Mwanduso 45

Yusufu koitambula kwa ndugu zake

1Baho Yusufu kalemelwa kufunga umoyo mgameso ga wasang'hanaji zake wose wakalile hamoja nayo, kalagiza walawe kunze. Avo Yusufu kakala yaiyeka viyailaguse kwa ndugu zake. 2Lakini kalila kwa sauti ng'hulu mbaka Wamisili wamuhulika, vivija wanhu wa mng'anda ya Falao wamuhulika. 3Yusufu kawalongela ndugu zake, “Niye na Yusufu, vino tatangu yang'hali mgima?” Lakini ndugu zake walemelwa kumwidika wagwa kifudete mgameso gake hawadahile kumwidika. 4Yusufu kawalongela ndugu zake, “Chonde kweseni behi.” Viwamkwesele, kawalongela, “Niye iyo ndugu yenu Yusufu yumuniuzile Misili. 5Lakini sambi sikumuigevuzikile hebu kulonga habali mutendile vivo. Imulungu iyo yangalile kuno, niwalongolele, ili niuhonye ugima wa wanhu. 6Uno mwaka wa kabili wa lufilili lwa nzala mwiisi na ing'hali miyaka mitano kumwande, baho wanhu hawadaha kulima hebu kusenga ndiya. 7Imulungu kangala kuno niwalongolele, ili kuhonya ugima wenu, mweye musigale wagima mwiisi na kugala ukombola mkulu. 8Avo, siyo mweye mungalile kuno, lakini Imulungu iyo yangalile na kanitenda nimgwelelege Falao magesa kamba na tatake. Niye na mkulu wa ng'anda yake yose na nowatawala wanhu wose wa Misili.”

9Avo, lopoleni mubwele kwa tatangu na mmulongele, “Yusufu mwanago kolonga, ‘Imulungu kanitenda munhu mkulu mwiisi yose ya Misili. Avo, sikuukawe kwiza kumwangu. 10Kokala behi na niye ako Gosheni, gweye na wanago na wazukulu zako, fugo zako na vinhu vako vose. 11Niye nokulolesa baho kwavija ing'hali miyaka mitano ya lufilili lwa nzala. Buleavo gweye na wanhu zako na fugo zako mogaya kwa nzala.’”

12Abaho Yusufu kagendelela kulonga, “Mweye wenyego molola kwa meso genu, na hata mdodo wangu Benjamini kona kwa meso gake kamba niye iyo Yusufu mwenyego nilonga na mweye. 13Mmulongele tatangu mbuli ya ukulu unilinao kuno Misili na mbuli ya kila kinhu kimone. Avo mulopole mumgale hano tatangu.”

14Abaho Yusufu kamfagatila ndugu yake Benjamini, kuno kolila na vivija Benjamini kamfagatila kuno kolila. 15Kuno yang'hali kolila Yusufu kawafagatila ndugu zake na kawanonela. Baho ndugu zake walonga nayo.

16Mbuli azo zivika mng'anda ya Falao kamba ndugu zake Yusufu weza, Falao na wasang'hanaji zake wadeng'helela. 17Avo, Falao kamulongela Yusufu, “Walongele ndugu zako, wawapapize mizigo vihongwe wao wabwele mwiisi ya Kanaani, 18wamgale hano tatao na ndugu zao wose. Niye nowagwaa hanhu hanogile ng'hani mwiisi ino ya Misili, na wao okala kwa kudeng'helela ganogile ga isi ino. 19Vivija walongele wasole mituka ino ya kubulula ili wawapapile wanao ving'hele na wehe zao na sikuwaleke kumgala tatao. 20Walongele sikuwagese mbuli ya vinhu vao kwavija hanhu hanogile kubanza kose mwiisi ya Misili hokuwa hao.”

21Avo, wana wa Izilaeli watenda kamba viwalagizwe. Yusufu kawagwaa mituka ya kubulula kamba Falao viyalongile na vivija kawagwaa mhamba ya mnzila. 22Kila imoja wao kamgwaa viwalo va kusaula, lakini Benjamini kamgwaa vihande magana madatu va shaba na kamgwaa viwalo vitano va kusaula. 23Vivija kamgalila tatake nhunza zino mbuli ya mwanza wake, vihongwe longo wapapile vinhu vinogile ng'hani mwiisi ya Misili, vihongwe wa kitwanzi longo wapapile ndiya, na magate na vinhu viyagwe va kuja. 24Avo, Yusufu kailaga na ndugu zake. Viwakalile osegela kawazuma kawalongela, “Sikumugombe mnzila!”

25Baho wasegela mwiisi ya Misili na wabwela kwa tatao Yakobo mwiisi ya Kanaani. 26Wamulongela, “Yusufu yang'hali mgima! Heyo iyo mkulu wa isi yose ya Misili.” Baho tatao kakanganya, kwavija hazitogole mbuli azo.

27Lakini viwamulongele mbuli zose ziyalongile Yusufu na viyone mituka ya kubulula iyagalile Yusufu ili kumsola, moyo wake umema deng'ho. 28Izilaeli kalonga, “Sambi notogola, mwanangu Yusufu yang'hali mgima! Nochola nikamulole ning'hali sinakufa.”

Currently Selected:

Mwanduso 45: King'hutu

Highlight

Copy