A Luk Sõng 3

A Zezi tʋʋmda seglgo

(Mt 3,1-6; Mk 1,1-6)

1A Tiber sẽn deeg Rom naam tɩ yʋʋm piig la a nu, t'a Põs Pilat so Zɩɩde, t'a Erod ya Galile naaba, t'a yao, a Filip, ya Iture la Trakonitid kombere, t'a Lizanias ya Abilɛn naaba, 2maan-kʋʋr kãsẽm-dãmb a An la a Kaif zamaanẽ, a Zakari biig a Zã, wʋma Wẽnnaam koɛɛg weoogẽ. 3Dẽ la a wa Zɩɩde baobga fãa n moon sũur tekr soobo, yel-wẽna sugr paoong yĩnga, 4wala b sẽn gʋls bãngd a Izayi sebrẽ:

«Sẽn moond-a weoogẽ wã koɛɛg la woto:

segl-y Soaala sore,

maneg-y b soya n demse!

5Tãn-long fãa sĩdi!

Sarem-y tãmsa la kunkuba fãa!

Rems-y so-golomse!

So-rʋda legb saalse!

6 # Iz 40,3-5. Tɩ woto ninsaal fãa na yãend Wẽnnaam fãagre.»

7 # Mt 12,34; 23,33. A Zã ra yeta zãma wã sẽn da wat a nengẽ t'a so-bã: «Wag-bi buudu, ãnna n wilg yãmb tɩ y zoe n põs sũ-puur ning sẽn watã? 8#Zã 8,33. Wom-y biis sẽn be yõodo, sũ-tekr biisi la y ra saag n yeele: ‹D ba la a Abraam ye.› Mam yeta yãmba tɩ Wẽnnaam tõe tɩ kugã sẽn digã, dog kamb n kõ a Abraam. 9#Mt 7,19. Marsã lar zoe n dɩga tɩɩs yẽgnẽ, tɩɩg ning sẽn pa womd-a bi-sõma fãa, b kɛɛgd-a lame n lob bugmẽ.»

10Zãma wã ra sokd-a lame: «D na n maana bõe?» 11T'a leok-ba: «Sẽn tara fu-yord a yi bɩ a kõ sẽn pa tar-a, la sẽn tar-a sẽn na n dɩ bɩ yẽ me kõ sẽn pa tar-a!» 12#Lk 7,29. Sẽn deesd-b yõor yaood me waame t'a so-ba. B me sokame: «Karen-saamba, d na n maana bõe?» 13T'a leok: «Da reeg-y bũmb n dogl b sẽn kõ noor tɩ y reeg ye.» 14Tãb-biisa me sok-a lame: «La tõnd yẽ, d maan bõe?» T'a yeel-ba: «Bɩ y ra maan ned ba a ye pãng ye, da luk-y ned bãong zaalem ye, la y ra tʋlg bũmb n zʋʋg y yaood ye.»

15Zãma wã ra gũuda Fãagdã. Dẽ la ned kam fãa ra yet, a pʋgẽ: sãnd kaa a Zã la Wẽnd Nedã? 16Dẽ la a Zã leok-b fãa: «Mam sooda yãmb koom; la ned n wate, tɩ b pãng yɩɩd maam; mam pa zem bũmb n na n lok b gãndalsa gĩs ye. Bãmb na n so-y la ne Vʋʋsem Sõngo la bugum. 17B zãada kaorg b nugẽ, la b na n pɩɩga b zɛɛga n wʋk biisã n sui baoorẽ, la b yõog fɩɩba bugum sẽn ka kiid pʋgẽ.» 18A Zã ra togsda neba Koe-noogã la a wɩngd b sũuri ne saglgo buud toor toore.

A Zezi soobo, a Zã yõkre

19A Zã ra yika zabre ne naab a Erod. Zabra yɩ-la a Erodiad poorẽ. A Erodiad da yaa a Erod yao, a Filip, paga. Zabra yɩ-la a Erod tʋʋm wẽns a taaba me poorẽ. 20#Mt 14,3-4; Mk 6,17-18. Dẽ kɩtame t'a Erod paas bõn-wẽng a to: a kɩtame tɩ b paga Zã roogo.

21A Zã waa n soo nebã n sɛ, t'a Zezi meng tol n deeg soobo. A Zezi sẽn waa n ket n pʋʋsdẽ la arzãn sẽn pake, 22#Bs 22,2; Yɩ 2,7; Iz 42,1; Mt 3,17; Mk 1,11; Lk 9,35. tɩ Vʋʋsem Sõng sig b zug ne bũmb wẽnego, ne wall wẽnego. Koɛɛg n yi yĩngr n yetẽ: «Fo yaa mam bi-nongre, mam n dog foo rũnna bala.»

A Zezi Krista yaab rãmba

(Mt 1,1-16)

23A Zezi yʋʋm da zemsa pistã, b sẽn waa n sɩng b tʋʋmde. Sã n ya neba sẽn tẽedã, b ba yɩla a Zozɛf, a Eli biiga, 24a Matat biiga, a Levi biiga, a Melki biiga, a Zamayi biiga, a Zozɛf biiga, 25a Matatiyas biiga, a Amos biiga; a Nawum biiga, a Esli biiga, a Nagayi biiga, 26a Maat biiga, a Matatiyas biiga, a Semeyin biiga, a Zozɛf biiga, a Zoda biiga, 27a Zoanan biiga, a Resa biiga, a Zorobabɛl biiga, a Salatiyɛl biiga, a Neri biiga, 28a Melki biiga, a Addi biiga, a Kosam biiga, a Elmadam biiga, a Ɛr biiga,

29a Zezi biiga, a Eliezɛr biiga, a Zorim biiga, a Matat biiga, a Levi biiga, 30a Simeõ biiga, a Zɩɩda biiga, a Zozɛf biiga, a Zonam biiga, a Eliakim biiga, 31a Melea biiga, a Menna biiga, a Matata biiga, a Natam biiga, a Daviid biiga,

32a Zese biiga, a Zobɛɛd biiga, a Booz biiga, a Sala biiga, a Naason biiga, 33a Aminadab biiga, a Admin biiga, a Arni biiga, a Esrom biiga, a Farɛs biiga, a Zɩɩda biiga, 34a Zakoob biiga, a Izaak biiga, a Abraam biiga,

a Tara biiga, a Nakor biiga, 35a Seruk biiga, a Ragawu biiga, a Falɛk biiga, a Ebɛr biiga, a Sala biiga, 36a Kayinam biiga, a Arpaksad biiga, a Sem biiga, a Nowe biiga, a Lamɛk biiga, 37a Matusala biiga, a Enok biiga, a Zarɛt biiga, a Maleleyɛl biiga, a Kayinam biiga, 38a Enos biiga, a Sɛt biiga, a Adem biiga, Wẽnnaam biiga.

Currently Selected:

A Luk Sõng 3: SSDC98

Highlight

Copy