Mwanduso 48

Yakobo kowatambikila wanage Yusufu

1Kipindi kiyagwe, Yusufu kalongeligwa kamba tatake mtamu. Avo kawasola wanage wabili Manase na Efulaimu kachola nao kwa tatake. 2Yakobo viyalongeligwe, “Mwanago Yusufu keza kukulola,” Izilaeli kawamba kwinuka kakala mulusazi. 3Yakobo kamulongela Yusufu, “Imulungu yeli na Udahi wose kanilawilila ving'halile ako Luzu mwiisi ya Kanaani, kanitenda nimwede. 4Kanongela, ‘Nokutenda ongezeke na kuwatenda muwe wengi. Nokutenda uwe na ulelo onda uwe isi zili na wanhu wengi, na nokugwaa isi ino kamba uhazi kwa ulelo wako milele.’”

5“Avo, wanago wabili waulelile kuno Misili ning'hali sinavika kumwako okuwa wanangu. Efulaimu na Manase okuwa wangu niye, kamba vija Lubeni na Simeoni viweli wangu. 6Lakini wana onda ulele kumwande okuwa wako. Opata uhazi kubitila Efulaimu na Manase. 7Notenda vivo mbuli ya mamako Laheli. Vinikalile nobwela kulawa Padani heyo kafa behi ya kuvika Efulata mwiisi ya Kanaani. Kandekela lusikisiki, niye nimzika baho behi ya nzila ya kuchola Efulata nayo iyo Beselehemu.”

8Izilaeli viyawone wanage Yusufu, kauza, “Wano wanage nani?”

9Yusufu kamulongela tatake, “Wano wao wana wanigweleligwe na Imulungu hano.” Izilaeli kalonga, “Chonde wagale behi niwatambikile.” 10Avo meso ga Izilaeli gakala hagadaha kulola goya mbuli ya uvele. Yusufu kawakwesa behi wanage nayo tatake kawanonela na kuwafagatila. 11Izilaeli kamulongela Yusufu, “Niye nigesa sichona kabili kihanga chako, lakini Imulungu kanhenda niwone wanago vivija. 12Abaho Yusufu kawasegesa wanage mmavindi ga tatake, na kafugama mbaka hasi.”

13Abaho Yusufu kawasola wanage, Efulaimu kamgoga kwa mkono wa kudila na kamwika mkono wa kumoso wa Izilaeli na Manase kamgoga kwa mkono wa kumoso na kamwika mkono wa kudila wa Izilaeli, na kawagala kumwake. 14Lakini Izilaeli kenula mkono wake wa kudila na kawika mdipala da Efulaimu na kabitiza mkono wake wa kumoso mdipala da Manase hamoja Manase iyo yakalile imkulu. 15Abaho Izilaeli kamtambikila Yusufu, kalonga,

“Imulungu iwamtegeleze wahenga zangu Abulahamu na Isaka,

Imulungu yanilongoze muugima wangu wose mbaka lelo,

16na msenga wa kuulanga yanihonyile na gehile gose yawatambikile wabwanga wano!

Wakemigwe kwa twaga jangu na matwaga ga wahenga zangu Abulahamu na Isaka,

wawe na wana wengi na ulelo mkulu.”

17Yusufu viyone tatake keka mkono wake wa kudila kudipala da Efulaimu hanogelwe bule, avo kaugoga mkono wa tatake kalonda kuusegesa kudipala da Efulaimu yawike kudipala da Manase. 18Yusufu kamulongela tatake, “Si vivo bule tata! Ino iyo mwana imkulu, chonde wike mkono wako wa kudila kudipala jake.”

19Lakini tatake kalema, “Nojuwa mwanangu nojuwa. Manase vivija kokuwa munhu mkulu na kokuwa na wanhu wengi. Lakini imdodo kokuwa munhu mkulu kubanza heyo na wanhu wa ulelo wake okuwa makabila mengi.”

20Avo, Izilaeli kawatambikila siku dijo kalonga, “Wanhu wa Izilaeli owatambikila wanhu kubitila matwaga genu, olonga, ‘Imulungu yakutendele ganogile kamba Efulaimu na Manase.’ ” Avo Izilaeli kamtenda Efulaimu munhu mkulu kubanza Manase.

21Abaho Izilaeli kamulongela Yusufu, “Niye sambi nofa. Lakini Imulungu kokuwa hamoja na mweye, na kowabweza mwiisi ya wahenga zenu. 22Na niye nokugwaa gweye na siyo ndugu zako mgunda uli na mboji uniwabokile Waamoli kwa sime na upinde wangu.”

Currently Selected:

Mwanduso 48: King'hutu

Highlight

Copy