasigale na iwasomba, wamemeza vigelo longo na vibili. 44Wambigalo waiyeka wadile wakala kamba elufu tano.

Yesu kotembela uchanha mgamazi

(Matayo 14:22-33; Yohana 6:15-21)

45Bahaja Yesu kawalagiza wanahina zake wakwele mwiingalawa wamulongolele kuchola Betisaida, kuna umwambu uyagwe wa lamba. Heyo kakala yolulaga lunhu lwa wanhu lusegele. 46Viyamambukize kuwalaga wanhu, kakwela kuna ikigongo kumpula Imulungu. 47Viivikile ichungulo, ngalawa ikala hagati ya lamba, lakini Yesu kakala yaiyeka mwiisi inyalile. 48Yesu kawona wanahina zake olemelwa kutowa ng'hafi, kwavija beho kulu dikala dowabweza kuwalawile. Nzogolo zikwika, Yesu kawagendela, kuno kotembela uchanha mgamazi. Kalonda kuwabita, 49lakini viwamone kotembela uchanha mgamazi, wagizaga mzimu. Wakemelela kwa bwembwe. 50Wose viwamone wadumba ng'hani.

Bahaja Yesu kawalongela, “Gangamaleni! Iyo nene! Sikumudumbe!” 51Abaho Yesu kengila mwiingalawa, na beho dinyamala tuluu. Wanahina zake wakanganya ng'hani, 52kwavija wakala hawajuwile fambulo da kuwagwaa ndiya wanhu elufu tano, mizoyo yao ikala midala.

Yesu kowahonya watamu ako Genesaleti

(Matayo 14:34-36)

53Waloka umwambu, wavika kuna iisi ya Genesaleti, baho waifunga ngalawa yao. 54Bahaja viwahumuluke mwiingalawa, wanhu wamjuwa Yesu. 55Avo wakimbila mwiisi yose, na kila hanhu viwahulike Yesu kabaho wamgalila watamu watambalale mvisazi vao. 56Kila hanhu Yesu hayacholile, iwe mna ivijiji, hebu mna gamabuga, hebu mna imigunda, wanhu wawasola watamu zao na kuwagala kuna gamagulilo. Wampula Yesu yawatogolele waikwase mhindo ya kiwalo chake. Wose waikwasile wahona.

Currently Selected:

Maluko 6: King'hutu

Highlight

Copy