Mwanduso 18

Abulahamu kolongeligwa mbuli ya mwana

1Zuwa vidikalile dokwaka, Abulahamu kakala yakalile hana uluhelengo lwa kibanda chake. Mndewa Imulungu kamulawilila Abulahamu behi na mibiki mikulu ya Mamule, 2Abulahamu viyenule kihanga chake, kawona wanhu wadatu wema. Viyawone, kawakimbilila na kaidulika mbaka hasi, 3Abulahamu kalonga, “Wakulu mweye, mwahaninogela sikumumbite vivino, niye na msang'hanaji wenu. 4Ndekeni niwagalile mazi ga kusunha magulu genu, humuleni hano hasi mdibiki. 5Kipindi mohumula, nowagalileni ndiya kidogo muje, mpate mhamba ya kugendelela na mwanza wenu. Mweye mwa wageni zangu, ndekeni niwasang'hanile.” Nao wamwidika, “Vinoga, sang'hana kamba viulongile.”

6Avo Abulahamu himahima kengila mkibanda cha Sala, kamulongela, “Lopola, usole mhishi tano za usage unogile ng'hani, ukande, uteleke magate.” 7Abaho kalopola kuchola kudibumbila da fugo yake, ako kasagula bofu dimoja da ng'ombe ditelele goya, kamgwaa mtumwa wake, na heyo kapigilika himahima. 8Abaho Abulahamu kasola siagi na maziwa, na unde dipile da ng'ombe, kawatandila wageni zake. Viwakalile hasi mdibiki woja, na heyo kema behi na nao.

9Abaho waja iwageni wamuuza, “Mwehe wako Sala kakwahi?” Abulahamu kawedika, “ka Mng'anda mkibanda.”

10Abaho imoja wao kalonga, “Nobwela kumwako kipindi kamba kino mwakani, na mwehe wako Sala kolela mwana wa kimbigalo.”

Sala yakalile haulwivi, kukisogo chake, kakala kotegeleza. 11Abulahamu na Sala wakala wavele, na Sala kakala hatumika. 12Avo, Sala kakala koseka munda kwa munda, kalonga, “Niye namvele na mkasano wangu vivija mvele, vino nodaha kudeng'helela na kupata wana?”

13Abaho Mndewa Imulungu kamuuza Abulahamu, “Habali Sala kaseka na kuiuza kamba kodaha kulela mwana muuvele wake? 14Vino, kuna kinhu chochose hakidahika kwa Mndewa Imulungu? Kamba vinongile, nobwela mkipindi kikigwe, mwehe wako Sala kolela mwana wa kimbigalo.”

15Sala kengilwa bwembwe, avo kalema kwa kulonga, “Aka, sisekile bule!” Lakini Mndewa Imulungu kamulongela, “Ona, kukala useka.”

Abulahamu kowapulila wenekae wa Sodoma

16Wanhu awo viwenuke ili wasegela, walongoza umwambu kudili buga da Sodoma, na Abulahamu kawasindikiza muumwanza wao. 17Abaho Mndewa Imulungu kalonga, “Vino, nimfise Abulahamu kinhu kinilonda kusang'hana? 18Ulelo wake okuwa kabila kulu na kubitila hewo wanhu wa makabila gose nowatendela vinhu vinogile. 19Nimsagula heyo ili yawalagize wanage na ulelo wao wagoge nzila ya Mndewa Imulungu kwa kutenda gaja goyolonda Mndewa, avo Mndewa yagavikize gaja gayamulongele Abulahamu.”

20Abaho Mndewa Imulungu kamulongela Abulahamu, “Wanhu wa Sodoma na Gomola oyalaliligwa ng'hani kwavija nzambi zao zibanza. 21Avo, nochola kuko halole mwenyego, kamba gaja ganihulike gaukweli, kwavija nolonda kujuwa.”

22Avo, wanhu awo wasegela, wachola Sodoma, lakini Mndewa Imulungu kasigala na Abulahamu. 23Abaho Abulahamu kamcholela Mndewa Imulungu, kamuuza, “Vino, kweli kochola kuwakoboza wanogile hamoja na wene nzambi? 24Vino, kamba kudibuga hokuwa na wanhu wanogile malongo matano, kodikoboza buga jose? Vino, hudileka bule ili wanhu awo malongo matano wahonyeke? 25Sigesa kamba kotenda vivo, kuwakoma wanhu wanogile hamoja na wanhu wene nzambi! Havidahika bule, kwavija msemi wa isi yose kolondigwa yataguse goya.”

26Mndewa Imulungu kamwidika, “Kamba nahawona wanhu wanogile malongo matano mdibuga da Sodoma, mbuli ya awo nodileka buga jose.”

27Abulahamu kalonga, “Chonde, niye nihonzolomoka kulonga na Mndewa hamoja niye na timbwisi na sikinhu chochose. 28Lakini kamba wanhu wanogile wahawa malongo mane na tano badala malongo matano, vino, kodikoboza buga jose kwavija wahunguka wanhu watano?”

Mndewa Imulungu kamwidika, “Kamba nahawona wanhu wanogile wavika malongo mane na tano sidikoboza bule.”

29Abulahamu kengeza kulonga, “Kamba okala wanhu malongo mane waiyeka.”

Mndewa Imulungu kamwidika, “Mbuli ya wanhu awo wanogile malongo mane, sitenda vivo bule.”

30Abulahamu kalonga, “Go, Mndewa, chonde! sikuugevuzike, nolonga kabili. Vilihi kamba okoneka wanhu wanogile malongo madatu?”

Mndewa Imulungu kamwidika, kamba nahawona wao malongo madatu, sitenda vivo bule.

31Abulahamu kalonga, “Chonde, gela kumgongo uhonzolomo wangu wa kulonga na gweye, Mndewa. Yokuwa vilihi kamba wahakoneka wanhu wanogile malongo mabili?”

Mndewa Imulungu kamwidika, “Mbuli ya awo malongo mabili, sitenda vivo bule.”

32Abaho kalonga, “Go, Mndewa, chonde! sikuugevuzike, ndeka nyengeze kulonga. Kamba okoneka wanhu wanogile longo waiyeka, yokuwa vilihi?”

Mndewa Imulungu kamwidika, “Mbuli ya awo longo, sitenda vivo bule.” 33Mndewa Imulungu viyeshilize kulonga na Abulahamu, kasegela, na Abulahamu kabwela ukae kumwake.

Currently Selected:

Mwanduso 18: King'hutu

Highlight

Copy