Sang'hano 8

1Nayo Sauli kona vinoga kukomigwa kwa Sitefano.

Sauli kowadununza wanhu wamtogole Yesu

Mna izisiku azo wanhu wamtogole Yesu ako Yelusalemu wasonga kudununzigwa vihile. Wanhu wose wamtogole Yesu, wahaleka watumigwa, wakala wapwililike mwiisi iyo ya Yudea na Samalia. 2Wanhu wanogile wamzika Sitefano na wamulilila ng'hani.

3Lakini Sauli kalonda kuwadununza wanhu wamtogole Yesu. Kachola ng'anda mbaka ng'anda, kawalava kunze wanhu wamtogole Yesu, wambigalo kwa watwanzi, na kaweka mvifungo.

Mbuli Inogile yopetigwa ako Samalia

4Wanhu wamtogole Yesu wapwililike wachola kila hanhu kuwapetela wanhu Mbuli Inogile. 5Filipo kachola kudibuga da Samalia na kawapetela wanhu mbuli ya Kilisito Mkombola. 6Lunhu lwa wanhu lumtegeleza goya Filipo viyalongile na kuwona unzonza uyatendile. 7Vinyamkela wawalawa wanhu kwa kulila, na wanhu wengi waholole na mbetembete wahonyigwa. 8Avo kukala na deng'ho kulu kudibuga dija.

9Munhu imoja twaga jake Simoni kakala yokala mumo, kawazanya Wasamalia kwa uhawi wake. Kaitenda kamba kakala munhu mkulu. 10Wanhu wose kudibuga dija, wakulu kwa wadodo wamtegeleza ng'hani, walonga, “Munhu ino kana udahi wa Imulungu ukemigwa, ‘Udahi Mkulu’.” 11Wamtegeleza ng'hani kwavija kwa miyaka mingi kawazanya kwa uhawi wake. 12Lakini viwautogole usenga wa Filipo, usenga wa Mbuli Inogile ya Undewa wa Imulungu na mbuli ya twaga da Yesu Kilisito, wose wabatizigwa, wambigalo kwa watwanzi. 13Simoni nayo katogola, viyamambukize kubatizigwa kakala yokwanga na Filipo na kakanganya viyone unzonza na vilaguso vikalile vitendigwa.

14Watumigwa wakalile Yelusalemu wahulika wanhu wa Samalia waibokela mbuli ya Imulungu, avo wawatuma Petulo na Yohana kumwao. 15Viwavikile, wawapulila kwa Imulungu wanhu wamtogole Yesu wambokele Loho Yang'alile. 16Kwavija Loho Yang'alile kakala yang'hali hanamuhulumukila munhu yoyose kumwao, wakala wabatizigwe kwa twaga da Mndewa Yesu diiyeka. 17Abaho Petulo na Yohana wawekila makono, wabokela Loho Yang'alile.

18Simoni kona wanhu wamtogole Yesu wambokela Loho Yang'alile viwekiligwe makono na watumigwa. Avo kalonda kuwagwaa sente Petulo na Yohana, 19kalonga, “Na niye nigweleleni udahi uno, ili munhu yoyose yonda nimwikile makono gangu yabokele Loho Yang'alile.”

20Lakini Petulo kamwidika, “Upotele kutali gweye na sente zako, kwa kugesa kodaha kugula kwa sente nhunza ya Imulungu! 21Kuduhu hanhu hohose mwiisang'hano yetu, kwavija moyo wako haugesa ganogile mgameso ga Imulungu. 22Avo leka nzambi zako, na magesa gako gehile na mpule Mndewa yagele kumgongo. 23Kwavija nokona kumema migongo na kwa mfungwa wa nzambi.”

24Simoni kamulongela Petulo na Yohana, “Mhulileni kwa Mndewa, gano gamulongile sikugandawilile.”

25Viwamambukize kulonga gaja gawone na kuwapetela wanhu usenga wa Mndewa, Petulo na Yohana wabwela Yelusalemu. Mnzila wawapetela Mbuli Inogile wanhu wa mvijiji va Samalia.

Filipo na mkulu wa Isiyopiya

26Msenga wa kuulanga wa Mndewa kamulongela Filipo, “Itande uchole kusini kubitila nzila ilawa Yelusalemu kuchola Gaza.” Nzila ino sambi haitumika. 27Avo Filipo kaitanda na kuchola. Muisiopiya yelibule kimbigalo, yakalile munhu mkulu mna ingama ya Kandake mndewa wa kitwanzi wa Isiopiya kakala mnzila ya kuchola ukae kumwake. Kakala Yelusalemu komtambikila Imulungu na kakala yobwela ukae kumwake na mtuka wa kubulula. 28Viyakalile mnzila kakala yosoma kitabu cha mtula ndagu wa Imulungu Isaya. 29Avo Loho Yang'alile kamulongela Filipo, “Genda kakale behi na mtuka uja.” 30Baho Filipo kakimbila behi na mtuka kamuhulika munhu ayo kosoma kitabu cha mtula ndagu wa Imulungu Isaya. Filipo kamuuza, “Vino kogajuwa gago gousoma?”

31Mkulu ayo kedika, “Nodahaze kugajuwa bila munhu kunifambulila?” Avo kamgoneka Filipo yakwele mumtuka na yakale hamoja nayo. 32Munhu ayo kakala yosoma hanhu hano mna Gamaandiko Gang'alile,

“Kakala kamba ng'hondolo yogaligwa kuchinjigwa,

kamba mwana ng'hondolo yanyamale tuulu viyokanhigwa mibahila,

halongile mbuli.

33Kageligwa kinyala na koneligwa.

Kuduhu munhu yodaha kulonga mbuli za lukolo lwake,

kwavija ugima wake mwiisi uvika kuuhelelo.”

34Mkulu iyo kamuuza Filipo, “Nongele mtula ndagu wa Imulungu kolonga mbuli ya nani? Mbuli yake mwenyego hebu ya munhu iyagwe?” 35Filipo kasonga kulonga, kasongela hanhu hano ha Maandiko Gang'alile, kamulongela Mbuli Inogile ya Yesu. 36Viwakalile ogendelela na mwanza, wavika hanhu hakalile na mazi, mkulu ayo kalonga, “Hano hana mazi. Kinhu gani kingomesa ndeke kubatizigwa?” 37Filipo kamulongela, “Kodaha kubatizigwa kamba wahatogola kwa moyo wako wose. Mkulu ayo kamwidika, ‘Notogola kamba Yesu Kilisito iyo Mwana wa Imulungu’.”

38Mkulu ayo kalagiza mtuka wime. Filipo na mkulu iyo wahumulukila mgamazi, Filipo kambatiza. 39Viwalawile mgamazi, Loho wa Mndewa kamsegesa Filipo. Mkulu ayo hamonile kabili, lakini kagendelela na mwanza kuno kamema deng'ho. 40Filipo kasinhukila ka Azoto, kachola isi ya Kaisalia na mnzila kawapetela wanhu Mbuli Inogile kila buga.

Currently Selected:

Sang'hano 8: King'hutu

Highlight

Copy