Luka 2

Kuvumbuka kwa Yesu

(Matayo 1:18-25)

1Kipindi acho, Agusito, Mndewa wa Lumi, kalagiza wanhu wose mwiisi ya Lumi wapetigwe. 2Awo ukala mwanza wa ichanduso wa wanhu kupetigwa kipindi Kilenio viyakalile mkulu wa isi ya Siliya. 3Avo kila munhu kachola kudibuga diyavumbuke kwandikigwa twaga jake.

4Yusufu kasegela kudibuga da Nazaleti mwiisi ya Galilaya, kachola kudibuga da Beselehemu mwiisi ya Yudea, hanhu hayavumbuke mndewa Daudi. Yusufu kachola kuko kwavija kolawa mulukolo lwa Daudi. 5Kachola na Malia kupetigwa, yakalile yamfungile zengele. Nayo Malia kakala na inda. 6Viwakalile kudibuga da Beselehemu, kipindi cha Malia kuifungula kivika. 7Kaifungula mwanage wa chaudele wa kimbigalo, kamvaza vikumbi. Abaho kamtambaliza hanhu hoodimiligwa ng'ombe, kwavija hawapatile gati mzing'anda za wageni.

Wasusilaji wa ng'hondolo na wasenga wa kuulanga

8Kilo acho kukala na wasusilaji wa ng'hondolo mna imigunda ili behi na Beselehemu, wakala okaliza fugo zao. 9Msenga wa kuulanga kawalawilila, ukulu wa Mndewa uwamwemwesela, nao wadumba ng'hani. 10Lakini msenga ija kawalongela, “Sikumudumbe! Niye niwagalila mbuli inogile, mbuli yonda itende wanhu wose wadeng'helele. 11Lelo kudibuga da Daudi, Mkombola wenu kavumbuka, ayo Kilisito Mndewa! 12Kino acho kilaguso kumwenu, momvika mwana king'hele kavazigwa vikumbi, katambalizigwa hanhu hoodimiligwa ng'ombe.”

13Bahaja bumbila kulu da wasenga wa kuulanga dilawilila, diilumba na msenga ija iyagwe, wamtogola Imulungu walonga,

14“Ukulu kwa Imulungu yeli Uchanha Ng'hani kuulanga,

na tindiwalo diwe kwa wanhu wa mwiisi yawanogele!”

15Wasenga wa kuulanga viwabwelile kuulanga, wasusilaji wailongela, “Tucholeni Beselehemu tukailole mbuli ino ilawilile, yailongile Mndewa.”

16Avo walopola kuchola, wawavika Malia na Yusufu, na wamona imwana king'hele katambalizigwa hanhu hoodimiligwa ng'ombe. 17Wasusilaji viwamone imwana, wawalongela kija kiyawalongele msenga wa kuulanga mbuli ya imwana. 18Wanhu wose wahulike kija kiwalongile wasusilaji, wakanganya. 19Lakini Malia kazika mbuli izo muumoyo na kazigelegeza ng'hani. 20Wasusilaji wabwela kuno okwimba nyila za kumtogola Imulungu kwa mbuli zose ziwahulike na kuzona. Zose zilawilila kamba msenga wa kuulanga viyawalongele.

Yesu kogweleligwa twaga

21Mna isiku ya nane, siku ya kwingizigwa imwana kumbi, wamgwaa twaga da Yesu. Twaga ijo kagweleligwa na msenga wa kuulanga mamake hanagoga inda.

Yesu kogaligwa Mng'anda ya Imulungu

22Vikivikile kipindi cha kuisunha kamba Musa viyalagize mna Gamalagizo gake, Yusufu na Malia wamsola imwana na wachola nayo Yelusalemu ili wamwike mgameso ga Mndewa, 23kamba viyandikigwe mna Gamalagizo ga Mndewa, “Kila mwana wa chaudele wa kimbigalo yonda yavumbuke yagaligwe mgameso ga Mndewa.” 24Vivija wachola kulava nhosa kamba malagizo ga Mndewa vigalondile, “Huwa wabili hebu makinda mabili ga njiwa.”

25Kipindi acho kukala na munhu yokala Yelusalemu, twaga jake Simeoni. Munhu ayo kakala yotenda goyolonda Imulungu na komdumba Imulungu. Vivija kakala yobetela ukombola wa Izilaeli, na Loho Yang'alile kakala hamoja nayo. 26Nayo Loho Yang'alile kamulongela honda yafe mbaka yamone Kilisito Mkombola. 27Loho kamulongoza Simeoni yachole kuna Ing'anda ya Imulungu. Abaho Yusufu na Malia wamgala imwana Yesu kuna Ing'anda ya Imulungu wamtendele kamba Malagizo ga Musa vigalondile. 28Simeoni kamsola imwana mmakono gake, kamtogola Imulungu, kalonga,

29“Mndewa, sambi kusang'hana kamba viulongile,

muleke msang'hanaji wako yachole moyo uholile.

30Kwa meso gangu niwona ukombola wako,

31ukombola uutandile mgameso ga wanhu wose.

32Mulenge uwatenda wanhu haweli Wayahudi wajuwe goulonda,

na kugala ukulu kwa wanhu zako wa Izilaeli.”

33Tatake na mamake imwana wakanganya kija kiyalongile Simeoni mbuli ya imwana. 34Simeoni kawatambikila, kamulongela Malia, “Mwana ino kasaguligwa na Imulungu mbuli ya kupotela na kukomboligwa wanhu wengi wa Izilaeli. Nayo kokuwa kilaguso kulawa kwa Imulungu, na wanhu wengi omulema. 35Abaho magesa ga wanhu wengi gogubuligwa. Na gweye mwenyego, usungu uli kamba panga dikutwa dousoma moyo wako.”

36Kukala na mgane imoja mtula ndagu wa Imulungu, yakalile mvele ng'hani, twaga jake Ana, biti Fanueli kulawa kabila da Asheli. Mtwanzi ayo kakala na mkasano wake kwa miyaka saba toka yasoligwe. 37Nayo kakala mgane mbaka viyavikize miyaka malongo manane na nne. Kipindi chose acho kakala Mng'anda ya Imulungu imisi na ikilo, komgwaa ukulu Imulungu, kopula na kofunga kuja. 38Saa iija kavika, kamgwaa nhogolwa Imulungu na kalonga mbuli za imwana kwa wanhu wose wakalile ombeta Imulungu yaikombole Yelusalemu.

Kubwela Nazaleti

39Yusufu na Malia viwamambukize kugatenda gaja gose galondeke na Malagizo ga Mndewa, wabwela kudibuga jao da Nazaleti mwiisi ya Galilaya. 40Imwana kakula na kawa mbala goya, kakala yamemile nzewele, na ng'hekewa ya Imulungu ikala kumwake.

Mbwanga Yesu Mng'anda ya Imulungu

41Kila mwaka tatake na mamake Yesu wacholaga Yelusalemu kuna inyimwilinyimwili ya Pasaka. 42Yesu viyavikize miyaka longo na mibili, wachola kuna inyimwilinyimwili ya Pasaka kamba viwatendaga. 43Nyimwilinyimwili viimalile, wabwela ukae, lakini mbwanga Yesu kasigala Yelusalemu. Tatake na mamake hawajuwile bule. 44Wao viwagize kakala mna ikibumbila cha wanhu, avo watembela siku ngima. Abaho wasonga kumzahila Yesu mwa ndugu zao na mbwiga zao. 45Hawamone bule, avo wabweleganya Yelusalemu kumzahila. 46Siku ya kadatu wamvika kuna Ing'anda ya Imulungu, kakala hamoja na wafundiza wa Kiyahudi, kowategeleza na kuwauza. 47Wanhu wose wamuhulike wakanganya nzewele zake na vija viyawedike. 48Tatake na mamake viwamone wasinhuka ng'hani. Mamake kamuuza, “Mwanangu, habali ututendile vino? Niye na tatako tukala moyo nyunguwaa tokuzahila gweye!”

49Yesu kawedika, “Habali munizahila? Vino hamujuwile bule niye nilondigwa ng'hale mng'anda ya Tatangu?” 50Lakini wao hawajuwile fambulo da ulonzi awo.

51Abaho Yesu kachola nao Nazaleti, ako kakala kowategeleza. Mamake kazika muumoyo mbuli zino zose. 52Yesu kakula lukuli na ubala, kanogeligwa na Imulungu hamoja na wanhu.

Currently Selected:

Luka 2: King'hutu

Highlight

Copy