Maluko 10
10
Yesu kofundiza mbuli ya nyasa
(Matayo 19:1-12; Luka 16:18)
1Abaho Yesu kasegela kachola isi ya Yudea, kaloka lwanda lwa Yolidani, lunhu lwa wanhu lumcholela Yesu kabili, nayo kawafundiza kamba viyatendaga.
2Mafalisayo wayagwe wamcholela Yesu wamgeza, wamuuza, “Tulongele, vino vinoga mbigalo kumwasa mwehe wake?”
3Yesu kawauza, “Vino Musa kawalagiza choni?”
4Wamwidika, “Musa katulagiza kamba mbigalo kodaha kumgwaa kibua cha nyasa mwehe wake na kumwasa.”
5Yesu kawalongela, “Musa kawandikila lagizo dino mbuli ya udala wa mizoyo yenu. 6Maandiko Gang'alile golonga kulawa kuna ichanduso, ‘Imulungu kawalumba mbigalo na mtwanzi. 7Kwa mbuli ayo mbigalo komuleka tatake na mamake na koilumba na mwehe wake, 8na wabili awo okuwa kinhu kimoja.’ Avo haweli wabili kabili, lakini kinhu kimoja. 9Avo kiyalumbilize Imulungu, munhu sikuyakigole.”
10Viwabwelile mng'anda, wanahina zake wamuuza Yesu mbuli ino. 11Yesu kawalongela, “Mbigalo yomwasa mwehe wake na kumsola mtwanzi iyagwe, komtendela ugoni mwehe wake. 12Vivija mtwanzi yomulema mkasano wake na kusoligwa na mbigalo iyagwe kotenda ugoni.”
Yesu kowatambikila wana wadodo
(Matayo 19:13-15; Luka 18:15-17)
13Wanhu wayagwe wamgalila Yesu wana wadodo yawahagatile na kuwatambikila, lakini wanahina zake wawakomhokela. 14Yesu viyonile avo, kagevuzika, kawalongela, “Walekeni wana wadodo weze kumwangu sikumuwagomese kwavija Undewa wa Imulungu ni wa wanhu kamba wana wano. 15Nowalongeleni ukweli, munhu yoyose yolema kuubokela Undewa wa Imulungu kamba mwana mdodo, honda yengile ng'o.” 16Abaho kawahagatila wana waja kawekila makono gake kawatambikila.
Munhu tajili
(Matayo 19:16-30; Luka 18:18-30)
17Yesu viyasongile mwanza wake kabili, munhu imoja kamkimbilila, kamfugamila kamuuza, “Mfundiza Unogile, nhende choni niupate ugima wa milele?”
18Yesu kamuuza, “Habali kong'hema unogile? Kuduhu yanogile, ila Imulungu yaiyeka. 19Kugajuwa Malagizo ga Musa, ‘Sikuukome, sikuutende ugoni, sikuwibe, sikuulave usindila wa uvizi, sikuulonge uvizi, wategeleze tatako na mamako.’ ”
20Munhu ayo kamwidika, “Mfundiza gano gose nigagoga toka haudodo.”
21Yesu kamulola bunhuu, kamnogela, kamulongela, “Kuhungukilwa kinhu kimoja. Genda kachuuze vinhu vose viulinavo na uwagwelele wakiwa zisente na gweye kokuwa na utajili kuulanga. Abaho unikweleleze.” 22Munhu ija viyahulike avo, kona usungu, kasegela kuno kanyunyuwala kwavija kakala tajili ng'hani.
23Yesu kalola mhande zose kawalongela wanahina zake, “Yokuwa vidala ng'hani kwa munhu tajili kwingila Muundewa wa Imulungu!”
24Ulonzi uno uwasinhusa wanahina zake, lakini Yesu kagendelela kulonga, “Wanangu, vidala ng'hani kwingila Muundewa wa Imulungu! 25Vibuha kwa ngamiya kubita mna ikizonzo cha sanzia kubanza tajili kwingila Muundewa wa Imulungu.”
26Wanahina wakanganya ng'hani waiuza, “Avo lelo nani yonda yadahe kukomboligwa?”
27Yesu kawalola bunhuu, kawalongela, “Kwa munhu haidahika lakini kwa Imulungu haili vivo, gose godahika kwa Imulungu.”
28Petulo kamulongela, “Lola, siye tuleka kila kinhu na tukukweleleza gweye.”
29Yesu kawedika, “Nowalongela kweli, munhu yoyose yalekile ng'anda yake hebu ndugu zake hebu lumbu zake hebu mamake hebu tatake hebu wanage hebu migunda mbuli ya niye na kwa Mbuli Inogile, 30kobokela vingi ng'hani mna ikipindi cha sambi. Na kobokela ng'hani miyanza gana, ng'anda na ndugu na lumbu na wana na mama na migunda na hamoja na madununzo na mna ikipindi chonda kize kobokela ugima wa milele. 31Lakini wanhu wengi weli wa ichanduso okuwa wa ikimambukizo na waja wa ikimambukizo okuwa wa ichanduso.”
Yesu kolonga mwanza wa kadatu mbuli ya ifa yake
(Matayo 20:17-19; Luka 18:31-34)
32Yesu na wanahina zake wakala mnzila ochola Yelusalemu. Yesu kawalongolela wanahina zake wakalile okanganya kuno wanhu wakalile omkweleleza wadumba. Yesu kainega hamgwazo na wanahina zake longo na wabili, kawalongela gaja gonda gamulawilile. 33Yesu kawalongela, “Tegelezeni, tochola Yelusalemu, kuko Mwana wa Munhu kogeligwa mmakono ga wakulu wa walava nhosa na wafundiza Malagizo ga Musa. Omtagusa yafe na kogeligwa mmakono ga wanhu haweli Wayahudi, 34nao omzeha na omtemela mate na omtowa mbalati na omkoma lakini siku da kadatu kozilibuka.”
Kupula kwa Yakobo na Yohana
(Matayo 20:20-28)
35Abaho Yakobo na Yohana, wana wa Zebedayo wamcholela Yesu, wamulongela, “Mfundiza, kuna kinhu tolonda ututendele.”
36Yesu kawauza, “Molonda niwatendele choni?”
37Wamwidika, “Vondaukale kuna ikigoda chako cha Undewa wako, tolonda ukale na siye, imoja mwambu wa mkono wako wa kudila na iyagwe mwambu wa mkono wako wa kumoso.”
38Yesu kawalongela, “Hamkijuwile kinhu kimpula. Vino modaha kuking'wela kikasi cha madununzo chonda niking'wele niye? Na kubatizigwa ubatizo unibatizigwa?”
39Wamwidika, “Todaha,”
Yesu kawalongela, “Mong'wela kikasi chonda ning'wele niye na kubatizigwa ubatizo onda nibatizigwe niye. 40Lakini niye nabule udahi wa kusagula nani yakale mwambu wa mkono wangu wa kudila hebu wa kumoso. Imulungu ayo yonda yawagwee hanhu aho, wanhu waja yawasagule.”
41Baho wanahina longo viwahulike vivo wawagevuzikila ng'hani Yakobo na Yohana. 42Yesu kawakema wose hamoja kawalongela, “Mojuwa kamba waja okoneka wakulu wa isi, owalanguliza wanhu kwa nguvu, na wakulu wao wana udahi. 43Lakini haili vivo kumwenu. Munhu yoyose yolonda kuwa munhu mkulu, yawe msang'hanaji wa wose. 44Na munhu yoyose yolonda kuwa wa ichanduso, yawe mtumwa wa wose. 45Kwavija Mwana wa Munhu hezile kusang'hanilwa, lakini keza kuwasang'hanila wanhu na kuulava ugima wake kwa kuwakombola wanhu wengi.”
Yesu komuhonya msuwameso
(Matayo 20:29-34; Luka 18:35-43)
46Wavika Yeliko. Yesu na wanahina zake hamoja na lunhu lwa wanhu viwakalile osegela, msuwameso imoja yakalile yopula, twaga jake Batumayo, mwanage Timayo kakala mnzila. 47Batumayo viyahulike Yesu wa Nazaleti kobita, kasonga kukemelela, “Yesu, mwanage Daudi nyonele bazi!”
48Wanhu wengi wamkomhokela, wamulongela yanyamale, lakini heyo kagendelela kukemelela ng'hani, “Mwana wa Daudi, nyonele bazi!”
49Yesu kema, kalonga, “Mkemeni.”
Avo wamkema, wamulongela, “Gangamala! Ima, kokukema.”
50Kawasa mgolole wake, kazumha kamcholela Yesu.
51Yesu kamuuza, “Kolonda nikutendele choni?”
Munhu ayo kamwidika, “Mfundiza, nolonda kulola.”
52Yesu kamulongela, “Chola, kutamanila kwako kukuhonya.”
Bahaja kadaha kulola kamkweleleza Yesu mnzila.
Currently Selected:
Maluko 10: King'hutu
Highlight
Share
Copy
Want to have your highlights saved across all your devices? Sign up or sign in
NT: © 2014 Pioneer Bible Translators and The Word for the World
OT: © 2019 Pioneer Bible Translators
