Mwanduso 40

Yusufu kowafambulila nzozi iwafungwa

1Kipindi kiyagwe kumwande, mkulu wa ung'waji na mkulu wa koka magate wa mndewa Falao wamgevuza mndewa ayo. 2Falao kawagevuzikila wakulu awo wabili. 3Kawagodeka mwiing'hambi ya mkulu wa wakalizi, hanhu aho hayagodekigwe Yusufu. 4Wakala mkifungo kwa kipindi fulani na mkulu wa wakalizi kamsagula Yusufu yawasang'hanile wakulu awo wabili.

5Siku dimoja ikilo wakulu awo wabili walota nzozi, kila munhu kalota nzozi yake, mkulu wa ung'waji kalota nzozi ili na fambulo jake na mkulu wa koka magate kalota nzozi ili na fambulo jake. 6Imitondo yake Yusufu viyacholile kuwalola wakulu awo wabili, kawona onyawanyawa. 7Avo Yusufu kawauza wakulu awo wa Falao wakalile wagodekigwe hamoja na heyo mwenyego mna ing'hambi ya mkulu wa wakalizi, kawauza, “Habali lelo vihanga venu vogela bazi?”

8Wamwidika, “Siye wose tulota nzozi, lakini kuduhu munhu wakutufambulila nzozi zetu.”

Yusufu kawalongela, “Imulungu iyo yodaha kufambula, nongeleni nzozi zenu.”

9Avo mkulu wa ung'waji kamsimulila Yusufu nzozi yake, kalonga, “Mna inzozi niye nyona mzabibu kuulongozi wangu, 10mzabibu awo ukala na matambi madatu. Bahaja viusongile kuzuka mijani, maluwa gake galela vimvaba va zabibu zipile. 11Ng'hala ngogile kikasi cha Falao mmakono gangu, avo nizisola zabibu azo nizikamila mkikasi acho, nimgwaa Falao.”

12Yusufu kamulongela mkulu ayo, “Fambulo da nzozi yako ijo dino, matambi ago madatu gauwone azo siku ndatu. 13Zahabita siku ndatu Falao kokulava mkifungo na kokubweza kabili muukulu wako. Na gweye komgwaa kabili Falao kikasi cha ung'waji kamba viutendile aho umwaka. 14Lakini chonde sikuunisemwe wahalawa kunze unyonele bazi na unitambule mgameso ga Falao, ili ndawe mkifungo. 15Kwavija niye nitolosigwa kulawa mwiisi ya Waebulania na hano Misili sitendile mbuli yoyose ihile ya kunhenda nigodekigwe.”

16Ija imkulu wa koka magate viyone kamba kafambula vinogile, kamulongela Yusufu, “Na niye vivija nilota nzozi! Mna inzozi yangu ng'hala mhapile mdipala jangu migelo midatu ya magate. 17Mna ikigelo cha uchanha kukala na vinhu vingi va kuja mbuli ya Falao, lakini ndege wakala woja kulawa mkigelo acho kuko kudipala jangu.”

18Yusufu kamulongela, “Fambulo da nzozi yako ijo dino, ija imigelo midatu ni siku ndatu. 19Zahabita siku ndatu Falao kokulava mkifungo kokanha pala jako na kokutumbika mdibiki, na ndege oluja lukuli lwako.”

20Avo siku da kadatu kumwande, ikala siku ya kukumbuka kuvumbuka kwa Falao, avo kawagoneka wakulu zake wose mna inyimwilinyimwili, kawalava mkifungo mkulu wa ung'waji na mkulu wa koka magate, kaweka mgameso ga wakulu wose yawagoneke. 21Abaho kambwezela ukulu wake mkulu wa ung'waji ili yamgwee kikasi cha ung'waji. 22Lakini ija imkulu wa koka magate kamtumbika mdibiki, kamba Yusufu viyawafambulile nzozi zao. 23Lakini ija imkulu wa ung'waji kamsemwa Yusufu na hamkumbuke bule.

Currently Selected:

Mwanduso 40: King'hutu

Highlight

Copy