Mwanduso 29

Yakobo kovika kwa Labani

1Yakobo kagendelela na mwanza wake, kavika mziisi za wanhu wa mwambu wa kudilawila zuwa. 2Siku dimoja kona sima kuluwala na mabumbila madatu ga ng'hondolo gahumula, kwavija ng'hondolo awo wakala ong'wa mazi kulawa mdisima dijo. Mmulomo wa disima kukala na dibwe kulu. 3Mabumbila ga ng'hondolo gahaiting'hana, wasusilaji odikwesa kumgwazo dibwe dijo kulawa hana umulomo wa disima na owang'weza ng'hondolo wao. Abaho odibweza bahaja mmulomo wa disima.

4Yakobo kawauza iwasusilaji, “Ndugu zangu molawa kwahi?” Wamwidika, “Tolawa mwiisi ya Halani.”

5Kawauza, “Mumjuwa Labani, mzukulu wa Naholi?” Wamwidika, “Ona, tumjuwa.”

6Abaho Yakobo kawauza, “Vilihi mgima?” Wamulongela, “Ona, mgima, na mndele wake Laheli aija kuja kokwiza na ng'hondolo wake.”

7Abaho Yakobo kawalongela, “Loleni zuwa ding'hali hadinahonga, siyo kipindi cha kuweka hamoja ng'hondolo. Wang'wezeni mazi mkawasusile.”

8Lakini wao wamulongela, “Hatudaha bule kutenda vivo mbaka vibumbila vose vikale hamoja na dibwe dikwesigwe kumgwazo ya disima, baho towang'weza iwang'hondolo.”

9Yakobo viyakalile yang'hali kolonga na wasusilaji awo, Laheli keza na ng'hondolo wa tatake, kwavija heyo iyo yakalile yowasusila. 10Yakobo viyamone Laheli mndele wa Labani, lumbu wa mamake na viyawone ng'hondolo wa Labani, kachola kudisima kadikwesa kumgwazo didibwe kawang'weza ng'hondolo wa mjomba wake. 11Abaho Yakobo kamnonela Laheli kwa deng'ho mbaka mahozi gamulawa. 12Yakobo kamulongela Laheli kamba heyo kakala ndugu wa tatake na kakala mwana wa Lebeka. Laheli kakimbila ukae kamulongela tatake.

13Labani viyahulike mbuli za Yakobo, mwihwage, kalopola kumbokela, kamfagatila na kumnonela, kamgoneka ukae kumwake. Yakobo kampetela mbuli zose zilawilile. 14Nayo Labani kalonga, “Gweye kwa ndugu yangu wa usungu.” Yakobo kakala na mjomba wake kwa mwezi umoja.

Yakobo kowasola wandele wa Labani

15Siku dimoja Labani kamulongela Yakobo, “Siyo kwavija gweye kwa ndugu avo unisang'hanile bule. Nongele fungu diulonda.” 16Labani kakala na wandele wabili, imndele ikulu twaga jake Lea na imdodo twaga jake Laheli. 17Lea kakala na meso makulu, lakini Laheli kakala yanogile na kakala na unovu.

18Yakobo kamnogela Laheli, avo kamulongela Labani, “Nokusang'hanila kwa miyaka saba unigwee Laheli, mndele wako imdodo yawe mwehe wangu.”

19Labani kamulongela, “Vinoga nikugwee gweye umsole kubanza yasoligwe na munhu iyagwe, kala bahano na niye.” 20Avo, mbuli ya kumnogela Laheli, Yakobo kamsang'hanila Labani miyaka saba, lakini kumwake heyo kona kamba kipindi kidodo kwavija kamnogela ng'hani Laheli.

21Abaho Yakobo kamulongela Labani, “Kipindi changu kisha, avo ngwelele mwehe wangu nolonda kuwasa nayo.” 22Avo, Labani kawagoneka wanhu kuna inyimwilinyimwili. 23Lakini viivikile ichungulo, kamsola Lea mndele wake imkulu, kamgala kwa Yakobo. Yakobo kawasa nayo. 24Labani kamulava Zilipa yakalile mtumwa wake yamsang'hanile mndele wake Lea. 25Vikuchile, Yakobo kajuwa kamba kakala Lea, avo kamuuza Labani, “Kunhenda choni? Niye nikusang'hanila mbuli ya Laheli. Avo habali kunivizila?”

26Labani kamwidika, “Mwiisi yetu hatutendaga vivo, siyo mila yetu kutenda imdodo yasoligwe tanhu kipindi imkulu yang'hali. 27Beta mbaka zishe siku saba za nyimwilinyimwili ya zengele, abaho nokugwaa Laheli kamba konisang'hanila kwa miyaka saba iyagwe.”

28Yakobo katogola. Avo Yakobo kakala na Lea kwa siku azo saba, abaho Labani kamgwaa Laheli mndele wake imdodo yawe mwehe wake. 29Labani kamulava Biliha yakalile mtumwa wake wa kitwanzi yamsang'hanile mndele wake Laheli. 30Avo, Yakobo kawasa na Laheli vivija. Lakini Yakobo kamnogela ng'hani Laheli kubanza Lea. Yakobo kamsang'hanila Labani miyaka saba iyagwe.

Wana wa Yakobo

31Mndewa Imulungu viyone Lea kehiligwa, kamtenda yalele wana, lakini Laheli kakala mgumba. 32Lea kagoga inda, kalela mwana wa kimbigalo, kamkema Lubeni, fambulo jake mwana mbigalo, kwavija kalonga, “Mndewa Imulungu kona kugaya kwangu, kulawa sambi mkasano wangu koninogela.” 33Lea kagoga inda kabili, viyalelile mwana wa kimbigalo kalonga, “Kwavija Mndewa Imulungu kahulika kamba nihiligwa, lekaavo vivija kangwaa na ino.” Avo kamkema Simeoni, fambulo jake kahulika. 34Abaho kagoga inda lwa kadatu na kalela mwana iyagwe wa kimbigalo, kalonga, “Sambi mkasano wangu koilumba na niye, kwavija nimulelela wana wadatu wa kimbigalo.” Avo mwana ayo kamkema Lawi, fambulo jake koilumba. 35Kagoga inda lwa ikane, na viyalelile mwana wa kimbigalo kalonga, “Mwanza uno nomgwaa nhogolwa Mndewa Imulungu.” Avo mwana ayo kamkema Yuda, fambulo jake nhogolwa. Abaho kaleka kulela wana.

Currently Selected:

Mwanduso 29: King'hutu

Highlight

Copy