Luka 14

Yesu komuhonya munhu mtamu

1Mwiisiku imoja ya Kubwihila, Yesu kachola kuja ndiya mng'anda ya mkulu imoja wa Mafalisayo, wanhu wakala omulola goya Yesu. 2Munhu imoja yakalile na utamu wa kuvimba lukuli keza kwa Yesu. 3Yesu kawauza wafundiza Malagizo ga Musa na Mafalisayo, “Vino, vinoga kumuhonya munhu mwiisiku ya Kubwihila hebu havinogile bule?”

4Lakini wao hawalongile mbuli yoyose bule. Yesu kamsola mtamu ija, kamuhonya, abaho kamuleka yachole. 5Abaho kawauza, “Vino nani kumwenu yeli na mwana hebu ng'ombe, yahadumbukila mdikolombo mwiisiku ya Kubwihila, hamulava mwiisiku ayo?”

6Lakini wao hawadahile kumwidika mbuli ino.

Uhole na moyo unogile

7Yesu kawona wanhu waja wagonekigwe viwakalile osagula vigoda va kuulongozi. Avo kawalongela wose lusimo luno, 8“Munhu yahakugoneka kuna idizengele, sikuukale mvigoda va haulongozi, kwavija kodaha kwiza munhu yagonekigwe yeli munhu mkulu kubanza gweye, 9na munhu yawagoneke mose wabili kokwizila na kukulongela, ‘Segela aho haukalile umulekele miyago.’ Baho kogwa kinyala mgameso ga wanhu na kobwela kukala kuvigoda va kuchugu. 10Lakini wahagonekigwa kuna indiya, genda ukakale kuvigoda va kuchugu, ili munhu yakugoneke yaheza yakulongele, ‘Mbwigangu, izo ukale kuvigoda va haulongozi.’ Baho kopata nhogolwa mgameso ga wanhu wose wagonekigwe. 11Kwavija waja wose oitenda wenyego wanhu wakulu otendigwa wanhu wadodo, na waja oitenda wenyego wanhu wadodo otendigwa wanhu wakulu.”

12Abaho Yesu kamulongela ija yamgoneke, “Kamba kowatanda wanhu ndiya ya imisi hebu ya ichungulo, sikuuwagoneke mbwiga zako, hebu ndugu zako, hebu matajili hebu wanhu weli behi na gweye. Kwavija wahatenda vivo, na hewo nao okugoneka na avo okuliha vija viuwatendele hewo. 13Lakini kamba wahatenda nyimwilinyimwili, wagoneke wakiwa,, mbetembete, waholole, na waja wasuwameso, 14na gweye kotambikiligwa, kwavija awo hawadaha kukuliha. Imulungu kokuliha mwiisiku ya kuzilibuligwa kwa wanhu wanogile.”

Lusimo lwa nyimwilinyimwili ng'hulu

(Matayo 22:1-10)

15Munhu imoja mna iwaja wakalile hana indiya viyahulike avo, kamulongela Yesu, “Wamweda waja onda waje ndiya ya nyimwilinyimwili muundewa wa Imulungu!”

16Yesu kamulongela, “Munhu imoja katenda nyimwilinyimwili ng'hulu, kawagoneka wanhu wengi. 17Viivikile saa ya nyimwilinyimwili, kamtuma msang'hanaji wake yakawalongele wanhu wagonekigwe weze, kwavija kila kinhu kitandigwa. 18Lakini kila munhu kalava kitala chake. Munhu wa ichanduso kamulongela msang'hanaji ija, ‘Nigula mgunda, avo nolondigwa nikaulole. Chonde, ndeka nyhole.’ 19Iyagwe kalonga, ‘Nigula ng'ombe longo wa kulimila, avo vino na muumwanza, nochola kuwageza. Chonde, ndeka nyhole.’ 20Iyagwe kalonga, ‘Sambi sambi nisola mwehe, avo sidaha kwiza.’

21“Msang'hanaji ija kabwela na kumulongela mbuli zose zino mkulu wake. Mkulu wake kagevuzika ng'hani, kamulongela msang'hanaji wake, ‘Lopola ugende mzinzila mhanda na mna gamabuga, uwagale hano wanhu wakiwa, waholole, wasuwameso na mbetembete.’ 22Bahaja msang'hanaji ija kamulongela, ‘Go mkulu, gago gose gasang'hanigwa, lakini kuna gati disigala.’ 23Avo mkulu ija kamulongela msang'hanaji wake, ‘Lawa kunze uchole mzinzila na mna gamakulugumbi ukawalongele wanhu weze, ili ng'anda yangu imeme. 24Nowalongela kweli, kuduhu hata munhu imoja mna iwaja wagonekigwe walemile kwiza yonda yalanze ndiya yangu!’ ”

Kudununzika sama ya kuwa mwanahina

(Matayo 10:37-38)

25Baho lunhu lwa wanhu vilukalile lomkweleleza, Yesu kahinduka, kawalongela, 26“Munhu yoyose yokwiza kumwangu na kuno kowanogela ng'hani tatake na mamake na mwehe wake na wanage na lumbu zake na ndugu zake na vivija kamba kounogela ng'hani ugima wake mwenyego kubanza kumnogela Kilisito, hadaha kuwa mwanahina wangu. 27Na munhu yoyose haupapa msalaba wake na kunikweleleza, hadaha kuwa mwanahina wangu.

28“Vino nani kumwenu yahalonda kuzenga lingo, tanhu hakala hasi na kugelegeza sente za kudizengela, ili yajuwe kamba kana sente za kumambukiza sang'hano yake? 29Buleavo, yahamambukiza kuzenga chandusilo, kolemelwa kumambukiza kuzenga dilingo, na wose wachone acho kilawilile omseka, 30olonga, ‘Munhu ino kasonga kuzenga, lakini kalemelwa kumambukiza sang'hano yake!’

31“Hebu mndewa gani yahaitanda kuchola kuitowa na mndewa iyagwe, tanhu hakala hasi na kugelegeza kamba heyo na wakalizi zake elufu kumi kodaha kuitowa na mndewa miyage yeli na wakalizi elufu ishilini? 32Kamba yahona hadaha, kowatuma wasenga zake wakaiting'hane na mndewa iyagwe, wampule wailumbe yang'hali kutali.” 33Yesu kamambukiza kulonga, “Vivo ili kumwenu, kuduhu munhu yodaha kuwa mwanahina wangu mbaka yaleke kila kinhu kiyali nacho.

Mkele ubanangike

(Matayo 5:13; Maluko 9:50)

34“Mkele unoga, lakini wahagiza ukali wake, kuduhu nzila ya kuubweza kabili. 35Haufaya kwa isi hebu mna imbolea, lakini okwasigwa. Yeli na magwiti yahulike!”

Currently Selected:

Luka 14: King'hutu

Highlight

Copy