Luka 1
1
1Mkulu Teofili,
Wanhu wengi wawamba ng'hani kwandika mbuli zija zilawilile kumwetu. 2Wandika mbuli zija zitulongeligwe na wanhu waja wazonile kwa meso gao kusongela kuna ichanduso na wapetile uusenga. 3Avo go mkulu, kwavija nizizahila vinogile mbuli zino kulawa kuna ichanduso, vinikona niye yokuwa vinoga kukwandikila goya mbuli zija zilawilile. 4Notenda vino ili ujuwe ukweli wose wa mbuli ziufundizigwe.
Kuvumbuka kwa Yohana Mbatizaji kopetigwa
5Kipindi acho Helode viyakalile mndewa wa Yudea, kukala na mulava nhosa, twaga jake Zakalia, wa kibumbila cha Abiya.#1:5 Abiya. Walava nhosa waigola mna ivibumbila malongo mabili na nne, na Abiya kakala kilongozi mna ikibumbila cha nane. Mwehe wake kakala Elizabeti, nayo vivija kalawa mulukolo lwa mulava nhosa Haluni. 6Wose wabili wakala otenda ganogile mgameso ga Imulungu, na kugagoga Malagizo gose ga Mndewa Imulungu. 7Wakala wabule wana kwavija Elizabeti kakala mgumba, na wose wabili wakala wavele.
8Siku dimoja Zakalia kakala Mng'anda ya Imulungu yosang'hana isang'hano yake ya kulava nhosa, kamba viyatendaga mna izamu yake. 9Zakalia kasaguligwa kwa kubwanha simbi, kamba viwatendaga walava nhosa, kwingila Mng'anda ya Mndewa yasome ubani. 10Kipindi cha kusoma ubani vikivikile, wanhu wengi wakala kunze ompula Imulungu.
11Msenga wa kuulanga wa Mndewa kamulawilila Zakalia, kema mwambu wa mkono wa kudila wa upango wa kusomela ubani. 12Zakalia viyamone, kasinhuka na kagwaya kwa bwembwe. 13Lakini msenga wa kuulanga kamulongela, “Sikuudumbe, Zakalia! Imulungu kahulika kupula kwako. Mwehe wako Elizabeti kokulelela mwana wa kimbigalo, twaga jake komkema Yohana. 14Kodeng'helela ng'hani na wanhu wengi odeng'helela kwa kuvumbuka kwake. 15Kokuwa munhu mkulu mgameso ga Mndewa. Honda yang'we ugimbi hebu divai. Kokuwa na Loho Yang'alile kusongela mna iinda ya mamake. 16Kowatenda wanhu wengi wa Izilaeli wailumbe na Mndewa Imulungu wao. 17Nayo komulongolela Mndewa, kokuwa na nguvu kamba mtula ndagu wa Imulungu Eliya. Kowatenda tata na wana wainogele, kowagalusa wanhu waja hawamtegeleza Imulungu wagese ganogile kamba wanhu wanogile, avo yamtandile Mndewa wanhu zake.”
18Zakalia kamuuza msenga ija wa kuulanga, “Vino nojuwaze mbuli ino kamba ya ukweli? Niye na mwehe wangu twa wavele.”
19Msenga ija kamwidika, “Niye na Gabilieli. Nokwima haulongozi ha Imulungu, heyo ayo yanhumile nonge na gweye kukupetela mbuli ino inogile. 20Lakini kwavija hutogole mbuli zangu zonda zilawilile mna ikipindi chake, sambi hudaha kulonga mbaka siku vonda ilawilile mbuli ino.”
21Kipindi acho wanhu wakalile ombeta Zakalia, wakanganya habali kokawa kulawa Mng'anda ya Imulungu. 22Viyalawile kunze hadahile kulonga nao. Wajuwa hana kinhu cha unzonza kiyaonile Mng'anda ya Imulungu, kwavija kawagwaa kilaguso kwa kwinula makono gake, na kakala halonga.
23Viyamambukize sang'hano yake Mng'anda ya Imulungu, kabwela ukae. 24Hamwande kidogo imwehe Elizabeti kagoga inda. Hasegele ukae kumwake kwa miyezi mitano. Kalonga, 25“Hakimambukizo Mndewa kanisegesela kinyala mgameso ga wanhu!”
Kuvumbuka kwa Yesu kopetigwa
26Elizabeti viyakalile na inda ya miyezi sita, Imulungu kamtuma msenga wa kuulanga, twaga jake Gabilieli, yachole kudibuga da Nazaleti, mwiisi ya Galilaya. 27Kakala na usenga wa mhambe imoja yafungiligwe zengele na mbigalo imoja twaga jake Yusufu, yalawile mulukolo lwa Mndewa Daudi. Mhambe ayo twaga jake Malia. 28Msenga ija kamcholela Malia, kamulongela, “Zihoze! Mndewa kahamoja na gweye. Nayo kakunogela ng'hani!”
29Malia viyauhulike usenga awo wa msenga wa kuulanga, kakala na mfundo ng'hani muumoyo wake, kakanganya usenga awo ofambula choni. 30Msenga ija kamulongela, “Malia, sikuudumbe, gweye kupata ng'hekewa ya Imulungu. 31Kogoga inda na kolela mwana wa kimbigalo, nayo komkema Yesu. 32Kokuwa munhu mkulu, kokemigwa Mwana wa Imulungu yeli Uchanha Ng'hani. Mndewa Imulungu komgwaa kigoda cha undewa, kamba viyakalile Daudi muhenga wake. 33Kokuwa mtawala wa lukolo lwa Yakobo milele, na undewa wake hawisha bule!”
34Malia kamuuza msenga ija, “Niye na mhambe. Lelo mbuli ayo yokuwaze?”
35Msenga ija kamwidika, “Loho Yang'alile kokwizila, na nguvu za Imulungu zokugubika. Avo Mwana yonda yavumbuke kokuwa Yang'alile na kokemigwa Mwana wa Imulungu. 36Kumbuka ndugu yako Elizabeti. Wanhu wakala olonga kakala mgumba, lakini sambi kana inda ya miyezi sita, hamoja na uvele uyalinao. 37Kwavija kuduhu kinhu kimulemela Imulungu.”
38Malia kalonga, “Niye na msang'hanaji wa Mndewa, nailawilile kumwangu kamba viulongile.” Abaho msenga ija kasegela.
Malia komtembelela Elizabeti
39Kumwande kidogo Malia kafunga mwanza, kalopola kuchola kuna idibuga dili mvigongo va isi ya Yudea. 40Kengila mng'anda ya Zakalia, kamulamusa Elizabeti. 41Elizabeti viyahulike Malia komulamusa, king'hele kili mna iinda yake kizumha. Nayo Elizabeti kamemezigwa Loho Yang'alile, 42kalonga kwa sauti ng'hulu, “Gweye kunogeligwa kubanza watwanzi wose, na imwana yonda umulele konogeligwa! 43Habali mbuli ino ng'hulu inilawilile niye, mbaka mama wa Mndewa wangu keza kunhembelela? 44Vimhulike kondamusa, mwana king'hele yeli mna iinda yangu kazumha kwa kudeng'helela. 45Kumweda gweye utogola usenga wa Mndewa, kwavija olawilila kumwako!”
Lwila lwa Malia
46Malia kalonga,
“Moyo wangu omgwaa nhogolwa Mndewa,
47Loho yangu yomdeng'helela kwavija Imulungu Mkombola wangu,
48kang'humbuka, niye msang'hanaji wake muhole!
Kulawa sambi wanhu wose ong'hema munhu yamwedile,
49kwavija Imulungu Mkulu kanhendela vinhu vikulu.
Twaga jake ding'ala.
50Kulawa lukolo na lukolo,
kowonela bazi wanhu wose omtegeleza.
51Katenda mbuli ng'hulu kwa mkono wake.
Kawapwililisa wanhu weli na magoda mmizoyo yao.
52Kawahumulusa wandewa mna ivigoda vao va undewa,
na kawenula wahole.
53Weli na nzala kawatenda wegute kwa vinhu vinogile na
kawawinga matajili makono gaiyeka.
54Kasang'hana kija kiyalongile kwa wahenga zetu,
keza kumtaza msang'hanaji wake Izilaeli.
55Kakumbuka kumonela bazi Abulahamu,
na lukolo lwake lose siku zose!”
56Malia kakala kwa Elizabeti miyezi midatu, abaho kabwela ukae kumwake.
Kuvumbuka kwa Yohana Mbatizaji
57Kipindi cha kuifungula Elizabeti vikivikile, kaifungula mwana wa kimbigalo. 58Wanhu weli behi nayo na ndugu zake viwahulike mbuli ng'hulu ziyatendeligwe na Mndewa, wadeng'helela hamoja nayo.
59Imwana viyavikize siku nane, wamwingiza kumbi. Walonda kumkema Zakalia, twaga da tatake, 60lakini mamake kalonga, “Bule, twaga jake Yohana.”
61Wamulongela, “Kuduhu munhu mulukolo lwenu yeli na twaga dijo!” 62Abaho wamgwaa kilaguso tatake, wamuuza twaga gani diyalondile mwanage yakemigwe.
63Zakalia kawapula kibao cha kwandikila, kandika vino, “Twaga jake Yohana.” Wanhu wose wakanganya! 64Bahaja Zakalia kadaha kulonga, kamgwaa nhogolwa Imulungu. 65Wanhu weli behi nayo wadumba ng'hani. Mbuli izo za unzonza zibwililika kila hanhu kuvigongo va isi ya Yudea. 66Kila munhu yahulike mbuli ayo kaigelegeza, kauza, “Vino mwana ino kokuwa nani?” Kwavija udahi wa Mndewa ukala hamoja nayo.
Lwila lwa Zakalia
67Zakalia tatake Yohana kamemezigwa Loho Yang'alile, kalonga usenga wa Imulungu,
68“Yatogoligwe Mndewa, Imulungu wa Izilaeli!
Keza kuwataza wanhu zake na kuwagombola.
69Katugwaa Mkombola yeli na udahi,
mzukulu wa Daudi msang'hanaji wake.
70Kamba viyalongile toka mwaka kubitila watula ndagu zake wang'alile,
71kamba kotukombola na wanhu wang'hobo,
na kulawa mmakono ga wanhu watwihile.
72Kalonga kowonela bazi wahenga zetu,
na kokumbuka lagano jake ding'alile.
73Kaiduwila kwa muhenga wetu Abulahamu,
74kutukombola mmakono ga wanhu watwihile,
na kututenda tumsang'hanile bila kudumba,
75tuwe wanhu wang'alile na wanhu otenda goyolonda Imulungu,
siku zose za ugima wetu.
76Gweye mwanangu, kokemigwa mtula ndagu wa Imulungu yeli Uchanha Ng'hani.
Komulongolela Mndewa,
kuitanda nzila yake.
77Kowalongela wanhu zake kamba okomboligwa,
na nzambi zao zogeligwa kumgongo.
78Imulungu wetu kana bazi na moyo unogile.
Kotumwemwesela mulenge wa ukombola kulawa kuulanga,
79na owamwemwesela wanhu wose okala mdiziza da ifa,
na kulongoza magulu getu mnzila ya tindiwalo.”
80Imwana ija kagendelela kukula lukuli na kawa na nguvu mwiiloho. Kakala kuluwala mbaka siku dija viyalawilile mgameso ga wanhu wa Izilaeli.
Currently Selected:
Luka 1: King'hutu
Highlight
Share
Copy
Want to have your highlights saved across all your devices? Sign up or sign in
NT: © 2014 Pioneer Bible Translators and The Word for the World
OT: © 2019 Pioneer Bible Translators
