Мәтта баян қилған Хуш Хәвәр 9

Һәзрити Әйсаниң паләч кесилини сақайтиши

1Һәзрити Әйса кемигә чүшүп көлдин өтүп, Өзи турған шәһәр Кәпәрнаһумға қайтип кәлди. 2Кишиләр зәмбилгә ятқузулған бир паләчни Униң алдиға елип кәлди. Уларниң ишәнчини көргән һәзрити Әйса һелиқи паләчкә:

— Оғлум, хатирҗәм бол, гуналириң кәчүрүм қилинди, — деди.

3Бир қанчә Тәврат устазлири көңлидә «Бу Адәм күпүрлүк қилди», дәп ойлиди.

4Уларниң көңлидә немә ойлаватқанлиғини билгән һәзрити Әйса уларға:

— Немә үчүн яман ойда болисиләр? 5«Гуналириң кәчүрүм қилинди» дейиш асанму яки «Орнуңдин тур, маң!» дейишму? Әлвәттә, ейтмақ асан, қилмақ тәс. 6Амма һазир Инсан Оғлиниң йәр йүзидә гуналарни кәчүрүм қилиш һоқуқиға егә екәнлигини испатлап берәй, — деди. Андин паләч кесәлгә:

— Орнуңдин тур, орун-көрпәңни жиғиштуруп, өйүңгә қайт, — дәп буйриди.

7Һелиқи адәм орнидин туруп өйигә қайтти. 8Буни көргән көпчилик қорқушуп, инсанға бундақ һоқуқни бәргән Худаға мәдһийиләр ейтишти.

Һәзрити Әйсаниң Мәттани шагиртлиққа чақириши

9Һәзрити Әйса у йәрдин чиқип алдиға қарап кетиватқанда, бир баҗгирни көрди. Униң исми Мәтта болуп, баҗ жиғидиған җайда олтиратти. Һәзрити Әйса униңға:

— Маңа әгәшкин! — деди.

Мәтта орнидин туруп, Униңға әгәшти.

10Һәзрити Әйса Мәттаниң өйидә меһмандарчилиқта болуватқанда, нурғун баҗгирлар #9:10 Баҗгирлар — Исраилни ишғал қилған римлиқлар үчүн өз хәлқидин баҗ жиғип беридиған вә шу сәвәптин нәпрәткә учриған йәһудийлар. вә гунакар дәп қаралған бир топ кишиләрму кирип, һәзрити Әйса вә Униң шагиртлири билән һәмдәстихан болди. 11Буни көргән пәрисийләр һәзрити Әйсаниң шагиртлириға:

— Устазиңларниң баҗгир вә гунакарлар билән бир дәстиханда олтарғини қандақ гәп?! — дейишти.

12Бу гәпни аңлиған һәзрити Әйса:

— Сағлам адәм әмәс, бәлки кесәл адәмла тевипқа муһтаҗдур. 13Муқәддәс Язмиларда: «Мән қурванлиқ қилишиңларни әмәс, рәһим-шәпқәт көрситишиңларни истәймән», дейилгән. Силәр берип бу сөзниң мәнасини үгиниңлар. Мән өзлирини дурус һесаплайдиғанларни әмәс, бәлки өзлириниң гуналирини тонуйдиғанларни чақирғили кәлдим, — деди.

Кониға есиливалмаслиқ

14Шу вақитларда Йәһия пәйғәмбәрниң шагиртлири келип, һәзрити Әйсаға:

— Биз вә пәрисийләр роза тутимиз, Сизниң шагиртлириңиз немишкә тутмайду? — дәп сорашти.

15Һәзрити Әйса җававән мундақ деди:

— Тойи болуватқан жигит техи той зияпитидә турған чағда, меһманлар һаза тутуп олтарса қандақ болғини?! Әлвәттә болмайду! Амма жигитниң улардин елип кетилидиған күни келиду, әйнә шу чағда улар қайғу-һәсрәт чәккинидин роза тутиду.

16Һеч ким кона көйнәккә киришип кетидиған йеңи рәхттин ямақ салмайду. Ундақ қилса, кийим жуюлғанда йеңи ямақ киришип, кийимни житип ташлайду. Нәтиҗидә житиқ техиму йоғирип кетиду. 17Шуниңдәк, һеч ким йеңи шарапни кона тулумға қачилимайду. Әгәр ундақ қилса, йеңи шарапниң көпүши билән тулум йерилидудә, шарапму төкүлүп кетиду. Демәк, тулумму кардин чиқиду. Шуниң үчүн йеңи шарапни йеңи тулумға қачилаш керәк. Шундақ қилғанда, һәр иккилисини сақлап қалғили болиду.

Тирилдүрүлгән қиз вә сақайтилған аял

18Һәзрити Әйса Йәһия пәйғәмбәрниң шагиртлириға бу сөзләрни қиливатқан вақтида, мәлум бир ибадәтханиниң бир җавапкәр адими келип, һәзрити Әйсаниң айиғиға жиқилип:

— Мениң қизим һазирла өлүп кәтти, Сиз берип униңға қолуңизни тәккүзүп қойсиңиз, у тирилиду, — деди.

19Һәзрити Әйса орнидин туруп, шагиртлирини елип, униң билән биллә барди.

20Йолда хун тәврәш кесилигә гириптар болғиниға он икки жил болған бир аял һәзрити Әйсаниң арқа тәрипидин келип, Униң чапининиң пешини силиди. 21У ичидә «Һәзрити Әйсаниң чапинини тутсамла, чоқум сақийип кетимән», дәп ойлиған еди.

22Һәзрити Әйса кәйнигә бурулуп, униңға қарап:

— Қизим, хатирҗәм бол, ишәнчиң сени сақайтти! — дейишигила, һелиқи аял сақийип кәтти.

23Һәзрити Әйса һелиқи ибадәтханиниң җавапкәр адиминиң өйигә кирип, нәй челиватқан вә һаза тутуп жиғлаватқан адәмләр топини көрүп, 24уларға:

— Чиқип кетиңлар, бу қиз өлмиди, ухлап қапту, — деди.

Бирақ халайиқ Уни мәсқирә қилди. 25Кишиләр чиқириветилгәндин кейин, һәзрити Әйса қиз ятқан өйгә кирип, униң қолидин тартти. Қиз орнидин турди. 26Бу хәвәр пүтүн әтрапқа тарқалди.

Бемарларниң сақайтилиши

27Һәзрити Әйса у йәрдин чиқип кетиватқанда, икки қарғу Униң кәйнидин келип:

— Әй падиша Давутниң Әвлади, #9:27 Давут падишаниң Әвлади — бу нам йәһудийлар арисида улар күтүватқан Қутқазғучи-Мәсиһни көрситәтти. бизгә рәһим қилғайсиз! — дәп вақирап кәтти.

28Һәзрити Әйса өйгә киргәндин кейин, һелиқи икки қарғу Униң алдиға кәлди. Һәзрити Әйса улардин:

— Силәр Мениң силәрни сақайтишқа қадир екәнлигимгә ишинәмсиләр? — дәп сориди.

— Әй Рәббим, ишинимиз, — дәп җавап бәрди улар.

29Һәзрити Әйса уларниң көзлиригә қолини тәккүзүп туруп:

— Ишәнгиниңлардәк болсун! — дейишигила, 30уларниң көзлири ечилди. Һәзрити Әйса уларға:

— Бу ишни һеч кимгә ейтмаңлар! — дәп қаттиқ тапилиди. 31Лекин улар у йәрдин чиқипла, бу ишни әтрапқа йейивәтти.

32Улар чиқип кәткәндин кейин, җин чаплашқан бир кекәч һәзрити Әйсаниң алдиға елип келинди. 33Һәзрити Әйса униңдики җинни қоғлиши биләнла, һелиқи адәм зуванға кәлди. Халайиқ һәйран болуп:

— Бундақ иш Исраилда зади болмиған, — дейишти.

34Лекин пәрисийләр:

— У җинларни уларниң башлиғиға тайинип һайдайдикән, — дейишти.

Һәзрити Әйсаниң кишиләргә болған меһир-муһәббити

35Һәзрити Әйса пүтүн шәһәр, йеза-қишлақларни арилап, һәр қайси ибадәтханиларда тәлим берип, Асманниң Падишалиғиға даир Хуш Хәвәрни тарқатти вә хәлиқ ичидики һәр хил кесәллик вә ағриқ-силақларни сақайтти. 36У топ-топ адәмләрни көрүп уларға ич ағритти, чүнки улар қойчисиз қой падилиридәк панасиз бечариләр еди. 37Шуниң билән У шагиртлириға:

— Қутқузулушқа интилидиғанлар мол һосулдәк көп, бирақ һосулни елиш үчүн ишләйдиғанлар аз екән. 38Һосулниң Егиси болған Худадин көпирәк ишчи әвәтип, һосулни жиғивелишни тиләңлар, — деди.

Currently Selected:

Мәтта баян қилған Хуш Хәвәр 9: HZUTCYR

Highlight

Copy