Rut 4
4
Bniim bi Booŧ na Rut
1Wi wi Booŧ aşaaŋ aya du plëman pi ubeeka#4.1 du plëman pi ubeeka : dawo dko di bañaaŋ bajaaŋ baţiiniyaan iko yi uŧaak., kë ayiţul i abiiŋ aţiiniyaan uŋ aşë mara mara aţëp. Booŧ kë aşë jaka : « Ayiţ naan biinuŋ ţi i, dnumi'u. » Ñiinţ kë añog aţo. 2Kë Booŧ aşë du biinţ iñeen ţi bantohi biki ubeeka aji na baka baţo, kë baţoo. 3Kë aşë ji na ñiinţ ankaaŋ na pduka na bi Rut, aji : « Nowemi anwoonuŋ du uŧaak wi Mowab, aŋal pwaap uţeeh umbiiŋ awo wi nakeţ Elimelek ayiţ nja. 4Dşal aji dţupu kajaku inug wa ţi kadun ki banţooŋ biki, na ki bantohi biki ubeeka. Woli iŋal pnug wa jibi iŧaaŋuŋ na pa, knug. Işale wo iinŋali, kţupën nwo name. Iwooŋ naŧeek ţi bankaaŋ na pnug wa, nji kë mbaa bi. »
Kë ñiinţ mënţ aŧeema aji : « Aa ! Dŋal kanug wa. »
5Kë Booŧ aşë ji na a : « Unuur wi iknugaŋ uţeeh ţi Nowemi, wul wi ikaaŋ ayeenk Rut ñaaţ i uŧaak wi Mowab, ahar abuk nakeţ Elimelek, katimul kahilna kaduka ţi bka bi nul. »
6Kë aşë ŧeem aji : « Mënkhinan kado wi nkaaŋ na pdo ţiki dţi pŧok bka bi naan. Iwi ţi uleefu dolan uko wi nji nwooŋ i kado, ţiki mënhinan pdo wa. »
7Kë ţfa du Iŧrayel, ţi bwaap këme phiij, na iko bŧi yi bţëlşër, aloŋ aji wohëş kaşapaat kawul aŧënţul kadiimanaan kë bawat ţi ploolan. Du Iŧrayel ţfa, hënk di ñaaŋ ajaaŋ ado.
8Kë wi wi ankaaŋ na pnug uţeeh ajakuŋ na Booŧ : « Nugarën wa uleefu », aşë pënan kaşapaat.
9Kë Booŧ aşë ji na bantohi na bañaaŋ bŧi : « Dnug nţa di kakuţ kayeenk ţi Nowemi iko bŧi imbiiŋ awo yi Elimelek, na iko bŧi imbiiŋ awo yi bi Kiliyon na Mahlon, kë nakwo bamaar, 10kabot kayeenk ñaaţ i bajaaŋ bado Rut anwoonuŋ uŧaak wi Mowab kaniim, i Mahlon adukuŋ, katim ki ankeţuŋ kahilna kaduka ţi bka bi nul, kawutna kaneem ţi bayiţul na ţi ubeeka. Nawo nţa bamaar. »
11Kë bantohi na bañaaŋ bŧi banwooŋ du plëman kë baŧeem aji : « Ŋwo bamaar », aşë ñehan aji : « Ŋñehan Yawe Nawat Kabuka ado ñaaţ ankneejuŋ du katohu anaam ji bi Rakel na Leya, banŧumanuŋ pntaali pi Iŧrayel bukal batëb ţañ. Nawat Kabuka aţenu inaţ iliinŧ ţi Efrata ibot imeeţana ţi Betleyem. 12Ŋñehan kabuk ki Nawat Kabuka akwuliiŋ ţi ñaaţ i, kado katoh ki nu ki kanaam ji ki Pereŧ, i Tamar abukaruŋ Yuda#4.12 Pereŧ, i Tamar abukaruŋ Yuda : Natenan ţi Ulibra Ujuni 38. »
13Kë Booŧ ayeenk Rut, kë akak aharul. Wi bameeruŋ, kë Nawat Kabuka aţen Rut kë abuk napoţ ñiinţ. 14Wi wi baaţ başaaŋ aji na Nowemi : « Ŋdëman Nawat Kabuka, anwooŋ aanwutu nţa kë iwaaŋ ankluŋ kado kaţënku. Katim ki nul kameeţana ţi Iŧrayel. 15Awo mnlilan mi nu, kabot kaboofu ţi pţaf pi nu. Ahar abuku anŋaliiŋ abukariiŋ napoţ uŋ. Woli ido buk lah biinţ paaj na aloŋ baankhinan pdo uko wi Rut adooŋ. »
16Kë Nowemi aşë jej napoţ, akabana ţi bjënŧ, ul akuşuluŋ. 17Baaţ bakinţul kë başë ji : « Nowemi abuk napoţ », aşë du'a aji Obed#4.17 Obed : Ţi uhebërë Obed dawooŋ nalempar.. Ul abukuŋ Yeŧe aşin Dayiţ.
Pntaali pi Pereŧ
18Pntaali pi Pereŧ pii pi : Pereŧ abuk Heŧron, 19kë Heŧron abuk Ram, Ram kë abuk Aminadab. 20Aminadab kë abuk Naaŧon, Naaŧon kë abuk Ŧalmon. 21Ŧalmon kë abuk Booŧ, kë Booŧ abuk Obed. 22Obed kë abuk Yeŧe, kë Yeŧe abuk Dayiţ.
Currently Selected:
Rut 4: knf
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. in cooperation with Le Groupe CIM-TBM, Senegal
