Mwanduso 41

Yusufu kofambula nzozi za Falao

1Viibitile miyaka mibili, Falao kalota nzozi kema mumgwazo wa lwanda lwa Naili, 2kawona ng'ombe saba wanogile na wanenehe wakala olawa muulwanda na wasonga kuja misanze. 3Abaho walawilila ng'ombe saba wayagwe wakala wasokile na weha ng'hani walawa muulwanda lwa Naili, weza wema behi na waja iwang'ombe wayagwe mumgwazo wa ulwanda. 4Ng'ombe awo wasokile na wehile wawaja waja wayagwe saba wakalile wanogile na wanenehe. Baho Falao kalamuka muutulo. 5Viyawasile kabili kalota lwa kabili. Kona makungwi saba makulu na ganoga gazuka kulawa mna dibelege dimoja. 6Abaho galawilila makungwi saba gayagwe masisili na ganyalile kwa vuke da zuwa. 7Gago gamakungwi saba masisili gagameza gaja gamakungwi saba makulu gamemile uhule. Baho Falao viyalamuke kajuwa kamba kakala kolota. 8Imitondo yake, Falao kanyawanyawa ng'hani, kawakema iwahawi wose wa isi ya Misili na wanhu wabala, kawalongela nzozi zake, lakini kuduhu hata imoja yadahile kumfambulila nzozi azo.

9Abaho ija imkulu wa ung'waji kamulongela Falao, “Lelo nokumbuka ubozi wangu! 10Kipindi kija viutugevuzikile siye wasang'hanaji zako niye na ija imkulu wa koka magate, kutugodeka mna ing'hambi ya mkulu wa wakalizi. 11Kilo kimoja tulota nzozi, kila munhu kalota nzozi ili na fambulo jake. 12Avo mbwanga imoja Muebulania, mtumwa wa mkulu wa wakalizi kakala hamoja na siye mkifungo. Vitumulongele nzozi zetu, heyo katufambulila nzozi zetu kila munhu kamba viili. 13Viyatufambulile vivo viilawilile, niye nibwezigwa mwiisang'hano yangu na ija imkulu wa koka magate katumbikiga mdibiki.”

14Avo, Falao kalagiza Yusufu yagaligwe, nao wamulava mkifungo wambea mvili na kasaula viwalo vake, kagaligwa kuulongozi wa Falao. 15Falao kamulongela Yusufu, “Niye nilota nzozi, lakini kuduhu munhu yodaha kufambula. Nihulika wanhu okutogola kamba munhu yahakusimulila nzozi yake kodaha kuifambula.”

16Yusufu kamwidika Falao, “Niye nabule udahi awo, lakini Imulungu kokwidika kamba viulonda.”

17Falao kamulongela Yusufu, “Nilota nima mumgwazo wa lwanda lwa Naili, 18niwona ng'ombe saba wanogile na wanenehe walawa muulwanda na wasonga kuja misanze. 19Abaho weza ng'ombe saba wayagwe wanyolile na wasisili na wasoka ng'hani. Niye sinawona ng'ombe kamba awo mwiisi ya Misili. 20Avo, waja iwang'ombe saba wasokile ng'hani wawaja waja iwang'ombe saba wanenehe. 21Lakini viweshilize kuwaja kuduhu munhu yodaha kujuwa kamba wawaja wayao. Kwavija wakala wasokile vivija va ichanduso. Baho nilamuka muutulo. 22Abaho nilota kabili, nigona makungwi saba ganogile gamema uhule gazuka kulawa mdibelege dimoja. 23Abaho galawilila makungwi saba gayagwe gabule kinhu masisili na ganyala kwa vuke da zuwa. 24Na makungwi gago saba masisili gagameza gaja makungwi saba ganogile. Avo niye niwalongela wahawi nzozi zino, na kuduhu munhu yadahile kunifambulila.”

25Abaho Yusufu kamulongela Falao, “Nzozi zako mbili fambulo jake dimoja. Imulungu kakugubulila gaja goyolonda kutenda kipindi kiguhi kikwiza. 26Ng'ombe saba wanogile ofambula miyaka saba, na gaja makungwi saba ganogile vivija gofambula miyaka saba, nzozi azo fambulo jake dimoja. 27Waja ng'ombe saba wasokile ng'hani wezile aho kumwande na gaja makungwi saba gelibule kinhu ganyalile kwa vuke da zuwa, fambulo jake ni miyaka saba ya lufilili lwa nzala. 28Kamba vinikulongele mndewa Falao, Imulungu kakugubulila gaja goyolonda kutenda kipindi kiguhi kikwiza. 29Hokuwa na miyaka saba ya mulao mwiisi yose ya Misili. 30Lakini kumwande yokwiza miyaka saba ya lufilili lwa nzala, hata awo umulao osemwigwa mwiisi ya Misili. Lufilili alo lwa nzala loinanga isi ino. 31Mulao osemwigwa kwavija nzala ikwiza yokuwa ng'hulu ng'hani. 32Nzozi ayo ibweleligwa miyanza mibili kila imoja viyagwe kukulagusila kamba Imulungu kagesa kutenda vivo, na kotenda mbuli ayo kipindi kiguhi kikwiza.

33“Avo go mkulu Falao, usagule munhu yeli na nzewele na ubala, umgwee ng'honde ya kuilolesa isi yose ya Misili. 34Abaho go mkulu Falao, usagule wemilizi mwiisi yose, uwalagize weke mgelo umoja mna imigelo mitano ya ndiya yose ya Misili mna ikipindi cha miyaka saba ya mulao. 35Uwalagize wanhu awo iwemilizi weke hamoja ndiya kwa miyaka saba ya mulao. Ndiya ayo ikigwe kukanho jako gweye go mkulu Falao, iwe ngama kwa mabuga gose, na wailolese goya ngama ayo. 36Ndiya ayo yokuwa ngama kwa wanhu wa isi ya Misili ili isi sikuibanangike kwa lufilili lwa nzala lukwiza miyaka saba iyagwe.”

Yusufu kotendigwa mkulu wa isi ya Misili

37Mbuli iyalongile Yusufu itogoligwa mgameso ga Falao na wakulu zake. 38Avo Falao kawauza wakulu zake, “Munhu ino kana loho ya Imulungu, vino todaha kumpata munhu iyagwe kamba ino?” 39Abaho Falao kamulongela Yusufu, “Kwavija Imulungu kakugubulila mbuli zose azo, kuduhu munhu iyagwe yeli na nzewele na ubala kamba gweye. 40Gweye ayo yonda uwe mulolesaji wa isi yangu, na wanhu zangu wose okuwa hasi mmakono gako. Niye niiyeka iyo mkulu kubanza gweye kwavija nokala mkigoda cha undewa. 41Avo sambi nikusagula kamba mkulu wa isi yose ya Misili.” 42Abaho Falao kaivula mkidole chake pete yake ili na kilaguso kamvaza Yusufu, na kamvaza na viwalo va kitani inogile na mkufu wa zahabu msingo. 43Falao kamkweza Yusufu mumtuka wake wa kabili wa falasi na wakalizi walongola kuulongozi wa Yusufu, wakemelela walonga, “Mwime kumgwazo wa nzila,” Falao kamgwaa Yusufu ukulu kwa wanhu wose wa isi ya Misili. 44Abaho Falao kamulongela Yusufu, “Niye iyo mndewa Falao! Nolonga munhu yoyose mwiisi yose ya Misili sikuyatende kinhu chochose bila ya gweye kumulongela.” 45Falao kamgwaa Yusufu twaga da Misili Safenati Panea. Kamgwaa Asenati mndele wa Potifela, mulava nhosa wa buga da Oni yawe mwehe wake. Avo Yusufu kasonga kutembelela isi yose ya Misili. 46Yusufu kakala na miyaka malongo madatu viyasongile kumsang'hanila Falao, mndewa wa Misili. Kalawa mng'anda ya Falao na kuitembelela isi yose ya Misili.

47Avo mna imiyaka ija saba ya mulao, migunda ya Misili ilela ndiya nyingi ng'hani. 48Yusufu keka hamoja ndiya yose kipindi acho cha miyaka saba ya mulao na kaika ngama mmabuga ga Misili. Kila buga keka ngama ya ndiya kulawa mmigunda ili mmabehi na buga dijo. 49Yusufu keka ngama ya ndiya nyingi ng'hani, ikala nyingi kamba msanga wa mwhani, ikala haipimigwa bule.

50Miyaka ya lufilili lwa nzala hainavika Yusufu kakala na wana wabili kulawa kwa mwehe wake Asenati, mndele wa Potifela mulava nhosa wa buga da Oni. 51Yusufu kamgwaa mwanage twaga da Manase kalonga, “Imulungu kanhenda niisemwe magazo gangu kulawa kwa ndugu wa ng'anda ya tatangu.” 52Mwana wa kabili kamgwaa twaga da Efulaimu kalonga, “Imulungu kangwaa wana mwiisi ya kugaya kwangu.”

53Miyaka ija saba ya mulao mwiisi ya Misili ibita, 54na miyaka saba ya lufilili lwa nzala isonga, kamba viyalongile Yusufu baho haichanduso. Isi zose ziyagwe zikala na nzala, lakini isi yose ya Misili ikala na ndiya. 55Wanhu wa isi ya Misili viwasongile kupata nzala, wamulilila Falao yawagwee ndiya. Na heyo Falao kawalongela wanhu wose wa Misili, “Gendeni kwa Yusufu, donda yawalongele tendeni.” 56Nzala yenela ng'hani mwiisi yose ya Misili. Avo Yusufu kafungula makanho gose kawauzila wanhu wa Misili indiya. 57Abaho wanhu kulawa kila hanhu mwiisi yose weza Misili kwa Yusufu kugula ndiya kwavija nzala ikala ng'hulu ng'hani mwiisi yose.

Currently Selected:

Mwanduso 41: King'hutu

Highlight

Copy