Luka 13

Lekeni nzambi buleavo mofa

1Kipindi kikija wanhu wayagwe wakala aho, wamulongela Yesu mbuli ya Wagalilaya wakomigwe na Pilato kipindi viwakalile omulavila nhosa Imulungu. 2Yesu kawedika, “Vino mogesa Wagalilaya awo wakala na nzambi nyingi kubanza Wagalilaya wayagwe lekaavo wadununzika vivo? 3Bule! Nowalongela kweli, na mweye vivija mwahalema kuleka nzambi zenu, mose mofa kamba awo. 4Hebu mogesa wanhu waja longo na wanane wafile kwa kulagaliligwa na lingo ako Siloamu wakala na nzambi nyingi kubanza wanhu wose kudibuga da Yelusalemu? 5Bule! Nowalongela, mwahalema kuleka nzambi, mose mofa kamba awo.”

Lusimo lwa biki hodilelaga matunda

6Abaho Yesu kawalongela lusimo luno, “Munhu imoja kahanda biki da matunda mumgunda wake wa mizabibu. Kachola kuzahila matunda, lakini hapatile tunda jojose bule. 7Avo kamulongela msang'hanaji wake, ‘Lola, mwaka uno wa kadatu nokwiza hano kuzahila matunda mdibiki dino, lakini sipata chochose. Udikanhe! Habali digendelele kuibananga isi?’ 8Lakini msang'hanaji wake kamwidika, ‘Go mkulu, dileke mwaka uno wiiyeka, nodihalilila na kudikila mbolea. 9Abaho kamba dahalela vinoga, lakini dahaleka kulela, kodaha kudikanha!’ ”

Yesu komuhonya mtwanzi siku ya Kubwihila

10Siku dimoja da Kubwihila, Yesu kakala yofundiza mng'anda ya kumpula Imulungu. 11Baho kukala na mtwanzi imoja. Mtwanzi ayo kakala na kinyamkela yamtendile yalumwe miyaka longo na nane. Kakala yaveduke mgongo na hadahile kuigolosa bule. 12Yesu viyamone, kamkema, kamulongela, “Mama, kuhonyigwa utamu wako!” 13Yesu kamwikila makono, bahaja lukuli lwake lugoloka, nayo kamgwaa nhogolwa Imulungu.

14Lakini mkulu wa ng'anda ya kumpula Imulungu kagevuzika kwavija Yesu kamuhonya munhu mwiisiku ya Kubwihila. Avo kawalongela wanhu, “Mnazo siku sita za kusang'hana. Mzisiku azo, mwize muhonyigwe, lakini sikumwize kudisiku da Kubwihila!”

15Mndewa kamwidika, “Mweye mwa watapitapi! Vino, nani kumwenu yoleka kumfungula ng'ombe wake hebu kihongwe wake kulawa mdizizi na kumulongoza yachole kung'wa mazi mwiisiku ya Kubwihila? 16Mtwanzi ino kolawa mulukolo lwa Abulahamu. Nayo kakala yagogigwe na Mwenembago kwa miyaka longo na nane. Vino halondeke kulekesigwa mwiisiku ya Kubwihila?” 17Mbuli azo ziyalongile Yesu ziwatenda waja wamwihile wagwe kinyala, lakini wanhu wayagwe wakala odeng'helela kwa mbuli zose za unzonza ziyasang'hane Yesu.

Lusimo lwa mbeyu ndodo ya haladali

(Matayo 13:31-32; Maluko 4:30-32)

18Abaho Yesu kawauza, “Vino Undewa wa Imulungu uigala na choni? Vino niusimulile kwa lusimo gani? 19Uigala na kija kilawilile kwa munhu yasolile mbeyu ndodo ya haladali na kuihanda mumgunda wake. Mbeyu ayo yota na kuwa biki kulu, na ndege wazenga mvulu zao mna gamatambi gake.”

Lusimo lwa hamila

(Matayo 13:33)

20Yesu kawauza kabili, “Vino Undewa wa Imulungu uigala na choni? 21Uigala na kija kilawilile kwa mtwanzi yasolile hamila na kuitibwiliza hamoja na madebe mabili ga usage, abaho usage wose ugongomoka.”

Mulango msisili

(Matayo 7:13-14, 21-23)

22Yesu kagendelela na mwanza wake kuchola Yelusalemu, kubitila kuna gamabuga na vijiji kowapetela wanhu. 23Munhu imoja kamuuza, “Go mkulu, vino onda wakomboligwe wanhu wadodo waiyeka?”

Yesu kawedika, 24“Gangamaleni mwingile kubitila ulwivi msisili, kwavija wanhu wengi olonda kwingila lakini honda wadahe bule. 25Mwene ng'anda kokwinuka na kuhinda ulwivi. Mweye mokwima kunze na kusonga kugong'onda ulwivi molonga, ‘Mndewa, tuvugulile!’ Nayo kowedika, ‘Sikujuwile kumulawa!’ 26Mweye momwidika, ‘Tuja na kung'wa hamoja na gweye, na gweye kutufundiza kudibuga jetu!’ 27Lakini heyo kolonga kabili, ‘Sikujuwile kumulawa! Segeleni kumwangu, mweye mose mutenda nzambi!’ 28Baho molila na kudafuna meno mwahawona Abulahamu na Isaka na Yakobo na watula ndagu wose wa Imulungu muundewa wa Imulungu, kuno mweye wenyego mwasigwa kunze! 29Wanhu okwiza kulawa mwambu wa kudilawila zuwa na mwambu wa kudihongela zuwa, kulawa mwambu wa kasikazini na mwambu wa kusini, okala hasi hana indiya muundewa wa Imulungu. 30Abaho wanhu waja weli wa ikimambukizo sambi okuwa wa ichanduso, na waja weli wa ichanduso sambi okuwa wa ikimambukizo.”

Yesu koinogela Yelusalemu

(Matayo 23:37-39)

31Kipindi kikija Mafalisayo wayagwe wamcholela Yesu, wamulongela, “Segela hanhu hano uchole hanhu hayagwe, kwavija Helode kolonda kukukoma.”

32Yesu kawedika, “Gendeni mkamulongele vino ija kizongo, ‘Nolava vinyamkela na kuhonya watamu lelo na mayo, na siku da kadatu nomambukiza sang'hano yangu!’ 33Hata avo lelo, mayo, na kisindo nogendelela na mwanza wangu, kwavija hailondigwa mtula ndagu wa Imulungu yafile kunze ya buga da Yelusalemu.

34“Gweye Yelusalemu! Gweye Yelusalemu! Kowakoma watula ndagu wa Imulungu na kuwatowa kwa mabwe waja Imulungu yawatumile kumwako! Miyanza mingapi nilonda kuwahagata wanago kwa makono gangu, kamba vija nguku viyovihagata vinziya vake mna gamabawa gake, lakini hulondile bule! 35Sambi lola, Ng'anda yenu ya Imulungu ilekigwa vihame! Na niye nowalongela, hondamumbone kabili mbaka siku dija vondamulonge, ‘Imulungu yamtambikile ija yokwiza kwa twaga da Mndewa!’ ”

Currently Selected:

Luka 13: King'hutu

Highlight

Copy