Mwanduso 17

Kwingila kumbi acho kilaguso cha lagano

1Abulamu viyavikize miyaka malongo tisa na tisa, Mndewa Imulungu kamulawilila, kamulongela, “Niye na Imulungu yeli na Udahi wose, nhegeleze na utende ganogile. 2Na niye notenda lagano na gweye na kwengeza wanhu wa ulelo wako.” 3Abulamu kafugama, kaidulika mbaka hasi. Nayo Imulungu kamulongela, 4“Notenda lagano dino na gweye, nokulongela, kokuwa tata wa makabila mengi. 5Kulawa sambi, twaga jako hukemigwa Abulamu, ila kokemigwa Abulahamu, kwavija nikutenda tata wa makabila mengi.” 6Nokutenda uwe na ulelo mkulu, kulawa kumwako olawa wanhu wa makabila mengi na wayagwe okuwa wandewa.

7“Lagano jangu na gweye na ulelo wako dabule uhelelo. Avo nokuwa Imulungu wako na Imulungu wa ulelo wako. 8Nokugwaa isi ino yose ya Kanaani yuukala kamba munhu baki. Isi yose ya Kanaani yokuwa ya ulelo wako milele, na niye nokuwa Imulungu wao.”

9Abaho Imulungu kamulongela Abulahamu, “Na gweye udigoge lagano jangu, gweye mwenyego na ulelo wako na ng'holo zao. 10Dino dijo lagano jangu, niye na gweye, na ulelo wako, kila mbigalo kumwenu kolondigwa yengile kumbi. 11Mwingile kumbi, iwe kilaguso cha lagano jangu niye na mweye. 12Kila mwana wa kimbigalo muulelo wako yahavikiza siku nane tangu kuvumbuka yengizigwe kumbi, mutende vivo kwa watumwa waleligwe mng'anda yako na watumwa waguligwe kwa sente zenu kulawa kwa wanhu baki. 13Kila imoja yaleleke mng'anda yako, hebu yaguligwe kwa sente zako, yengile kumbi. Kino chokuwa kilaguso cha lagano jangu mzing'huli zenu na dino dokuwa lagano dilibule uhelelo. 14Mbigalo yoyose yahaleka kwingila kumbi yabaguligwe na wanhu zake kwavija kadibena lagano jangu.”

15Abaho Imulungu kamulongela Abulahamu, “Na mwehe wako sikuumkeme Salai, kulawa sambi twaga jake Sala. 16Nomtendela ganogile, kokulelela mwana wa kimbigalo. Nomtendela ganogile, kokuwa mama wa makabila mengi na wandewa wa wanhu olawa kumwake.”

17Abulahamu kaidulika mbaka hasi, kakala kosekelela kuno kogelegeza, “Vino, vodahika kweli mwana kuvumbuka kulawa kwa mvele wa miyaka gana? Vino, Sala yeli na miyaka malongo tisa, kodaha kweli kulela mwana?” 18Avo, Abulahamu kamuuza Imulungu, “Habali hutogola Ishimaeli yawe muhazi wangu?”

19Lakini Imulungu kamwidika, “Bule! Mwehe wako Sala kokulelela mwana wa kimbigalo, komgwaa twaga da Isaka. Heyo na wanhu wa ulelo wake nokwika nao lagano dilibule uhelelo. 20Nikuhulika viupulile mbuli ya Ishimaeli, avo nomtendela ganogile kwa kumgwaa wana wengi na ulelo mkulu. Na heyo kokuwa tata wa watawala longo na wabili na nomtenda yawe na ulelo onda uwe kabila kulu. 21Lakini lagano jangu nodika kwa Isaka, yonda yakulelele Sala aho mwakani kipindi kamba kino.” 22Imulungu viyamambukize kulonga na Abulahamu, kamuleka.

23Siku didija Abulahamu kamwingiza kumbi mwanage Ishimaeli na vivija kawengiza kumbi waja yawagulile na wambigalo wose wakalile mng'anda yake kamba viyalongeligwe na Imulungu. 24Abulahamu viyengile kumbi kakala na miyaka malongo tisa na tisa, 25na mwanage Ishimaeli viyengile kumbi kakala na miyaka longo na ndatu. 26Abulahamu na mwanage Ishimaeli wengila kumbi siku dimoja, 27kengila kumbi hamoja na wambigalo wose wakalile mng'anda yake hamoja na waja waleleke mng'anda yake na waja waguligwe.

Currently Selected:

Mwanduso 17: King'hutu

Highlight

Copy