Mwanduso 30

1Laheli viyone hanamulelela Yakobo wana kamonela migongo Lea, mkulu wake. Avo kamulongela Yakobo, “Ngwaa wana buleavo nofa.”

2Yakobo kamgevuzikila Laheli kalonga, “Vino niye ngaluka Imulungu yakutendile sikuulele wana?” 3Laheli kamulongela, “Mtumwa wangu Biliha kabaha, wasa nayo ili yandelele mwana, na niye mhate wana kubitila heyo.” 4Avo Laheli kamgwaa Yakobo mtumwa wake Biliha yawe kamba mwehe wake. Yakobo kawasa nayo, 5Biliha kagoga inda, kamulelela Yakobo mwana wa kimbigalo. 6Laheli kalonga, “Imulungu kanigombela, kahulika kulila kwangu na kangwaa mwana wa kimbigalo.” Avo mwana ayo kamkema Dani, fambulo jake kanigombela. 7Biliha mtumwa wa Laheli kagoga inda kabili, kamulelela Yakobo mwana wa kabili wa kimbigalo. 8Laheli kalonga, “Niitowa ng'hani na mkulu wangu, na niye nihuma.” Avo twaga jake kamkema Nafutali, fambulo jake niitowa.

9Lea viyone sambo isha, kamsola mtumwa wake Zilipa, kamgwaa Yakobo yawe kamba mwehe wake. 10Zilipa mtumwa wa Lea kamulelela Yakobo mwana wa kimbigalo. 11Lea kalonga, “Nimweda.” Avo twaga jake kamkema Gadi, fambulo jake nimweda. 12Zilipa, mtumwa wa Lea, kamulelela Yakobo mwana wa kabili wa kimbigalo. 13Lea kalonga, “Sambi nodeng'helela! Watwanzi ong'hema deng'ho.” Avo twaga jake kamkema Asheli fambulo jake deng'ho.

14Kipindi cha kusenga ngano, Lubeni kachola kumgunda ako kona nhula,#30:14 Watwanzi wakala osola nhulaili ziwataze kugoga inda. kamgalila mamake yakemigwe Lea. Laheli kamulongela Lea, “Chonde mbagulila nhula za mwanago.”

15Lakini Lea kamwidika, “Gweye viumsolile mkasano wangu kugesa ikala mbuli ndodo. Na sambi vivija kolonda nhula za mwanangu.” Laheli kamwidika, “Vinoga, kamba kongwaa nhula za mwanago lelo Yakobo kowasa kumwako.”

16Avo, ichungulo Yakobo viyabwelile kulawa kumgunda, Lea kachola kumbokela, kamulongela, “Lelo kowasa na niye, kwavija nikulihila kwa nhula za mwanangu.” Avo ikilo kawasa kwa Lea.

17Imulungu kamuhulika Lea, nayo kagoga inda, kamulelela Yakobo mwana wa tano wa kimbigalo. 18Lea kalonga, “Imulungu kangwaa nhunza yangu, kwavija nimgwaa mkasano wangu mtumwa wangu,” avo kamkema mwana ayo Isakali, fambulo jake nhunza yangu. 19Lea kagoga inda kabili, kamulelela Yakobo mwana wa sita wa kimbigalo. 20Lea kalonga, “Imulungu kamgwaa nhunza inogile. Sambi mkasano wangu konitogola kwavija nimulelela wana sita.” Avo kamkema imwana ayo Zabuloni, fambulo jake konitogola. 21Abaho kalela mwana wa kitwanzi, kamkema Dina.

22Abaho Imulungu kamkumbuka Laheli, kamuhulika na kumtenda yalele wana. 23Laheli kagoga inda, kalela mwana wa kimbigalo, kalonga, “Imulungu kanisegesela kinyala changu.” 24Avo kamkema mwana ayo Yusufu, fambulo jake kanisegesela, kwavija kalonga, “Nompula Mndewa Imulungu yanyengezele mwana iyagwe wa kimbigalo.”

Fugo ya Yakobo yokwengezeka

25Laheli viyamulelile Yusufu, Yakobo kamulongela Labani, “Ndeka mbwele ukayangu, mwiisi yangu. 26Ngwelela wehe zangu na wanangu, niwapatile kwa kukusang'hanila, nisegele. Kujuwa vinikusang'hanile goya.” 27Lakini Labani, kamulongela, “Kamba kononda, chonde sikuusegele, kwavija njuwa kwa uhawi kamba Mndewa Imulungu kanitenda nimwede mbuli ya gweye. 28Nongela fungu jako, na niye nokuliha.”

29Yakobo kamulongela, “Gweye kujuwa vinikusang'hanile, na vija fugo yako viyongezeke mmakono gangu. 30Kwavija kija kidodo kiukalile nacho ning'hali sinavika, sambi chongezeka ng'hani na kokose kunicholile Mndewa Imulungu kakutenda umwede. Lakini sambi na niye nolonda kuwalola goya wanhu wa mng'anda yangu.”

31Labani kamuuza, “Nikugwee choni?” Yakobo kamwidika, “Sikuungwee kinhu chochose, nogendelela kuwalola wanyama wako kamba konhendela kinhu kimoja. 32Nhogolela niwakagule wanyama wako, lelo, na kulawa mumo, nibagule kila bofu da ng'hondolo yeli na uzegenhe zegenhe na kila ng'hondolo mtitu, na mbuzi weli na uzegenhe zegenhe. Dijo ijo fungu jangu, dinilonda. 33Avo ako kumwande, kinongile chokoneka goya, vonda wize kulola fungu jangu. Mbuzi yoyose yelibule uzegenhe zegenhe hebu ng'hondolo yelibule utitu yahakoneka mkibumbila changu, iyo kebigwa.”

34Labani kamwidika, “Ona, na iwe kamba viulongile.” 35Lakini siku didija Labani kawabagula mbuzi wose wa kimbigalo weli na uzegenhe zegenhe hebu mindilizi ndilizi na mbuzi wose wa kitwanzi weli na uzegenhe zegenhe hebu mindilizi ndilizi, vivija kawasegesa ng'hondolo wose weli watitu, kawagwaa wanage wawasusile kamba fungu da Yakobo. 36Labani na bumbila dijo dili fungu da Yakobo, kainega na Yakobo muumwanza wa kutembela siku ndatu, nayo Yakobo kagendelela kuwasusila wanyama wasigale wa Labani.

37Avo, Yakobo kasola fito mbisi za mibiki midatu kagabandula gamagome, na katenda misitali mzifito azo. 38Abaho kazisimika zifito ziyabandule kuulongozi wa viya va kung'wela mazi, hanhu haja wanyama wezaga kung'wa mazi, kwavija wanyama wahaiting'hana hamoja kung'wa mazi oikwela. 39Wanyama waikwela na kugoga inda kuulongozi wa fito azo, walela wana weli na uzegenhe zegenhe na mindilizi ndilizi. 40Yakobo kageka kumgwazo mabofu ga ng'hondolo, abaho awo wasigale kawatenda walole ubazi wa wanyama weli na uzegenhe zegenhe na utitu kudikalile bumbila da Labani. Kwa kutenda avo, Yakobo kapata bumbila jake mwenyego, na hadikile hamoja na wanyama wa Labani.

41Avo chahavika kipindi cha wanyama weli na nguvu kugoga inda, Yakobo kokwika zifito kuulongozi wao mna iviya va kung'wela mazi, ili waikwele na wagoge inda kuulongozi wa fito azo. 42Lakini hazikile fito azo kuulongozi wa wanyama wanyolile. Hakibitile kipindi kitali, wanyama wanyolile wakala wa Labani, na waja weli na nguvu wakala wa Yakobo. 43Avo, Yakobo kawa tajili ng'hani, kakala na mabumbila makulu ga wanyama, kakala na watumwa wa kitwanzi na wa kimbigalo na ngamiya na vihongwe.

Currently Selected:

Mwanduso 30: King'hutu

Highlight

Copy