Mark 15

UNGOI IESU BUDO PILATE YEI MAMBUSERA

1Sipo be sipo de priest gitijijigegari de Jew embomei da embo nembogambo de agodari da atopapotegari de edo Jew embomei da gitijijigegari de burigi be dada isera edo Iesu dadi kiki dirisera. Edo ungoi Iesu da ingo bundedo budo Pilate da yei mambusera.

2Etero Pilate mi Iesu nganega isira, “Imo Jew embomei da gitijigari nembodiba ta?”

Setero Iesu mi mina sisira, “Inemi sesa da awodo awara.”

3-4Setiri priest gitijijigegari Iesu bekuba isera amimi sisera Iesu wasiri bebegae edo isira sisera awasedo Pilate Iesu sekago nganega isira, “Imo ro edo ge mina sae esi? Ungo imo bekuba ise sera imo wasiri bebegae jiwae edo esa sera.”

5Awarate Iesu ge mina sae etiri Pilate kove be kove isira.

6Jarusegari da bondo iji ainde embo embo ave dipapa edo iseri awa Pilate mi wujegedo isira. 7Iji ainde embo jawo Barabbas de embo daga embo da gitijijigegari budo wawara adi edo isera awa bundari oro da atima isera. Embomei eiawa bundari da atima isera ainda be awa ungo embogo ise embo nenei detero bebetisira awasedo.

8-9Edo embo jiwae dada edo ungoda wasiri awodo gido Pilate da yei sedo gosisera bundari embo da wujegarase awasedo Pilate ungoda yei nganega isira, “Ingo dipapa nanemi Jew embomei da gitijigari nembodiba awa wujegedoingoda yei itanase dipapa evi ta?” 10Pilate awodo sisira ainda be awa umo gosisira priest gitijijigegari awa Iesu ujo ae edo uso ingo da ititisera awa. 11Awarate priest gitijijigegari embo da yei sisera Pilate soro Iesu awa doturise Barabbas awa wujegarase edo ungoda yei itarase.

12Awasedo Pilate sekago embo da yei ge sisira, “Na Barabbas wujegadena edo embo Jew embomei da gitijigari nembodiba sedo ewa amo ro eni?”

13Setiri ungoi gogo dimbudo mina sisera, “Benema mi orega da deio betare.”

14Pilate mi nganega isira ro edo awodo sevi? Umo wasiri biae ro etiri?”

Setiri ungoi gogo nembodiba dimbudo sisera, “Benema mi orega da deio betare.”

15Setero Pilate ari embo dubo ewamei orase Barabbas awa wujegedo Iesu awa ungoda ingo da ititisira. Edo setiri ungoi Iesu vejedo edo embo da yei benema mi orega da doro betarase ititisera.

ISORO EMBOMEI IESU GANDUBURISERA

16Edo isoro embomei Iesu budo Rome embomei da gitijigari da kasari yei da mambudo setero isoro embo nenei daedo dada isera. 17Ungoi berari dada edo ombari kokoi awa itero Iesu mi ombusira edo gobe jiroroka ari awa bebe mi edo uso beo da ititisera. 18Awodo edo umo gandubedo uso yei sisera, “Jew embomei da gitijigari nembodiba imo awara.” 19Edo ungo awodo sedo ituka mi umo beo da dedo kosiwa edo baingo dederi edo uso yei tumondebain edo isera. 20Edo ungo umo gandubedo atae edo ombari kokoi awa totigedo uso ombari topo awa sekago itero ombusira. Awodo edo ungoi Iesu budo ponda bugudo benema mi orega da doro betarase budo mambusera.

UNGOI IESU BENEMA MI OREGA DA DORISERA

21Edo ungo mambuse embo jawo Simon tambusera. Embo Simon eiawa Alexander de Rufus de da mamo awa uso busu Cyrene awa dodo Jerusalem nati da mambusira. Edo ungoi umo tambudo umo sae beuso aera te setero Iesu da orega ango isira. 22Edo ungoi Iesu budo bugudo yei jawo Golgotha uso jawo ainda be awa agatu da yei ainda bugusera. 23Edo ainda ungoi Iesu grape ngamo awa rora tokaka de dada isera awa itoro indarase isera te umo indari ujo ae isira. 24Edo jareriko ungoi benema mi Iesu orega da dorisera. Edo ungo Iesu orega da dedo uso ombari awa kando edo badi sedo amemi bo rawa beiri awa gadi sedo ungo pipi isera.

25Edo sipo de 9 A.M. awa Iesu orega da dorisera. 26Edo bekuba ari ge ungoi gaisera awa sisera, “Umo awa Jew embomei da gitijigari nembodiba.” 27Edo iji ainde ungo embo bengono embobo etoto daedo orega da benema mi dorisera bengono embo da awa Iesu da ingo be da edo nei awa uso ingo anda da. 28Edo ungo awodo isera amimi ro jiwari da awa be isira edo jiwari mi sisira,

“Ungoi umo embo bebegae deda ititisera.”

29Edo embo yima derigurise mani mani ise ge biae Iesu da yei sise sedo isera, “Imo Jew embomei da tumondebain ari oro arasegedo edo iji tamonde de sekago adi mo inemi sedo isesa? 30Boroko orega dodo wosedo imo imosuka soregeio.”

31Da awodo priest gitijijigegari de agodari da atopapotegari de mi Iesu gandubedo ungo ungosuka mina sara edo isera, “Umo embo nenei soregedo isira te umo umosuka soregari awa umo gaera. 32Edo Keriso Israel embomei da gitijigari nembodiba orega dodo wosari ingodena gadera awa ingodena umo gebe adera.”

Edo embo etoto Iesu ga daedo orega etoto da dorisera awa daedo Iesu da yei ge bebegae sisera.

IESU BEBETISIRA

33Iji soropu da umenga mi busu berari awa apuregurisira. 34Edo iji wosedo yiko ongobo iri iji 3 P.M. awa umenga atae etiri Iesu gogo dimbudo sisira, “Eli Eli Lama Sabachthani,” ainda be awa “Naso God naso God ro edo na dotesi?”

35Setiri embo nenei ainda atisera amimi ingido sisera, “Elijah jawo sira mo gosewa?”

36Setero embo da mi bo budo grape ngamo tokaka ainda patido ituka mendo da itido Iesu mi indarase jijigurisira. Edo Iesu da begiti aikambu jigiri embo nenei mi sisera, “Simba e. Elijah mo bugudo umo orega da budo itari woseita? Awa ingode simba ise gore.”

37Setiri Iesu gogo dimbudo umo bebetisira.

38Edo Iesu betetiri bo Jew embomei da tumondebain ari oro da yei kotopu da be gajari awa inda tuturo edo bugudo tu edo keresegurisira edo bo be etoto isira. 39Edo isoro embo 100 awodo da gitijigari umo orega da jo kena derido atisira amimi Iesu gogo dimbudo bebetisira awa gido sisira, “Gebe embo emone God da mei ra.”

40Edo emboevetu nenei daedo besaungo atisera awa gosise atisera. Edo emboevetu ainda teda awa Mary Magdalene de Mary de Joseph de uso namendi singa James de da ai de Salome de awa ainda atisera. 41Edo Iesu Galilee busu da pepeta edo isira ainde emboevetu awawa Iesu ambo ambo ise umo kondade edo isera. Emboevetu nenei jiwae Iesu ga da Jerusalem bugusera awa daedo ainda atisera.

JOSEPH IESU GOWUSIRA

42Ongobo edo piri Joseph Arimathea nati embo amimi bugusira. Embo eiawa Jew embomei da gitijigari awa God da gitijigari iji awa bugarase dipapa edo isira. 43Joseph awa gosisira iji awa bondo sia ari iji edo gosisira euma awa Jew embomei da tumondebain ari iji awasedo umo goroba edo Pilate da yei mambudo Iesu da tamo itari badi atega sisira. 44Edo Pilate Iesu matu betetira ainda ge awa ingido kove isira. Edo Pilate setiri isoro embobo 100 da gitijigari bugudo toriri Pilate uso yei sisira, “Iesu matu betetita?”

45Setiri isoro embo bo da gitijigari mi mina sisira, “Gebe umo matu betetira.”

Edo Pilate ge awa ingido Joseph da yei sisira, “Awara Iesu da tamo buio.” 46Setiri Joseph bo seka budo Iesu da tamo itiri wosetiri bo amimi ruwusira. Edo tamo awa ruvedo budo uje meko da ainda ititisira. Itido ganuma nembodiba awa mimino mimino etiri bugudo uje meko be awa gajisira. 47Edo Joseph umo awa iri Mary Magdalene de Mary Joseph da ai de Iesu rawainda ititiri awa gosisera.

Currently Selected:

Mark 15: nou

Highlight

Copy