Maluko 11

Yesu kokwingila Yelusalemu kwa ng'henze

(Matayo 21:1-11; Luka 19:28-40; Yohana 12:12-19)

1Viwavikile behi na Yelusalemu, habehi na mabuga ga Betifage na Betania kuna Ulugongo lwa Mizeituni, Yesu kawatuma wanahina zake wabili wamulongolele. 2Kawalongela, “Gendeni kuna ikijiji kili kuulongozi wenu, mwahengila momvika mwana wa kihongwe kafungigwa, nayo yang'hali hanakweligwa na munhu. Mfunguleni mumgale hano. 3Munhu yoyose yahawauza habali motenda avo, mulongeleni Mndewa komulonda, nayo kombweza sambi baha.”

4Wanahina waja wachola wamvika mwana wa kihongwe kafungigwa hana ulwivi lwa ng'anda uilola na nzila. Viwakalile omfungula, 5wanhu wemile aho wawauza, “Motenda choni, habali momfungula ikihongwe?”

6Wawedika kamba Yesu viyawalongele, wanhu waja wawaleka wachole. 7Wamgala imwana wa ikihongwe kwa Yesu, watandika viwalo vao mumgongo wa ikihongwe, Yesu kakwela uchanha. 8Wanhu wengi wanzanza viwalo vao mnzila, na wayagwe wabena mibunho wayanzanza mnzila. 9Wanhu wakalile kuchugu na kuulongozi wa Yesu wakemelela, “Imulungu yatogolwe! Mndewa Imulungu yamtambikile ayo yokwiza kwa twaga jake! 10Imulungu yautambikile undewa ukwiza wa mndewa Daudi, muhenga wetu! Imulungu yeli uchanha ng'hani yatogolwe!”

11Yesu kavika Yelusalemu, kachola kuna Ing'anda ya Imulungu, kawegesela kuno na kuno. Lakini kwavija zuwa dikala dihongile, Yesu kachola Betania na wanahina zake longo na wabili.

Yesu kodiduwila biki da mtini

(Matayo 21:18-19)

12Imitondo yake, viwakalile osegela Betania, Yesu kakala na nzala. 13Kwa kutali Yesu kajona biki da mtini dikalile na mijani mingi, avo kadicholela yalole kamba kodaha kupata tunda jojose lakini viyavikile aho honile tunda jojose, ila majani gaiyeka, kwavija haukalile msimu wa kulela. 14Yesu kadilongela biki da mtini, “Munhu sikuyaje tunda jojose kumwako kabili!”

Wanahina zake wamuhulika viyalongile vivo.

Yesu kochola kuna Ing'anda ya Imulungu

(Matayo 21:12-17; Luka 19:45-48; Yohana 2:13-22)

15Viwavikile Yelusalemu, Yesu kachola kuna Ing'anda ya Imulungu. Kasonga kuwawinga wanhu wose wakalile ogula na kuchuuza vinhu. Kazibidula meza za wanhu wakalile ovunja sente na vigoda va wanhu wakalile ochuuza njiwa. 16Kawagomesa sikuwasole kinhu chochose kubitila kuna Ing'anda ya Imulungu. 17Abaho kawafundiza, “Yandikigwa mna Gamaandiko Gang'alile, ‘Ng'anda yangu yokuwa kae ya kupulila kwa wanhu wa isi zose.’ Lakini mweye moitenda mhango ya wabavi!”

18Wakulu wa walava nhosa na wafundiza Malagizo ga Musa viwahulike vivo, wasonga kuzahila nzila ya kumkoma Yesu, lakini wamdumba, kwavija lunhu lwa wanhu lukanganya mafundizo gake.

19Viivikile ichungulo, Yesu na wanahina zake wasegela kudibuga.

Fundizo da biki da mtini dinyalile

(Matayo 21:20-22)

20Imitootondo yake, viwakalile obita mnzila wajona biki dija da mtini dinyala gogodaa! 21Petulo kakumbuka kija kilawilile, kamulongela Yesu, “Mfundiza, lola, dibiki da mtini diudiduwile dinyala!”

22Yesu kawedika, “Mumtogole Imulungu. 23Nowalongela ukweli, munhu yoyose yahakilongela kigongo kino, Ng'oka ukayase mbahali na hakona shaka muumoyo wake lakini kotogola kiyolonga cholawilila, na Imulungu komtendela. 24Avo nowalongeleni, mwahampula Imulungu kinhu chochose, togoleni kamba mubokela, mogweleligwa chochose chonda mupule. 25Mwahampula Imulungu geleni kumgongo nzambi ziwawatendele wanhu, ili Tataenu yeli kuulanga nayo yazigele kumgongo nzambi zenu zimutendile. 26Kamba hamuzigela kumgongo nzambi za wanhu ziwawatendele, na Tataenu yeli kuulanga honda yazigele kumgongo bule nzambi zenu zimutendile.”

Mbuli ya udahi wa Yesu

(Matayo 21:23-27; Luka 20:1-8)

27Wavika kabili Yelusalemu, Yesu viyakalile kogenda kuna Ing'anda ya Imulungu, wakulu wa walava nhosa na wafundiza Malagizo ga Musa na wavele wamcholela, 28wamuuza, “Vino kotenda gano gose kwa udahi gani? Nani yakugwelele udahi wa kutenda gano?”

29Yesu kawedika, “Na niye nowauza mbuli imoja, mwahanidika, baho nowalongeleni notenda gano kwa udahi gani. 30Nongeleni, udahi wa Yohana wa kubatiza ulawa kwa Imulungu hebu kwa wanhu?”

31Wasonga kuilongela, “Twahalonga, ‘Ulawa kwa Imulungu,’ kotuuza, ‘Habali hamumtogole Yohana?’ 32Lakini twahalonga, ‘Ulawa kwa wanhu,’” wawadumba wanhu, kwavija wanhu wamtogola Yohana kamba mtula ndagu wa Imulungu. 33Avo wamwidika, “Siye hatujuwile.”

Yesu kawalongela, “Na niye siwalongela bule kwa udahi gani notenda gano.”

Currently Selected:

Maluko 11: King'hutu

Highlight

Copy