Mwanduso 23

Sala kofa

1Sala kakala na miyaka gana na malongo mabili na saba. 2Kafa ako kudibuga da Kiliati Aliba vivija dokemigwa Hebuloni mwiisi ya Kanaani, Abulahamu kamulilila na kamwikila tanga.

3Abulahamu kaluleka lukuli lwa mwehe wake, kachola kulonga na Wahiti, kawalongela, 4“Niye kumwenu na munhu baki. Ngweleleni hanhu nimzikile mwehe wangu na hawe hanhu ha kuzikila wanhu zangu.”

5Wahiti wamwidika Abulahamu, 6“Go mkulu, tutegeleze. Gweye kwa munhu mkulu usaguligwe na Imulungu. Mzike mwehe wako kudipanga dinogile ng'hani. Kila munhu kumwetu kodeng'helela kukugwaa mhango ili umzike mwehe wako na hawe hanhu ha kuzikila wanhu zako.”

7Baho Abulahamu kafugama na kuidulika haulongozi wa Wahiti. 8Kawalongela, “Kamba monhogolela nimzike baha mwehe wangu, chonde, mpuleni Efuloni mwanage Sohali, mbuli ya niye, 9nimgwee sente nigule mhango yake ya Makipela, ili kuimbaka ya mgunda wake. Mpuleni nimgwee sente ilondigwa, bahano mgameso genu ili nihatende hanhu ha kuzikila.”

10Efuloni mwenyego kakala yakalile hamoja na Wahiti wayage wakalile waiting'hane hana ulwivi lwa dibuga, mgameso gao kamwidika, 11“Go mkulu bule sichuuza, nokugwaa mgunda wose hamoja na imhango ili mumo. Nokugwaa mgameso ga wanhu zangu ili umzike mwehe wako.”

12Abulahamu kawadulikila kabili Wahiti, 13kamulongela Efuloni mgameso gao, “Chonde, tegeleza nokupula. Nogula mgunda wose. Togola nilave fungu, mumo nomzika mwehe wangu.”

14Efuloni kamwidika, 15“Go mkulu, mgunda ouzigwa kwa kilo nne za shaba, kumwangu niye na gweye hana choni? Mzike mwehe wako.” 16Abulahamu katogola, mgameso ga Wahiti kamgwaa Efuloni fungu diyalongile, dikala kilo nne za shaba, vivo wakalile ouza wachuuzi wa kipindi acho.

17Avo mgunda wose wa Efuloni ukalile ako Makipela mwambu wa Mamule, ndio kulonga mgunda na mhango na mibiki yose ikalile mzimbaka, vose avo vikala va Abulahamu. 18Wahiti wose wakalile hana ulwivi lwa dibuga wakala wajuwile kamba vinhu vose vikala va Abulahamu.

19Avo Abulahamu kamzika imwehe Sala mwiimhango ikalile mumgunda wa Makipela behi na Mamule uli Hebuloni mwiisi ya Kanaani. 20Avo mgunda ukalile wa Wahiti na mhango ili mumo isoligwa na Abulahamu hawe hanhu ha kuzikila.

Currently Selected:

Mwanduso 23: King'hutu

Highlight

Copy