Kañaam 18
18
Ubeeb wi naşih anyaaŋ awat du ugut
1Kayeeh ki pñaamarën Naşibaţi ki kapënna ţi ulibra wi najukan uyeeh. Kayeeh ki Dayiţ nalempar Yawe Nawat Kabuka. Dayiţ ayeehar ka Nawat Kabuka wal wi abuuranuluŋ ţi başooradul bŧi, abuurana ţi Ŧawul.
2Abëţ aji : Iwi Yawe Nawat Kabuka iwooŋ nayeŋ i naan, dŋalu.
3Iwi Yawe Nawat Kabuka, iwooŋ pnkuŋ pi nji ntëŋnuŋ
iwooŋ katoh ki ŋniw ŋankëmuŋ ki nji mmeniiŋ, ijaaŋ kbuuranaan.
Iwooŋ Naşibaţi i naan, awo pnkuŋ panjaaŋ pabeelën, awo ubeel wi naan ;
iwooŋ mhina manjaaŋ mambuuranan, iwooŋ uniw unkëmuŋ wi katoh ki naan.
4Dji kahuuran kaji : Bañaaŋ badëmaan Yawe Nawat Kabuka
kaşë buur ţi iñen yi başoorad naan.
5Pkeţ pabi fooyën
kë ubulan uweek unjaaŋ uŧok kë ulënkanaan maakan ;
6dbi wo wo ji nakalabuş du mnkeţ
pkeţ kë panaţ ţi kadun naan.
7Ţuŋ phaajala pi naan, dhuuran adu Nawat Kabuka,
dhuuran adu Naşibaţi i naan ;
kë aŧiinkën du ufëţ wi nul,
kadug ki naan kaban te du ibaţ yi nul.
8Mboş manşinţar aluŋar, anaay
inkuŋ kë işinţar ţi uţeeh alënk,
wal wi adeebaţuŋ.
9Udu upënna ţi iyiş yi nul apaya,
mntum kë mankfat apënan bdoo bjeenkal,
imbetan injaaŋ itërad kë ikpën ţi ba.
10Aţeeh baţi aşë wala,
kanfëluŋ kajënal pëţ kawo ţi ihoţul uţeeh.
11Aţo ţi uwanjuŧ wi bajaaŋ bado kerubin
ayiţ na ibaaklu yi uyook.
12Amena ţi bdëm, ado infëluŋ ijënal kë ifooya, ijën ji meel mi pndiiloŋ.
13Bjeehi bandëmuŋ maakan bajota kadun kë infëluŋ işë ţëp,
awo na mpoj na imbetan.
14Nawat Kabuka adugna du baţi,
Naşibaţi Andëmuŋ Maakan adeeŋ pdiim,
awo na mpoj na bdoo na imbetan.
15Awat işuuri awayëş başooradul,
atëmplën iliik liik kë balënk ajiŋ na pţi.
16Wi iwi Nawat Kabuka iduguŋ,
wi iwi Nawat Kabuka iheefënţuŋ,
umayar wi ŋkumpëş upën awinana,
kë dko di mboş mampafnuŋ ihoţ dapën awinana.
17Atarna kañen du bko duuţ, amëbanaan,
apënanaan ţi meel manţuunkuŋ.
18Aji buuranaan ţi naşoorad naan anhiniiŋ maakan ;
aji buuranaan ţi başoorad naan, bankaaŋ mnhina apelën.
19Banaţ ţi kadun naan unuur wi ujeenkuŋ ţi nji,
kë Nawat Kabuka aşë wo dko di mpafnuŋ ihoţ.
20Apënanaan alowan du ;
aŋalën, ukaaŋ kë abuuranaan.
21Nawat Kabuka awayëşaan pwayëş pŧool,
atuumën katuum kanliŋuŋ na pjinţ pi njinţuŋ.
22Dţaş bgah bi Nawat Kabuka,
mëndek Naşibaţi i naan kafeţ kadolna buţaan.
23Iko yi aţuuŋ pdo bŧi iwo ţi kadun naan,
mënji kaduk iko yi aţuuŋ pdo.
24Dwo najinţ piş ţi këş ki nul,
ddoonaan awo mënjuban nin.
25Uţuuŋ kë Nawat Kabuka atuumën aliŋan na uko wi ndooŋ,
aliŋan na pjinţ pi njinţuŋ ţi këş ki nul.
26Iwi Nawat Kabuka iinji kdek kafeţ anjaaŋ aţaşu,
kawo naŧool na anwooŋ naŧool.
27Iji kwo najoob bkow ţi ñaaŋ anjinţuŋ ţi këş ki nu,
kawo natit ţi kadun ki naguuru.
28Iwi ijaaŋ kbuuran bañaaŋ biki bakkowandënuŋ,
kawalan bandeeŋuŋ igaŋan.
29Iwi Nawat Kabuka iwooŋ pfiiţi pi naan ;
iwi Naşibaţi i naan, jeehaan bdëm bi naan.
30Dñoom kagut na pntuni pi bangoli wi iwooŋ na nji ;
dñoom kalut uniw uweek wi iwi Naşibaţi iwooŋ na nji.
31Bgah bi Naşibaţi nin ñaaŋ aanhil kaţup buţaan ţi ba ;
uţup wi Nawat Kabuka uwo ujinţ piş ;
uwo ubeel wi bañaaŋ bŧi banyaaŋ amena du a.
32In awooŋ Naşibaţi bë mënţ Nawat Kabuka a ?
In awooŋ pnkuŋ pi nji ntëŋnuŋ bë mënţ Naşibaţi a ?
33Ul ajaaŋ awulën uforŧa ;
ul ajaaŋ ado iko yi naan iwo iŧool.
34Ul ajaaŋ adolën nŧar ji ubaŧa ;
ul ajaaŋ adolën nnaţ du bko duuţ.
35Ul ajaaŋ ajukanaan ugut ;
ul ajaaŋ ajukanaan pgut na kaşuuri kanţak.
36Iwi Nawat Kabuka, iwulën ubeel wi nu unjaaŋ ubuuranaan ;
kañen kadeenu ki nu kaji kayeŋanaan ;
iji kdëmanaan wal wi iŧiinkuŋ pñehan pi naan.
37Iji kdolën nţi kaŧaran,
mënji kahubta.
38Dji kadookar na başoorad naan kamob baka ;
mënji kaţiiş bë mëmba na baka.
39Dji kawat baka baanji bahil pnaţa
baji bajot ţi ihoţ naan uţeeh.
40Iji kwulën uforŧa ugutanaani ;
ido başoorad naan kë bawo ţi ihoţ naan uţeeh.
41Ido başoorad naan kë baţii ;
dba na başoorad naan.
42Bahuuran adu, nin aloŋ aambi bi pbuuran baka ;
bahuuran adu Nawat Kabuka, kë aanŧeem baka.
43Dfuuţ baka jibi uyook ujaaŋ ufuuţ pdëpalën ;
dwet baka jibi bajaaŋ bawet ubulan du bgah.
44Idolën kë mbuur pŋom pi bañaaŋ ;
idolën kë nwo ţi kadun ki ŋŧaak ;
ido kë pntaali pi nwooŋ mëmmee pakak aŧiinkën.
45Woli djaka jak, dhaab bado bi do ;
bayaanţ badaar amaţën
46banoor awutan ;
bapën du bñot bi bameniiŋ na palënk.
47Nawat Kabuka awo ajug ubida !
Bañaaŋ badëmaan Naşibaţi awooŋ pnkuŋ pi ntëŋnuŋ !
Bañaaŋ badëmaan Naşibaţi, awooŋ mbuur mi naan !
48Ul awooŋ Naşibaţi anjaaŋ alukandëraan,
ul ajaaŋ ado bañaaŋ baŋup ţi kadun naan.
49Ijaaŋ kbuuranaan ţi başoorad naan.
Idolën kë nţo ţi başoorad naan duuţ,
idolën kë mbuur ţi ñaaŋ najooţ.
50Iwi Yawe Nawat Kabuka, uko mënţ ukaaŋ kë nji kadëmanu ţi ŋŧaak,
dyeeh kadëman katim ki nu.
51Iji kdo iko iñoŋarënaan kabuuranaan naşih i ikëruŋ ;
aji diiman ñaaŋ i akëruŋ bnuura bi nul banwooŋ baankba
aji diiman Dayiţ na pntaali pankpënnuŋ ţi a bnuura bi nul te mnţo.
Currently Selected:
Kañaam 18: knf
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. in cooperation with Le Groupe CIM-TBM, Senegal
