Mwanduso 47
47
1Avo, Yusufu kachola kumulongela Falao, “Tatangu na ndugu zangu wavika hamoja na ng'hondolo zao na mbuzi zao na ng'ombe zao na vinhu vao vose, walawa mwiisi ya Kanaani, sambi wa ako Gosheni.” 2Yusufu kawasagula ndugu zake watano kawalagusa kwa Falao. 3Falao kawauza, “Sang'hano yenu choni?”
Wao wamwidika, “Siye wasang'hanaji zako twa wasusilaji kamba viyakalile tataetu.” 4Vivija wamulongela Falao, “Siye wasang'hanaji zako, twiza kukala mwiisi ino kamba wanhu baki kwavija kuna lufilili lwa nzala ng'hani ako Kanaani na kuduhu ndiya kwa fugo zetu. Avo, chonde go mkulu, siye wasang'hanaji zako tokupula tukale hanhu hokemigwa Gosheni.” 5Falao kamulongela Yusufu, “Tatako na ndugu zako weza kumwako gweye, 6na isi yose ya Misili ya mmakono gako. Weke tatako na ndugu zako hanhu hanogile ng'hani mwiisi ino, waleke wakakale ako Gosheni, na kamba kuna wanhu wowose viweli kuwajuwa goya kamba odaha kulolesa goya zifugo, wasagule wakanilolesele fugo zangu.”
7Abaho Yusufu kamgala kwa Falao tatake Yakobo, Yakobo kamtambikila Falao. 8Falao kamuuza Yakobo, “Kuna miyaka mingapi toka uvumbuke?”
9Yakobo kamwidika Falao, “Miyaka yangu inigweleligwe kamba munhu mbita nzila ni miyaka gana na malongo madatu. Miyaka ayo midodo na imema magazo, na haivikile wingi wa miyaka iwakalile nayo iwahenga zangu kamba wanhu obita nzila.” 10Abaho Yakobo kamtambikila Falao, kasegela. 11Avo, Yusufu kawagwaa tatake na ndugu zake hanhu hokemigwa Lamesesi hanhu hanogile ng'hani mwiisi ya Misili, hanhu aho wagweleligwa hawe hao, kamba viyalagize Falao. 12Yusufu kawagwelela ndiya tatake na ndugu zake na lukolo lose lwa tatake kamba viwakalile.
Lufilili lwa nzala
13Kukala kuduhu ndiya kila hanhu. Lufilili lwa nzala lukala lwenele kila hanhu mbaka iwatenda wanhu wose mwiisi ya Misili na isi ya Kanaani wanyolile mbuli ya nzala. 14Yusufu keka hamoja sente zose za isi ya Misili na isi ya Kanaani mbuli ya ndiya iwagulile, kazigala zisente azo kwa Falao. 15Sente za wanhu wa Misili na Kanaani vizimalile, wanhu wose wamcholela Yusufu na kumulongela, “Chonde, tugwelele ndiya, sikutufe mgameso gako, kwavija sente zetu zisha.”
16Yusufu kawalongela, “Kamba sente zenu zisha, avo munigwelele fugo zenu na niye nowagwaa ndiya.” 17Avo wamgalila Yusufu fugo zao, nayo kawagwaa ndiya na hewo wamgwaa falasi na ng'ombe na ng'hondolo na mbuzi na vihongwe. Avo mwaka awo wose Yusufu kawagwaa ndiya na hewo wamgwaa zifugo.
18Mwaka uyagwe wamcholela kabili Yusufu wamulongela, “Hatukufisa bule, sente zetu zose zisha na fugo zetu zose zako gweye. Avo, go mkulu siye wasang'hanaji zako twabule chochose cha kukugwaa ila siye wenyego na migunda yetu. 19Habali siye tufe mgameso gako, na migunda yetu sikuilimigwe? Avo, tugule siye na migunda yetu mbuli ya ndiya, na siye na migunda yetu yokuwa mmakono ga Falao. Chonde, tugwelele ndiya ili sikutufe na vivija utugwelele mbeyu mbuli ya migunda yetu.”
20Avo Yusufu kaigula isi yose ya Misili iwe ya Falao. Kila munhu wa Misili kalondigwa kuuza mgunda wake mbuli ya lufilili lwa nzala, avo isi yose ikala ya Falao. 21Avo, Yusufu kawatenda wanhu wawe watumwa, kulawa mwambu uno wa isi na mwambu uyagwe wa isi ya Misili. 22Lakini Yusufu haigulile bule isi ya walava nhosa, kwavija siku zose wao wagweleligwa ndiya kulawa kwa Falao, wagweleligwa fungu dilondigwa. Lekaavo hawauzile bule migunda yao. 23Yusufu kawalongela wanhu, “Sambi niwagula mweye na migunda yenu mbuli ya Falao, mbeyu azino hano muhande migunda yenu. 24Lakini mwahasenga ndiya mna gamafungu matano dimoja mumgwelele Falao, na mafungu mane gasigale gokuwa genu mbuli ya mbeyu kwa migunda yenu na ndiya yenu na wanhu wa mzing'anda zenu na wanenu.”
25Wanhu wa Misili wamwidika, “Kuhonya ugima wetu, kwavija kututendela ganogile, siye tokuwa watumwa wa Falao.” 26Vivo Yusufu viyekile lagizo mwiisi ya Misili na dabaho mbaka sambi, kuwa fungu dimoja mna gamafungu matano ga ndiya yose yagweleligwe Falao. Migunda ya walava nhosa waiyeka ayo haisoligwe na Falao.
Siku za kimambukizo za Yakobo
27Avo wanhu wa Izilaeli wakala mwiisi ya Misili hanhu hokemigwa Gosheni. Ako wakala na vinhu vingi na wasonga kongezeka ng'hani. 28Yakobo kakala Misili kwa miyaka longo na saba, miyaka yose ya ugima wa Yakobo ikala miyaka gana na malongo mane na saba. 29Kipindi cha Izilaeli kufa vikikalile behi, kamkema mwanage Yusufu na kamulongela, “Kamba koninogela ingiza mkono wako mna gamaungo gangu madeke na uiduwile kamba konitendela ganogile na kotamaniligwa. Sikuunizike mwiisi ya Misili, 30lakini unitambalize hamoja na wahenga zangu, umhape kulawa Misili ukanizike ako kuwazikiligwe hewo.”
Yusufu kamwidika, “Notenda kamba viulongile.”
31Yakobo kamulongela Yusufu, “Iduwile,” Yusufu kaiduwila. Abaho Izilaeli kaidulika mwambu wa pala wa ulusazi lwake kamtambikila Imulungu.
Currently Selected:
Mwanduso 47: King'hutu
Highlight
Share
Copy
Want to have your highlights saved across all your devices? Sign up or sign in
NT: © 2014 Pioneer Bible Translators and The Word for the World
OT: © 2019 Pioneer Bible Translators
