Mwanduso 27

Isaka komtambikila Yakobo

1Isaka kakala mvele na kawa msuwameso. Avo kamkema mwanage imkulu Esau, kamulongela, “Mwanangu,” imwana kamwidika, “Tata, nabaha.”

2Isaka kalonga, “Lola, niye namvele, na siku ya kufa kwangu siijuwile bule. 3Avo sola upinde na msale, uchole kumuhulo ukanisakile mnyama. 4Nhelekele ndiya inondaga, ungalile ndie, ili nikutambikile ning'hali sinakufa.”

5Isaka viyakalile komulongela Esau, Lebeka kakala kotegeleza. Avo Esau viyacholile kusaka, 6Lebeka kamulongela mwanage Yakobo, “Nimuhulika tatako komulongela mkulu wako Esau, 7‘Ngalila mnyama, unhelekele, nahamala kuja nikutambikile mgameso ga Mndewa Imulungu ning'hali sinakufa.’ 8Lelo mwanangu, nhegeleza goya na usang'hane kinikulongela. 9Genda, kuna ifugo ya mbuzi, kangalile mabofu mabili ga mbuzi ganenehe, nimtelekele tatako ndiya ili mulile iyalondaga. 10Abaho mgalile tatako yaje, ili yakutambikile yang'hali hanakufa.”

11Yakobo kamulongela mamake, Lebeka, “Lakini kojuwa kamba mkulu wangu Esau kana upipi mulukuli, niye nabule upipi mulukuli. 12Kamba tatangu yahambabasa, nokoneka kamba nomvizila, avo noiduwila mwenyego kubanza kutambikiligwa.” 13Mamake kamwidika, “Mwanangu, kamba kuduwiligwa mbuli yako, leka nduwiligwe niye, genda kangalile gago gamabofu ga mbuzi.”

14Avo Yakobo kagenda kuwasola, kamgalila mamake, na heyo kateleka indiya iyalondaga tatake. 15Abaho Lebeka kasola viwalo vinogile ng'hani va mwanage wa chaudele Esau, vikalile mng'anda, kamvaza mwanage imdodo Yakobo. 16Kamvaza ng'hwembe za mbuzi mmakono gake na msingo mulibule upipi. 17Abaho kamgwaa ayo indiya ili umulile na gamagate gayatandile.

18Avo, Yakobo kachola kwa tatake, kamkema, “Tatangu!” Nayo kamwidika, “Mwanangu. Gweye kwa mwanangu nani?” 19Yakobo kamwidika tatake, “Niye na Esau, mwanago wa chaudele, nisang'hana kamba viunongele, chonde, lamuka uje ndiya inikugalile, ili unitambikile.”

20Isaka kalonga, “Mwanangu, vilihi hukawile bule kumpata?”

Yakobo kamwidika, “Mndewa Imulungu wako iyo yanitazile kumpata.”

21Avo Isaka kamulongela Yakobo, “Kwesa behi mwanangu nikukwase, njuwe kamba kweli gweye kwa mwanangu Esau.” 22Yakobo kakwesa behi na tatake Isaka, nayo kamkwasa na kalonga, “Sauti ya Yakobo, lakini makono ga Esau.” 23Avo hamjuwile bule kwavija makono gake gakala na upipi kamba mkulu wake Esau, avo kaitanda kumtambikila. 24Kamuuza kabili, “Vino gweye kweli kwa mwanangu Esau?”

Nayo kamwidika, “Ona.”

25Avo, Isaka kamulongela, “Mwanangu ngalila inyama yuukomile nije, nahamambukiza nikutambikile.” Yakobo kamgalila indiya na heyo kaja, vivija kamgalila idivai na heyo kang'wa. 26Abaho tatake Isaka, kamulongela, “Kwesa behi uninonele.” 27Avo, Yakobo kamgendela na kamnonela, Isaka viyahulike mnung'ho wa viwalo vake, kamtambikila, kalonga, “Oo, mnung'ho unogile wa mwanangu uigala na mnung'ho wa mgunda utambikiligwe na Mndewa Imulungu. 28Nompula Imulungu yagale mvula mna imigunda yako na yakugwelele vinhu vose va mwiisi, na uigwise ndiya na zabibu. 29Wanhu wa mziisi wakusang'hanile na wanhu wakufugamile, uwatawale ndugu zako na wanage mamako wakufugamile. Wonda wakuduwile, waduwiligwe na Imulungu na onda wakutambikile, nao watambikiligwe.”

Esau kompula tatake yamtambikile

30Isaka viyamambukize kumtambikila Yakobo, bahaja Yakobo viyasegele kwa tatake, mkulu wake Esau kabwela kulawa kusaka. 31Na heyo vivija kateleka ndiya ili mulile, kamgalila tatake. Abaho kamulongela, “Tatangu lamuka uje nyama inikusakile, ili unitambikile.”

32Isaka kamuuza, “Gweye kwa nani?”

Nayo kamwidika, “Niye na mwanago wa chaudele, Esau.”

33Baho Isaka kagwaya ng'hani, kalonga, “Kumbe ija yasakile nyama na kungalila nani? Na niye nija gweye haunakwiza abaho nimtambikila, nayo kotambikiligwa kweli!”

34Esau viyahulike mbuli za tatake kaguta kwa sauti ng'hulu kalonga, “Tata, na niye vivija nitambikile!”

35Lakini Isaka kalonga, “Ndugu yako keza kamvizila, nayo kasola kutambikiligwa kwako.”

36Esau kalonga, “Uno mwanza wa kabili kamvizila, lekaavo twaga jake Yakobo! Tanhu kamboka ukulu wangu kamba mwana wa chaudele na sambi kasola kutambikiligwa kwangu!” Abaho kamuuza tatake, “Hundekele kutambikiligwa kokose?”

37Isaka kamwidika Esau, “Nimtenda yakutawale na niwatenda ndugu zake wose wawe wasang'hanaji zake na nimgwaa ndiya na zabibu. Sambi kuduhu kinhu chochose chonda nikutendele mwanangu.”

38Esau kamulongela tatake, “Gweye kuna kutambikila kumoja kwiiyeka tata? Nhambikile na niye vivija tatangu!” Abaho Esau kalila kwa usungu.

39Tatake kamwidika Esau,

“Ukazi wako okuwa kutali na isi inogile,

kutali na mvula ya kuulanga.

40Kokala kwa kuitowa kwa sime jako

na komsang'hanila mdodo wako.

Lakini wahambiduka

kolawa mmakono gake.”

41Avo, Esau kamwihila Yakobo kwavija tatake kamtambikila Yakobo. Esau kailongela, “Tatangu yahafa na siku za kumulilila zahesha, nomkoma ndugu yangu Yakobo.”

42Lakini Lebeka viyajuwile kiyolonda kutenda Esau, kamkema Yakobo, kamulongela, “Ukale meso ndugu yako Esau kokusamhukila na kuno kogelegeza yakukome. 43Avo mwanangu tenda vinikulongela. Lopola ukimbile kwa lumbu jangu Labani ako Halani. 44Kala kuko mbaka ng'hasiliki ya ndugu yako yahahola. 45Ng'hasiliki ya mkulu wako yahesha na kuisemwa kija kiumtendele nomtuma munhu ubwele. Habali kwa siku dimoja nifiligwe na mweye wanangu wabili?”

46Lebeka kamulongela Isaka, “Niye nidonha mbuli ya wehe zake Esau wano Wahiti, kamba Yakobo vivija yahasola imoja wa watwanzi wano Wahiti, niye nokuwa na kilamuso gani cha kuwa mgima?”

Currently Selected:

Mwanduso 27: King'hutu

Highlight

Copy